Kufuma 20 - Amazwi Yakwe Leza 2013

Amasunde Ikumi

¹ Lyene Leza avwanga amazwi yaa yonsi ati,

² “Nene indi Yawe Leza winu, wino walenzile kuti mufume mu mpanga ya Eguputo, kuko kuno mwali azya.

³ “Mutapepa tuleza tuze suka nene nenga.

⁴ “Mutaipangila tuluwi mu unkolanya wa cintu icili consi ca mwiyulu nanti camu nsi nanti camu manzi pansi ya musili.

⁵ Mutafukamila unkolanya wakwe tuleza nanti kutupepa. Pano ne Yawe Leza winu, nsizumilizya kuti mwapepa tuleza tuze, nupya nkavunuka ana pa maifyo yakwe yaisi, kufika ku nkulo yalenga citatu na yakwe cini, zyakwe yao ampata.

⁶ Lelo nkalanga kutemwa ku nkulo mazimbi zino zyantemwa nu kuyela amasunde yane.

⁷ “Utalumbula izina lyakwe Yawe Leza wako mu mwata wipe. Pano Nene, ne Yawe Leza wako, ndavunuka ali wensi akalumbula izina lyane mu mwata wipe.

⁸ “Waiusya uwanda wi Sabata nu kuusunga nu muzilo.

⁹ Mu manda mutanda waomba imilimo yako yonsi.

¹⁰ Lelo uwanda uwalenga cinimbali wene i Sabata kuli ne Yawe Leza wako. Utaomba umulimo mu wanda uu, wewe nanti ana yako aonsi nanti anaci, nanti aomvi yako aonsi nanti anaci, nanti iviteekwa vyako, nanti mwinamasi wino akaikala mu mikalo yako.

¹¹ “Pano Nene, ne Yawe, naumvile insi, iyulu, na yemba, nga na vyonsi vyayamo mu manda mutanda. Lelo pa wanda uwalenga cinimbali, impuuza. Acino ne Yawe napaatwile nu kupolelela uwanda wi Sabata ukuya uwamuzilo.

¹² “Cindika so na nyoko kuti amanda ya umi wako yavule mu nsi ino ne Yawe Leza wako nkukupeela.

¹³ “Utakoma.

¹⁴ “Utalongozya.

¹⁵ “Utaiya.

¹⁶ “Utatumpwila umuzo.

¹⁷ “Utakumbwa ng'anda ya muzo. Utakumbwa umuci wa muzo, nanti muomvi wakwe umonsi, nanti muomvi wakwe umwanaci, nanti masaye wakwe, nanti punda wakwe, nanti icili consi cino wakwata.”

Antu yazakaza ku ntete

¹⁸ Lino antu yonsi yuvwa kupangalansya, nu kulila kwa ntandala, yalola kumyansya kwa nkuwa ni cunsi pa mwamba, yazakaza ku ntete, yimilila kutali.

¹⁹ Yanena Mose yati, “Wewe ndi wavwanga kunotuli, tumakuvwa. Lelo tuli ni ntete ukuti ndi Leza wavwanga kunotuli, tungafwa.”

²⁰ Lelo Mose aasuka ati, “Mutuvwa intete. Leza wataiza sile kuti amwezye nu kulenga kuti mwamoopa, pakuti mutaifya.”

²¹ Lelo antu yatwalilila kwimilila kutali. Suka sile Mose aliwe apalama kwi kumbi linyome litifi, kuno Leza wali.

Masunde yano yakalanda pavya tuvuwa

²² Lyene Yawe apeela ilamulo kuli Mose kuti akanene aina Izlaeli ati, “Ndakai mwatimuvwa vino Ne Yawe natimvwanga kunomuli ukufuma mwi yulu.

²³ Mutaipangila tuleza twakwe siluva nanti zaabu kuti mwatupepa pamwi nani.

²⁴ Nemo mwankuulila kavuwa kivu apano mwampeelela amawila inu akoca na autandano, imfwele ni mbuzi nga ni ng'ombe zinu. Pa ncende yonsi ino namunena kuti mwampepelapo, apano Nene namaizanga ku kumupolelela.

²⁵ Ndi mwankuulila kavuwa ka mawe, amawe yao mutayawaza. Pano ndi mwayawaza ku cela cakuwazila ale mwakowezya kavuwa kako.

²⁶ Pakuya apa kavuwa kane mutakwelela apa masitepu ukuya papela. Pano ndi mwacita vivyo, mulasyala tupu lino mukukwela pa masitepu yayo.”