Kufuma 22 - Amazwi Yakwe Leza 2013

¹ “Muntu ndi wiya masaye nanti imfwele nanti imbuzi, wakoma nanti wakazya, alinzile kulipila yamasaye yasano pali masaye wiyo wenga, nga alinzile kulipila imfwele nanti imbuzi zini pa mfwele nanti imbuzi iyo yonga.

² “Mwivi ndi walemwa usiku akwiya mu ng'anda nga yamukoma, wino uwamukoma atangapeelwa mulandu wa kutala katwe.

³ Lelo ndi cacitika musanya, umuntu wiyo angapeelwa mulandu wakutala katwe. “Icumi kwene umwivi alinzile alipile pali cino wiya. Lelo ndi cakuti atakweti icakulipa, lyene yalinzile kumukazya kuti alipile pali vino wiya.

⁴ Ndi cakuti inyama ino wiya yaizana ipuma ale ali nayo, cisi mulandu inyama iyo ingaya a masaye nanti punda nanti imfwele, wene alinzile kulipa ziili pa nyama yonga.

⁵ “Muntu umwi ndi waleka iviteekwa vyakwe vyaya vingila mu calo ca muntu muze nu kulya vilimwa vyamu calo cico, umweneco wa viteekwa vivyo alinzile ukulipa muze vilimwa vyakwe visuma cuze ukufuma mu calo cakwe, nanti iviseekwa vyakwe visuma cuze.

⁶ “Muntu umwi ndi wasonteka umoto mu calo cakwe, lyene umoto walemela nu kuyaoca ingano izili mu calo ca muze, kumwi nazino yatulika kweneko, nanti koca icalo umuli vilimwa, umuntu wiyo alinzile ukulipa pali vino vyononeka.

⁷ “Muntu umwi ndi wazumila kusungila umuntu muze impiya nanti icintu camutengo ukulu nga lyene yamwiyila, ndi umwivi yamulema alinzile kulipila maila yaili.

⁸ Lelo ndi umwivi atalemilwe, lyene wino wasunganga impiya ni vintu vyamutengo ukulu, yalinzile kumutwala kuli yakapingula nga yakapingula yalalola ndi cakuti wiile mwinipamba vintu vivyo nanti foo.

⁹ “Mu mulandu onsi uno antu yaili yakupazyanya pali masaye, punda, imfwele, vyakuzwala nanti icintu consi caticiponga, cino ali wino akuti cakwakwe, antu yaili yaa yalinzile kuyatwala kuli yakapingula. Lyene yakapingula yalinzile kupingula mulandu, nga wino wazanikwa nu mulandu alinzile ukulipa muze maila yaili.

¹⁰ “Muntu umwi ndi wazumila kusungila mwinipamba punda, masaye, imfwele nanti iciteekwa cuze, lyene iciteekwa cico cafwa nanti cacisika, nanti casendwa mu nkondo, nga ndi pasi kambone,

¹¹ umuntu wiyo alinzile kulapa mwi zina lyane ne Yawe pamwi ndi kambone wakwe ukuti wene atiya citeekwa ca muntu muze. Lyene umweneco wa citeekwa alinzile kuzumila ukuti citeekwa caticiponga, nga muze atalinzile kumulipila cuze cakupyanikizya.

¹² Lelo ndi citeekwa yaciivile, umuntu wiyo alinzile kulipila umwine wa citeekwa.

¹³ Ndi citeekwa cico calika ni cilyanyi ca mpanga, kasunga wa citeekwa cico alinzile ukuleta ivyasyalapo kuti viye icisininkizyo. Lyene atangalipa pa citeekwa icati cilika ni cilyanyi ca mpanga.

¹⁴ “Muntu umwi ndi wazima iciteekwa ku muze, lyene iciteekwa cacisika, nanti cafwa lino umweneco asipo, umuntu wiyo uwazime alinzile ukulipa.

¹⁵ Lelo ndi cico cacitika lino umweneco apanoli, lyene atalinzile ukulipa. Ndi walipile pa kwazima iciteekwa, lyene impiya kwene zizyo ali malipilo.

Masunde yapa Miyele ni mipepele

¹⁶ “Muntu ndi waongola nu kulongozya nu mukazyana atatala wamanya umonsi nupya atataisiwa, umuntu wiyo alinzile kulipila zya cisungu, nga lyene amutwale.

¹⁷ Lelo ndi isi wa mukazyana wakana kuti umonsi wiyo amutwale, lyene umuntu wiyo alinzile kulipila isi wa mwana impiya kulingana ni zyakulipa pa mukazyana atamanyile umonsi.

¹⁸ “Mwanaci wensi wino akacita vyamalele alinzile akomwe.

¹⁹ “Monsi wensi wino uulungana ni nyama alinzile akomwe.

²⁰ “Muntu wensi uwapeela impolelwa kuli tuleza alinzile akomwe. Lelo ukwakupeela impolelwa akuli nene, ne Yawe.

²¹ “Mutacuzya nanti kuzunya mwinamasi. Mwaiusya ukuti namwe kwene mwali ainamasi mu Eguputo

²² Mutacuzya mukamfwilwa nanti umwana musyale.

²³ Ndi mwayacuzya, ne Yawe nduvwa kulila kwao kuti njazwe.

²⁴ Nupya ndasoka nu kulenga kuti anisi inu yamukome mu nkondo. Aci inu yalaya yamukamfwilwa, na ana inu yalaya ana asyale.

²⁵ “Umwi ndi wakongwesya impiya ku muntu ali wensi uwamu antu yane mupina, atacita wakwe kakongwisya wa mpiya, alonda kuti yamulipe kalowa.

²⁶ Ndi watola mwingila wa muntu umwi nu kuucita icintu cakwe kamukole ukuti alakulipila, lyene ulinzile umuswilizizye lino ilanzi litali liwe,

²⁷ pamulandu wakuti cili icakuvimbala sile cino mupina akweti ca kumucingilila ku mpepo usiku. Uzye nacuze icani cino angavimbala? Ndi wene walilila kunondi ukuti mwazwe, ndamwasuka pano nene wa mizu.

²⁸ “Utakavwange mazwi ya misuli kuli Leza nupya utakatipwile intunguluzi ya antu inu.

²⁹ “Mwampeela amawila ukufuma ku vyauzombozi winu na waini winu pa nsita ino vyapeelwa. “Mwampeela mayeli inu aonsi.

³⁰ Mwampeela mayeli ya ng'ombe ni mfwele ni mbuzi zinu. Mwaleka iyeli lyaviko na nyina amanda cinimbali, na pa wanda uwalenga cinani mulipeela kunondi.

³¹ “Mwemwe antu yane. Caleka mutalinzile ukulya inyama ya citeekwa cino cakomwa ni cilyanyi ca mpanga. Inyama iyo mupeele kuli yasimbwa.