Kufuma 24 - Amazwi Yakwe Leza 2013

Kutama nsimbi ya upangano

¹ Pacisila lino Yawe wamala ukupeela amasunde ku ina Izlaeli anena Mose ati, “Iza, kwela mwamba kunondi, wize na Aloni, Nadabu Abiu nga na aikolo ya ntunguluzi zya ina Izlaeli amakumi cinimbali. Lino mucili katalamukila, mufukame pansi mumpepe.

² Wewe wenga sile upalame pipi nani, muze foo. Antu yatalinzile kukwela mwamba.”

³ Mose apita, aya anena antu amazwi na malamulo yonsi yano Yawe wamunenyile. Lyene antu yonsi yaasuka yati, “Endi, tumacita vyonsi vino Yawe watavwanga.”

⁴ Mose alemba malamulo yakwe Yawe yonsi. Katondo ka wanda walondelela, Mose akuula kavuwa mwisika ya mwamba, nga aimika na mawe ikumi na yaili, cila iwe lila likwimilila umutundu onga wa ina Izlaeli.

⁵ Lyene atuma aina Izlaeli alumendo, iyaya yapeela amawila akocela Yawe. Iyafyula tucipambasi nu kupeela uwila wa utandano kuli Yawe.

⁶ Mose atoola citika wa wazi awika mu ngeso, lyene uwazi wasyala asansa pa kavuwa.

⁷ Pacisila cakwe vii, Mose atoola lupapulo lwa upangano awelengela antu. Lyene antu yavwanga yati, “Tukaayela Yawe nu kucita vyonsi vino watavwanga. Wene tumamuvwilanga.”

⁸ Lyene Mose atoola uwazi uwamu ngeso nga akanyila antu, alino avwanga ati, “Uwazi kwene uu, cili cisininkizyo ca upangano uno Yawe wapangana namwe pa kumupeela malamulo yaa.”

⁹ Lyene Mose, Aloni, Nadabu, Abiu, nga na aikolo ya ina Izlaeli amakumi cinimbali yakwela mwamba,

¹⁰ alino yalola Leza wino aina Izlaeli yapepanga. Mwisika lya ngazo zyakwe mwali cimwi calolekanga papela ngati iwe licindame lyakwe safilo, ilyanze ningo, kuloleka kwaliko ngati iyulu.

¹¹ Leza atononyile intunguluzi zii, zya ina Izlaeli. Endi yamuweni Leza, lino yalola Leza alino lyene yalya nu kumwa capamwi.

Mose pa Mwamba wa Sinai

¹² Yawe anena Mose ati, “Iza kwela mwamba kunondi, lyene wize walolela kuno kwene. Ndakupeela vipampa vya mawe yaili pano pali amasunde akusambilizya antu.”

¹³ Caleka Mose atenuka pamwi na Yoswa kaazwa wakwe, alino Mose atandika kukwela mwamba wakwe Leza.

¹⁴ Mose ala watanena aikolo ati, “Mwemo mwatulolela pa kwene pa nsakwe mpaka kufika na lino tulawela. Aaloni na Huli yamasyala kuno namwe. Caleka wino wensi akweti mulandu angaya kunoyali.”

¹⁵ Mose akwela Mwamba wa Sinai, nga ni kumbi livimba mwamba.

¹⁶ Uluswepo lwakwe Yawe iluloleka pa Mwamba wa Sinai, nga ni kumbi livimba mwamba pa manda mutanda. Pa wanda uwalenga cinimbali, Yawe aama Mose kwi zwi ukufuma mwi kumbi.

¹⁷ Ku ina Izlaeli uluswepo lwakwe Yawe iluloleka wa cimbilimbili ca moto icikwaka papela ya mwamba.

¹⁸ Mose aingila mwi kumbi, atwalilila kukwela mwamba mpaka afika papela. Mose aikala kuku kwene amanda amakumi yani, musanya nu usiku.