Kufuma 2 - Amazwi Yakwe Leza 2013

Kuvyalwa kwakwe Mose

¹ Lyene mu nsita ilya umonsi umwi uwamu mupanda wakwe Levi atwala umwanaci uwamu mupanda kwene ulya wakwe Levi.

² Nga umwanaci wilya asenda indilwa nga aca amuvyalila umwana umonsi. Lino umwanaci walola ukuti umwana umusuma cuze, amufisa pa myezi itatu.

³ Lelo lino camutalila kusunga inkama, umwanaci wilya atoola cimponda icalukwa na matete nga apomelako manenekela kuti amanzi yataingilamo. Alino aikamo umwana wilya, nga aya amufisa mu mpunga zitali mu mbali ya luzi.

⁴ Alino nyinalenzi wa mwana wilya, aimilila katalamukila kuti alole cingacitika ku mwana.

⁵ Lyene pa nsita imwi mukazyana umwana wakwe Falao wilya aya ku luzi ku kufulala. Lino mukazyana wilya akufulala, aomvi yakwe nayo yalyatokela ku cituntu. Lyene mukupumikizya alola cimponda mu mpunga, nga atuma muomvi wakwe umwanaci kuti akalete cimponda cici kunoli.

⁶ Lyene lino watupula alola ukuti muli umwana umonsi, nga auvwila umwana wilya ulanda pamulandu wakuti ala akulila. Alino avwanga ati, “Nanti ciye uli umwana wii uwa Muyebulai.”

⁷ Lyene nyinalenzi wa mwana, kanya, auzya mukazyana umwana wakwe Falao ati, “Uzye ntange mpite nkanene umwanaci umwi Muyebulai kuti aakonsezya umwana wii?”

⁸ Nawe aasuka ati, “Napapata simula, kacite vivyo kwene.” Caleka mukazyana apita aya aiza na nyina mwana.

⁹ Nga umukazyana umwana wakwe Falao anena umwanaci wilya ati, “Senda umwana wii, uwamundelela nu kumonsya, nga nani ndakulipila.” Caleka umwanaci wilya asenda umwana, nga aamulela.

¹⁰ Pacisila, lino umwana wakula, umwanaci wilya amuleta ku mukazyana umwana wakwe Falao. Alino nawe atoola umwana wilya amucita ukuya umwana wakwe umonsi. Aelenganya ati, “Namuzuulwile mu manzi. Caleka namamutemela izina inti a Mose”

Mose wapuukila ku Midyani

¹¹ Lino Mose wakula, uwanda umwi aya ku kutandalila antu yakwe, Ayebulai. Nga alola vino aina Eguputo yakupatikizya Ayebulai ukuomba imilimo ikome. Alola na vino mwina Eguputo akuma Muyebulai, wenga uwamu antu yakwe.

¹² Mose acelecensya monsi, nga lino walola ukuti kusi umuntu nanti umwi akumulola, akoma mwina Eguputo. Alino atoola icala cakwe acizika mu lusenga.

¹³ Uwanda walondelela Mose aswilila ku cifulo icili conga kwene, nga alola aonsi yaili Ayebulai yakulemanila. Alino Mose auzya wino uwasonsile muze ati, “Uzye pacani cino ukuma Muyebulai muzo?”

¹⁴ Muntu wilya aasuka Mose ati, “Uzye aweni uwakupeela maka akupingula panotuli? Uzye ukulonda unkome wakwe vino wakomile mwina Eguputo wilya?” Lyene Mose auvwa intete, nga aelenganya ati, “Antu yatiyamanya vino nacisile.”

¹⁵ Lino Falao uvwa icacitike, alonda ukukoma Mose. Lelo Mose apuukila ku mpanga ya Midyani akuno aya aikala. Uwanda umwi Mose aikala pansi pipi ni cifula.

¹⁶ Nga alola akazyana cinimbali, ana yakwe Yetulo simapepo waku Midyani, yakwiza. Yene iizile ku kusemba amanzi kuti yazuzye milangu, nga yamwesye imfwele ni mbuzi zyakwe isi.

¹⁷ Lelo aonsi yamwi yakacema yiiza yazinganya akazyana yalya. Lyene Mose ayatasya nga amwesya iviteekwa vyao amanzi.

¹⁸ Lino akazyana yalya yaswilila kwi taalu lyakwe isi, isi ayuzya ati, “Yanamwe, uzye pacani cino ilelo mwawela zuwa?”

¹⁹ Nayo yaasuka yati, “Aonsi yamwi yakacema yali yatuzinganya. Lelo mwina Eguputo umwi wali watutaasya, nupya wali watusembela amanzi, nga wali wamwesya ni viteekwa vitu.”

²⁰ Yetulo auzya ana yakwe ati, “Uzye pacani cino imwamusya umuntu wiyo ku cifula? Swililini mukamwame aize alye cakulya naswe.”

²¹ Caleka Mose azumila ukwikala nayo kuku kwene. Yetulo amupeela Zipola umwana wakwe kuti aye umuci wakwe.

²² Zipola avyalila Mose umwana umonsi. Mose aelenganya ati, “Nene mwinamasi mu mpanga ii.” Caleka atemela umwana wii, izina ati a Gelisyomu.

Ucuzi wa antu yakwe Mose

²³ Lino papita imyaka ivule, umwene wilya waku Eguputo afwa. Lelo aina Izlaeli ala yacili yakucula mu uzya, nga inkuta yao yuvwika kuli Leza.

²⁴ Leza auvwa kuteta kwao, nga atilile upangano wakwe uno wacisile na Abulaamu, na Isaki, na Yakobo.

²⁵ Leza alola ucuzi wa ina Izlaeli, nga asakamala kuti ayazwe.