Kufuma 21 - Amazwi Yakwe Leza 2013

Amasunde pa lwakusunga azya

¹ Yawe anena Mose ati, “Londolwela aina Izlaeli amasunde yaa.

² Ndi wakala muzya umonsi Muyebulai, wene ali nu kukutumikila imyaka mutanda. Lelo mu mwaka uwalenga cinimbali wene alinzile kukululwa kwaula kulipila nanti cimwi.

³ Ndi muzya wiyo atakweti umuci lino wamukazile, nomba wiza watwala lyene atalinzile kusenda umuci lino wakululwa. Lelo ndi watwite lino wamukazile, lyene alinzile kusenda umuci lino wakululwa.

⁴ Musambazi wakwe ndi wamupeezile umwanaci kuti aye umuci, nga ndi wamuvyalila ana aonsi nanti anaci, ale umwanaci na ana yonsi antu ya musambazi. Monsi alinzile ukupita wenga lino wakululwa.

⁵ Lelo muzya wiyo ndi waivwangila ukuti watemwa umusambazi wakwe, nu muci wakwe nga na ana yakwe nu kuti atakulonda kukululwa,

⁶ lyene umusambazi wakwe alinzile kumusenda ku ng'anda yakwe Leza. Alino mu ng'anda yakwe Leza, amwimike pa mulyango nanti pa maingwe ya mulyango nga amutulule ikutwi. Lyene mu musango uu, ale waya muzya mpaka lino alafwa.

⁷ “Monsi ndi wakazya umwana wakwe umwanaci ukuya muzya, umwana wiyo atangakululwa wakwe vino azya aonsi yakakululwa.

⁸ Ndi angamukazya ku muntu wino akulonda kuti aye umuci wakwe, lelo umuntu wiyo atatemilwe mukazyana, lyene isi wa mukazyana alinzile amukale. Musambazi wa mukazyana wiyo atangamukazya ku inamasi, pamulandu wakuti wene atamusunzile ningo.

⁹ Monsi ndi wakala muzya umwanaci kuti amupeele ku mwana wakwe umonsi aye umuci wakwe, wene alinzile kumusunga wa mwana wakwe umwanaci.

¹⁰ Monsi ndi wapalika, alinzile kutwalilila ukupeela kapundu wakwe cipimo icili conga ca vyakulya ni vyakuzwala, nga ni nsambu zili zimwi kwene, ndi vino wamucitilanga lino atali apalike.

¹¹ Monsi ndi atafikilizye vii vyonsi kunoli, lyene alinzile kumuta aye muntungwa kwaula kumulifya malipilo yamwi.

Kulanda pa masunde akumile impanzela.

¹² “Wino wensi uuma umuntu umwi nu kumukoma, nawe kwene alinzile ukukomwa.

¹³ Lelo ndi cacitika sile mu uzanzo, wene atamupanga kumukoma, lyene umuntu wiyo apuukile ku cifulo cino ndamupaatwila, akuno azine.

¹⁴ Lelo ali wensi ndi wasoka nga nu kukoma umuntu muze ku mufulo, nanti angapukila ku kavuwa kane, mulinzile kumufumya mu kavuwa nu kumukoma.

¹⁵ “Wino wensi uuma isi nanti nyina alinzile ukukomwa.

¹⁶ “Wino wensi uwasenda umuntu umwi ku maka kuti akamukazye nanti kuti amucite muzya, wene alinzile ukukomwa.

¹⁷ “Wino wensi uwatuka isi nanti nyina alinzile ukukomwa.

¹⁸ “Antu ndi yakulwa lyene umwi uwa munoyali watama muze ni iwe nanti wamuma ikofi, lelo atakomile umuntu wiyo, lyene umuntu wino yatama ndi walwala walala pa musanzi,

¹⁹ lelo pacisila wakatuka amapita nanti amapitila ku mulinda, umuntu wino watamile muze atalinzile kuvunukwa. Wene alinzile ukulipa wino watamile pa nsita ino wasumba pa musanzi. Nupya alinzile kumusunga mpaka apole.

