Kufuma 18 - Amazwi Yakwe Leza 2013

Yetulo watandalila Mose

¹ Yetulo, simapepo waku Midyani, sivyala wakwe Mose, auvwa vyonsi vino Yawe Leza wacitile Mose na antu yakwe aina Izlaeli, lino walenzile kuti yafume mu Eguputo.

² Caleka Yetulo aleta Zipola kuli Mose. Zipola wali umuci wakwe Mose, wino wasile ku Midyani.

³ Yetulo waletile Mose ana yaili aonsi yakwe Zipola, Gelisyomu na Elieza. Mose watemile iyeli izina ati Gelisyomu, pano Mose wavwanzile ati, “Nene mwinamasi mu mpanga yawenyi.” Acino atemela umwana wenga izina ati a Gelisyomu.

⁴ Nupya wavwanzile ati, “Leza wakwe tata awino wangazwilizye nupya uwa ntuuzile ku lupanga lwakwe Falao.” Caleka atemela umwana wakwe ciili izina ati a Elieza.

⁵ Yetulo, sivyala wakwe Mose, aletela Mose umuci na ana yakwe aonsi yaili mu lwanga, ku ncende kuno Mose wakuuzile insakwe pa mwamba wakwe Leza.

⁶ Yetulo atuma umuntu umwi kuli Mose ku kumunena vino yene yali umu nzila yakwiza.

⁷ Caleka Mose akomenkanya sivyala, afukama pansi, nga amutonsola. Lyene yalamukana nu kuuzyanya mutende. Alino yaya yingila mwi taalu.

⁸ Lyene Mose alondolwela Yetulo vyonsi vino Yawe wacisile kuli Falao nu ku ina Eguputo, pakuti apususye aina Izlaeli. Nupya amulondolwela vino Yawe wayazwilizye mu ucuzi wao onsi, na vyonsi vino Yawe wacisile pa kuyatuula.

⁹ Lino Yetulo uvwa vyonsi vii, atemwa cuze pamulandu wa milimo isuma ino Yawe wacitile aina Izlaeli pa kuyatuula ku ina Eguputo.

¹⁰ Lyene Yetulo avwanga ati, “Lumbanyini Yawe wino wamutuuzile ku ina Eguputo na kuli Falao. Lumbanyini Yawe wino watuuzile antu yakwe ali mu uzya mu Eguputo.

¹¹ Ndakai namanya ukuti Yawe umukulu cuze ukuluta tuleza tuze tonsi tuno antu yakapepa, pamulandu wakuti wene watuuzile antu yakwe lino aina Eguputo yacitile aina Izlaeli umunyambo.”

¹² Lyene Yetulo aleta uwila wakoca nga na mawila yauze akupeela impolela kuli Leza. Nga Aaloni ni ntunguluzi zya ina Izlaeli zipita nawe pa manso yakwe Leza, ku kulya cimulo pamwi na Yetulo sivyala wakwe Mose.

Mose wasolola yakapingula ya milandu

¹³ Uwanda walondelelapo, Mose atandika kupingula imilandu pakasi ka antu. Antu yaleta imilandu kuli Mose ukufuma katondo mpaka na manguzi.

¹⁴ Lino Yetulo walola vyonsi vino Mose wacitanga auzya Mose ati, “Uzye pacani cino ukucita cii ku antu? Uzye pacani cino ukuomba mulimo uu wenga, na antu yakwiza kunuli ukufuma katondo mpaka manguzi?”

¹⁵ Mose aasuka ati, “Ndinzile ukucita vikwene pamulandu wakuti antu yakaiza kunondi kuti yuvwe vino Leza akulonda.

¹⁶ Antu yaili ndi yapusana yakaiza kunondi njapingula nu kulola uwataponga nga aweni. Nupya namayanenanga malamulo na masunde yakwe Leza.”

¹⁷ Lyene Yetulo, sivyala wakwe Mose avwanga ati, “Utakuomba ningo foo.

¹⁸ Umatontanga zuwa pamwi na antu yako kwene. Milimo kwene ii, ikulu kuluta maka yako, nupya utangaomba wenga.

¹⁹ Ndakai leka nkupande amano yasuma, nupya Leza amaya nawe. Wemo cazipa waimilila antu ku manso yakwe Leza, nupya kuli Leza akuno watwala imilandu yakupusana kwao.

²⁰ Ulinzile kusambilizya antu malamulo na masunde yakwe Leza, nu kuyalondolwela vino yalinzile ukwikala na vino yalinzile ukucita.

²¹ Lelo kulunda pali vii, ulinzile kusola aonsi yamwi ampomvu nu kuyasonta kuti yaye wa ntunguluzi zya antu. Mu musango uu, intunguluzi zya antu mazimbi, na yamwi antu imyanda, na yamwi antu amakumi yasano, na yamwi antu ikumi. Yalinzile ukuya antu akaopa Leza. Yalinzile ukuya atailwe nupya atangazumilizya mafukakanwa.

²² Leka yaa yapingula imilandu amanda yonsi. Yangaleta sile imilandu ikome kunuli. Lelo tumilandu tunono aliyo yapingula. Mu musango uu, utalaombesya ndi waleka kuti yakwazwa.

²³ Wemo ndi wacita vyonsi vii wakwe vino Leza watapela ilamulo, usiitonta nupya antu yonsi yaa yamaswilila kumwao ala imilandu yatisila.”

²⁴ Mose azumila vyonsi vino Yetulo wamupanzya amano.

²⁵ Alino asolola antu ampomvu mu ina Izlaeli nu kuyasonta kuti yaye intunguluzi zya antu. Mu musango uu, intunguluzi zya antu mazimbi, na zimwi zya antu imyanda, na zimwi zya antu amakumi yasano, na zimwi zya antu ikumi.

²⁶ Intunguluzi zii zyapingulanga antu amanda pe. Imilandu ikome itupu iyatwala kuli Mose, lelo tumilandu tunono aliyo yapingulanga.

²⁷ Lyene Mose iyapakasyanya na Yetulo, nga Yetulo aswilila ukwakwe.