Kufuma 19 - Amazwi Yakwe Leza 2013

Aina Izlaeli pa Mwamba wa Sinai

¹ Pa wanda wakutandika uwa mwezi wakwe citatu ukufuma lino aina Izlaeli yafumile mu Eguputo, aina Izlaeli iyafika ku Lwanga lwa Sinai.

² Lino yatenuka ukufuma ku Lefidimu, iyafika ku Lwanga lwa Sinai, akuno yakuula insakwe pipi nu mwamba uwa kwene.

³ Lyene Mose akwela mwamba ku kuvwanga na Leza. Alino Yawe avwanga kuli Mose pa mwamba ati, “Nena aina Izlaeli, amu mupanda wakwe Yakobo ukuti

⁴ mwaweni vino nacisile ku ina Eguputo. Nupya mwaweni vino namusenzile wakwe vino cipungu akasenda ana yakwe pa maapa, nga imuleta kuno kunondi.

⁵ Ndakai ndi mumanguvwila nu kusunga upangano wane, lyene mumayanga antu yane pakasi ka mitundu yonsi ya antu. Nanti cingaya ukuti insi yonsi iyakwane, lelo mwemo mulaya antu yane asololwe.

⁶ Mulaya antu akuntumikila wakwe yasimapepo. Mumayanga umutundu wamuzilo. We Mose, yaa ali mazwi yano ulinzile ukunena aina Izlaeli.”

⁷ Caleka Mose aya aama intunguluzi zya ina Izlaeli, nga azinena malamulo yonsi yano Yawe wamunenyile.

⁸ Lyene antu yonsi yaasuka capamwi yati, “Endi, tumacitanga vyonsi vino Yawe watavwanga.”

⁹ Lyene Yawe anena Mose ati, “Namaiza kunuli mwi kumbi linyome pakuti antu iize yayuvwile kuno nkulanda nawe, na pakuti lyene yakutaila amanda pe.” Lyene Mose anena Yawe vino antu yaasuka.

¹⁰ Alino Yawe anena Mose ati, “Yanga kanene antu ukuti ilelo na mutondo yaisangulule nu kuiteyanyizizya ku mapepo. Yene yalinzile ukufula vyakuzwala vyao.

¹¹ Lyene yaiteyanye pa wanda uwalenga yatatu. Pa wanda kwene uwo, ne Yawe indiika pa Mwamba wa Sinai, lino antu yonsi yakulola.

¹² Ukayapangile nande kuzinguluka mwamba kuti yatakaciluke, nga ukayanene ukuti kusi umuntu nanti wenga wakwezya kukwela mwamba nanti kulyata mwisika. Ndi umwi alalyatapo, wene alakomwa.

¹³ Muntu wiyo alinzile kumutama na mawe nanti kumulasa ni nceto kwaula umwi kumukumya. Muntu wensi nanti iviteekwa kwene vilinzile ukukomwa ndi vyacila nande. Lelo lino intandala yalila, antu yalinzile yatumbele ku mwamba.”

¹⁴ Caleka Mose aika pa mwamba anena antu kuisangulula nu kuiteyanyizizya ku mapepo. Alino antu yafula vyakuzwala vyao, nga

¹⁵ nupya Mose ayanena kuiteyanya pa wanda uwalenga yatatu, nu kuti pa nsita ii yatalinzile kumanyana pa musanzi.

¹⁶ Katondo pa wanda uwalenga yatatu kwali kupangalansya nu kumyansya, nga ni kumbi linyome pa mwamba. Kulila kukulu cuze kwa ntandala kuvwika. Antu yonsi pa nsakwe yazakaza ku ntete.

¹⁷ Lyene Mose atungulula antu ukufuma pa nsakwe kuti yalungatane na Leza. Lyene antu yonsi yimilila mwisika ya mwamba.

¹⁸ Mwamba wa Sinai onsi ala watiuvimbwa ni cunsi pamulandu wakuti Yawe ala wataika pansi mu moto pa mwamba papela. Icunsi ciya umwiyulu wa cunsi cino cikafuma mwi lungu, nu mwamba onsi iutenta na maka.

¹⁹ Ciunda ca ntandala cila cikukulilako. Mose avwanga, nga Leza amwaasuka mu kupangalansya.

²⁰ Yawe aika pa Mwamba wa Sinai papela, nga aama Mose kuti aye papela pa mwamba.

²¹ Lyene Yawe amunena ati, “Iika pansi nga usoke antu kuti yataciluka nande ku kwizalola ne Yawe, pano lyene aingi yangafwa.

²² Nanti yasimapepo kwene akupalama pipi na kunondi, suka yatala yaisangulula. Ndi asi vivyo, ndayavunuka.”

²³ Lyene Mose anena Yawe ati, “Antu yatangakwela kuno ku Mwamba wa Sinai pamulandu wakuti wemo wapeezile ilamulo kunotuli kuti tuzilizye mwamba uu, uye uwamuzilo, nu kupanga nande kuzinguluka mwamba.”

²⁴ Lyene Yawe aasuka ati, “Iika pansi nga utoole Aaloni wize nawe kuno. Lelo yasimapepo na antu yatalinzile kuciluka nande kuti iize kunondi. Ndi asi vivyo, ndayavunuka.”

²⁵ Alino Mose aika pansi aya ku antu, nga ayanena vino Yawe watavwanga.