Kufuma 23 - Amazwi Yakwe Leza 2013

Ulungami nu kuntaya na kasoozi

¹ “Utasansanta impwelo zyaufi, nupya utazwilizya muntu wa mulandu pa kumuvwangila umboni waufi.

² Utawila kuli cele wensi lino yakucita iviipe. Utazumilizyanya nayo lino yakuvwanga umboni waufi uno ukaonona ulungami pakuti uzanzye aingi.

³ Pakupingula umuntu mupina utaya na kasoozi.

⁴ “Ndi walola masaye nanti punda wa mwanisi wako wataponga, ulinzile umutwalile.

⁵ Punda wa mwanisi wako ndi wapona pa kunyomelwa cisendo, utapuzya nu kumusya. Lelo uwazwilizye mwanisi wako kukatusya punda nupya.

⁶ “Ndi wenga uwamu antu yako mupina watala mulandu, mumupingwile mulandu kwaula kasoozi.

⁷ Uleuke mu vya ntumpu. Utakoma umuntu wakaele akacita vyawololoke, pano nemo ntalapanya mukakasi.

⁸ Utapokelela mafukakanwa, pamulandu wakuti yene yakapafuzya manso ya antu yano akapingula imilandu, pano mafukakanwa yakalenga mulandu kwipila yao ataponzile.

⁹ “Mutacuzya mwinamasi. Mwemo mwamanya vino caya ukuya mwinamasi, pano namwe kwene mwali ainamasi mu Eguputo.

Mwaka uwalenga cinimbali nu wanda uwalenga cinimbali.

¹⁰ “Pa myaka mutanda uwakomela imbezu zyako mu calo nu kuzombola.

¹¹ Lelo mu mwaka uwalenga cinimbali icalo cico ucilalika. Antu apina amu mutundu winu aliwo yangalya cimbuka uwamu calo cico, alino inyama zyamu mpanga zingalya ivyasyala. Mwacita icili conga nu ku vyalo vya matingi ni vya miolivi kwene.

¹² “Waomba imilimo yako mu manda mutanda, lelo pa wanda uwalenga cinimbali utaomba imilimo, kuti yamasaye yako yapuze pamwi na ya punda kwene. Nupya kuti azya yako nga na inamasi yapuze.

¹³ Muvwikisye vyonsi vii vino namunena. Mutapepa tuleza tuze, mutalumbula na mazina yatuko.

Mwazevya vimulo vikulu vitatu cila mwaka

¹⁴ “Mwazevya vimulo vitatu cila mwaka pa kuncindika.

¹⁵ Mwazevya Cimulo ca Mukate usi na Citutumusi. Wakwe vino namupiile ilamulo mwalya umukate usi na citutumusi pa manda cinimbali mu mwezi wakwe Abibu, pa nsita ino cikacitikila, pamulandu wakuti mu mwezi kwene uwo alino mwafumile mu Eguputo. Kusi umuntu wakwiza ku ng'anda yane minwe.

¹⁶ Mwazevya cimulo pa manda ya kuzombola iviseekwa vinu ukufuma mu vyalo vinu. Mwazevya cimulo ca wanda wa kusezya vya uzombozi vyonsi ku kusila kwa mwaka, lino mukukoozya vilyo vinu vyonsi.

¹⁷ Amaila yatatu mu mwaka antu yonsi aonsi yalinzile kulolekela pa manso yane ne Yawe Simwandalali.

¹⁸ “Pakumpeela uwazi wa nyama ya mpolelwa, mutaapelela pamwi nu mukate umuli icitutumusi. Mafuta ya mawila yane ya vimulo yatasungwa kufika katondo ka wanda walondelela.

¹⁹ “Cila mwaka mwaleta ku ng'anda yakwe Yawe vya uzombozi vinu vyankolelo. “Mutaeleka kana ka mfwele nanti ka mbuzi mwi ziya lyakwe nyina.

Ulayo nu kusokwa

²⁰ “Natinatuma mungeli wane inkolelo inu, pakuti amucingilile umu nzila nu kulenga kuti mufike ku cifulo cino namuteyanyizizya.

²¹ Mwauvwila wiyo kwene, nupya mwauvwikisya vino akumunena pamulandu wakuti natimupeela maka yonsi. Ndi mwacita vikanza kunoli alasoka cuze.

²² Lelo ndi muvwila wiyo kwene nu kucita vyonsi vino akumunena, lyene Nene kwene tulapatana na anisi inu, nupya wensi wino wapata mwemwe tulalozyanya nawe.

²³ “Mungeli wane alakolela ku nkolelo inu, nupya alamutungulula ku mpanga ya ina Amoli, aina Hiti, aina Pelizi, aina Kenani, aina Hivi nga na Yebusi, nupya ndayonona yonsi.

²⁴ Mutafukamila unkolanya wakwe tuleza twao nanti kutupepa. Mutalondelela mipepele nanti miyele ya antu yaa. Mukonone tuleza twao nupya mukatamole vipilala vya mawe yao pano yakapepela.

²⁵ Ndi mwampepa nene ne Yawe Leza winu indamupolelela. Ndalenga kuti muye ni vyakulya nga na manzi, nu kulenga kuti mutalwala.

²⁶ Mu mpanga inu kusi umwanaci umwi wino civiya cilononeka nupya kutalaya ng'umba. Ndalenga kuti mwaikala amanda avule.

²⁷ “Antu yonsi yano yakamulwisya ndayalenga kuti yaye ni ntete kunomuli nupya ndalenga kuti yao amupata yaye avulungane cuze cakuti yalasimula kantapepela.

²⁸ Ndalenga kuti aina Hivi, aina Kenani nga na ina Hiti yutuke lino mutacili mufikeko, nupya yalutuka wa antu yano yalumwa na mavu.

²⁹ Ntalalenga kuti yafume mu mwaka onga kwene pano mu mpanga mungasyala sile mwaula antu, ni nyama zya mpanga zingaya izitupu.

³⁰ Lelo indalenga kuti yafumemo panono panono mpaka kufika na lino mulavyala ana avule nu kutoola impanga iyo,

³¹ Ndapanga mumpaka ukufuma kuli Yemba Muyenzu mpaka nu kufika kuli Yemba Mukulu wa ina Filisti. Nupya ukufuma ku lwanga mpaka kufika nu kuluzi lwa Yufulate. Ndalenga kuti muye na maka pa antu amu mpanga iyo nu kuyazinga.

³² Mutaca mucite upangano nayo nanti na tuleza twao.

³³ Mutakaleke antu yalya ikale mu mpanga inu, ndi mwayazumilizya kwikala yalamuteya kuti mwapepa tuleza twao nga mu musango uu, yalalenga kuti mwaifya kunondi.”