²⁰ “Muntu ndi uuma muzya wakwe ni ntuwa, umonsi nanti umwanaci, nga muzya afwa papo kwene, umuntu wiyo alinzile kuvunukwa.

²¹ Lelo ndi muzya wiyo walinda uwanda onga nanti amanda yaili kwaula ukufwa, lyene umusambazi wakwe atalinzile kuvunukwa. Pano lino umusambazi waponzya icuma cakwe, ala caticilingana.

²² “Antu yamwi aonsi ndi yakulwa, alino yakunula umwanaci asenzile indilwa, nga ni ndilwa iyo yononeka kwaula kumucisa mu musango uli onsi, lyene wiyo uwatamukunula alinzile ukulipa iya wa mwanaci wiyo kulingana nu uputuzi wa cilye.

²³ Lelo ndi umwanaci umwisikulu wacisika, lyene uvunuko ulinzile ukuya wakwe vi: uumi pa uumi,

²⁴ ilinso pa linso, ilino pa lino, ikasa pi kasa,

²⁵ koca pa koca, cilonda pa cilonda, mukwangu pa mukwangu.

²⁶ “Muntu ndi uma muzya wakwe umonsi nanti umwanaci mwi linso cakuti ilita kulola, wene alinzile kuta muzya wiyo aye muntungwa kuti cii ciye malipilo pa kumonona linso.

²⁷ Ndi wamukuula ilino, wene alinzile kuta muzya wiyo aye muntungwa kuti cii ciye malipilo pa kumukuula ilino.

Masunde pamulandu wa nyama ndi yacisa umuntu nanti inyama yuze

²⁸ “Cipambasi ndi watota umuntu nu lupembe, umonsi nanti umwanaci, nga afwa, cipambasi wiyo alinzile kutamwa na mawe mpaka afwe. Ni nyama yakwe cipambasi wiyo mutalya. Lelo umwine wakwe cipambasi wiyo atavunukwa.

²⁹ Lelo cipambasi wiyo ndi wali nu musango wakupuma nga nu mweneco ale yamusoka, lelo wakana kumunyepa, lyene ndi wakoma umuntu ni mpembe, umonsi nanti umwanaci, cipambasi wiyo alinzile kutamwa na mawe mpaka afwe. Nu mwisikulu kwene alinzile ukukomwa.

³⁰ Ndi yamupingula ukulipa, lyene alinzile kulipila impiya zyonsi zikulondwa pakuti apususye umi wakwe.

³¹ Cipambasi wiyo ndi wakoma mulumendo nanti mukazyana, isunde lyonga kwene liomviwe.

³² Cipambasi wiyo ndi wakoma muzya umonsi nanti umwanaci, umweneco wakwe cipambasi wiyo alinzile ukulipa umusambazi wa muzya impiya yakwe siluva kulingana amakumi yatatu, na cipambasi wiyo alinzile kutamwa na mawe mpaka afwe.

³³ “Muntu ndi watupula intupiko pa ciwina, nanti wimba ciwina kwaula kutupikapo, lyene masaye nanti punda ndi waponelamo,

³⁴ umuntu wiyo alinzile kulipila pa citeekwa cico. Alipile impiya ku mwisikulu wa citeekwa cico, lyene pacisila angasenda inyama iyo ifwe.

³⁵ “Cipambasi wa muntu umwi ndi wakoma cipambasi wa muze, antu yaa yaili yakazye cipambasi wino watakoma muze, nga yankane impiya zizyo. Inyama yakwe cipambasi wino watafwa nayo kwene yankane.

³⁶ Lelo ndi camanyike ukuti cipambasi wiyo wakwata musango wakuzanza, lyene umweneco alinzile ukupeela umuze cipambasi muze kuti apyanikizye pa mufwe. Alino pacisila angasenda inyama iyo ifwe.”