Kufuma 17 - Amazwi Yakwe Leza 2013

Amanzi yafuma mwi we

¹ Iuvi lyonsi lya ina Izlaeli ilitenuka ilifuma mu Lwanga lwa Sinai. Lyacitanga pano likala, ilica lifumapo kulingana ni lamulo lyakwe Yawe. Alino iyaya yakuula insakwe ku Lefidimu, lelo kuku kutali amanzi yakumwa.

² Caleka yailizyanya kuli Mose yati, “Tupele amanzi yakumwa.” Mose avwanga ati, “Uzye pacani cino mukuilizyanya? Uzye pacani cino mukwezya Yawe?”

³ Lelo antu yali nu lusala cuze nga yatwalilila kuilizyanya kuli Mose yati, “Uzye pacani cino watufumizye mu Eguputo? Uzye walondanga kuti utukome nu lusala, sweswe, ana itu, nga ni viteekwa vitu vwile?”

⁴ Lyene Mose apepa kuli Yawe, apunda ati, “Uzye namacita cani na antu yaa? Yakulonda yantame na mawe.”

⁵ Lyene Yawe anena Mose ati, “Tola intunguluzi zimwi zya ina Izlaeli, nga mukolelele antu yonsi. Pa kupita usende intuwa ino uumile pa manzi mu Luzi lwa Nailo.

⁶ Ulanzana njimi pa ciliwe pa Mwamba wa Holebu. Ukuume intuwa pa ciliwe, alino amanzi yalafuma mu ciliwe kuti antu yamwe.” Mose acita wakwe vino Yawe wamunenyile, pa manso ya ntunguluzi zya ina Izlaeli.

⁷ Cifulo cici yacitemela izina yati Masaa na Meliba (Kuli kuti Amezyo nu kuilizyanya) pamulandu wakuti aina Izlaeli yailizyanyizye kuli Mose nu kwezya Yawe lino yuzizye yati, “Uzye Yawe ali naswe nanti foo?”

Inkondo pakasi ka ina Izlaeli na Ina Amaleke

⁸ Lyene aina Amaleke iyiza yazanza aina Izlaeli ku Lefidimu.

⁹ Mose apeela ilamulo kuli Yoswa ati, “Solola aonsi yamwi kuti yace yakalwe na ina Amaleke mutondo. Nemo ndimilila pa mwamba papeela, ale natintumpula intuwa ino Leza wanenyile kusenda.”

¹⁰ Alino Yoswa acita wakwe vino Mose wamupeezile ilamulo. Uwanda walondelela Yoswa na antu yano wasolwile yapita ku kulwa inkondo na ina Amaleke. Pa nsita ili yonga kwene Mose, Aaloni nga na Huli yakwela pa mwamba papela.

¹¹ Walanga kula Mose watumpula makasa yakwe papela, aina Izlaeli yacimvya mu nkondo. Lelo ndi wawisya makasa yakwe aina Amaleke iyatandika kucimvya.

¹² Lino Mose watonta kutumpula makasa yakwe, Aaloni na Huli yaleta iwe kuti aikalepo, nga yaa oili iimilila mu mbali yakwe Mose, umwi kuu nu muze kuu, ala yalemelile makasa yakwe Mose. Yalemelela kufika nu ku kuwa kwi lanzi.

¹³ Mu musango kwene uu Yoswa acimvya aina Amaleke.

¹⁴ Lyene Yawe anena Mose ati, “Lemba vintu vii mu lupapulo kuti vikiusiwe, nupya unene Yoswa ukuti ndonona nu kulovya aina Amaleke yonsi pyu.”

¹⁵ Lyene Mose akuula kavuwa nu kukatemela izina ati, “Yawe ali luunga lwane.”

¹⁶ Avwanga ati, “Katusini papela luunga lwakwe Yawe! Yawe amatwalilila kutulwila inkondo pakasi kitu na ina Amaleke amanda pe!”