Kufuma 15 - Amazwi Yakwe Leza 2013

Ulwimbo lwakwe Mose na Milyamu

¹ Lyene Mose na ina Izlaeli yimbila lwimbo lu kuli Yawe yati, “Kanimbile lwimbo kuli Yawe, pamulandu wakuti watacimvya mu lulumbi, imfwalasi na antu akwezilepo watayavwintila muli yemba.

² Yawe akalenga kuti inje na maka, ali wino wampususya ku anisi yane. Wene ali Leza wane, wino namalumbanyanga, Leza wino tata wapepanga, nupya namamucindikanga.

³ Yawe akoline ni cita, izina lyakwe a Yawe.

⁴ Wavwintile vita vya ina Eguputo na maceleta yao muli yemba, na yamusika yaviko ampomvu yamwelile muli Yemba Muyenzu.

⁵ Yemba muzike wayatuwizye yonsi, yatuwila kufika na pansi pansi ngati amawe.

⁶ “Iye we Yawe, ikasa lyako lilunji ilya ulamba wakoofya, lyene likavungola umwanisi wako.

⁷ Watuzana umucinzi ukulu cuze pakucimvya anisi yako nu kuyonona yonsi. Ukali wako ukaaka ngati cimbilimbili ca moto, nupya anisi yako ukayoca ngati insaawa.

⁸ Lino waputa umupu wako pali yemba amanzi iimilila, amanzi iimilila ukuya mupela ngati lung'umba. Iziya lizike lyakwe yemba likoma liya na ndi kufika na pansi pansi.

⁹ Umwanisi wako aisomba ati, ‘Namayalondelela lunkwalunkwa nu kuyalema. Namaankanya icuma cao, nu kutoola vyonsi vino nkulonda. Namasomola lupanga lwane nu kusenda vyonsi vino yakwata,’

¹⁰ Lelo we Yawe uputa umupu lyonga sile na aina Eguputo yamwela, iyatuwila yatotomela ngati mutovwe yaya pansi pansi.

¹¹ “We Yawe, uzye aweni muli tuleza angaya wakwe wewe? Kusi umwi munoyali angakolana nawe. Kusi umwi uwakwata maka avule cuze ukuluta wewe. Antu yonsi yakakoopa nupya yakakulumbanya pano kusi umwi angacita vizungusyo ivikulu wakwe wewe.

¹² Wemo wakonzolwile ikasa lyako lilunji, nga insi imila anisi yako.

¹³ Watutungulula antu yako yano wapuswisye ku anisi yao mu lukundo lwako ulusikaoka. Ku maka yako wayatungulula ku mpanga yamuzilo.

¹⁴ Antu amu nko zyuze yatiyuvwa pali cii, nga yazakaza ku ntete. Intete zikulu cuze zyalema aina Filisti.

¹⁵ Ndakai intunguluzi zyamu mpanga ya Edomu zyatizisakamikwa. Intunguluzi zyamu mpanga ya Moabu zyatizitandika kuzakaza. Antu yonsi amu mpanga ya Kenani iciyaputula umusana.

¹⁶ Intete zikulu cuze yonsi zyatiziyalema Yene yalola amaka yako wene Yawe nga iyapeziwa amano ku ntete. Yene yikala sile cele mpaka antu yako yapuzya, antu yano wakulwile mu uzya.

¹⁷ We, Yawe, ulingizya antu yako mukasi nu kuleka yikale pa mwamba wako, pa cifulo cino wasolola ukwikala penepo we mwisikulu, ili ng'anda yako yamuzilo, ino we Yawe waikuulila na makasa yako.

¹⁸ We, Yawe wewe mwene amanda pe.”

Milyamu wimbila ulwimbo

¹⁹ Aina Izlaeli yalamvile yemba pa musili uume. Lelo lino maceleta ya ina Eguputo ni mfwalasi na antu pansi iingile kuti yalambe yemba, Yawe alenga kuti amanzi yaswilile, na yonsi yamwela.

²⁰ Milyamu kasema, kaci wakwe Aaloni watozile kangoma nga anaci yonsi aina Izlaeli yamulondelela pacisila ala yakulizya tungoma twao yakucina.

²¹ Nga Milyamu aimbila lwimbo kunoyali ati, “Imbini kuli Yawe, pamulandu wakuti watacimvya ulwi, watasumbila imfwalasi na antu akwezilepo muli yemba.”

Amanzi alule

²² Lyene Mose apeela ilamulo ku ina Izlaeli kuti yafume kuli Yemba Muyenzu, alino ayatungulula mu Lwanga lwa Syuli. Mu lwanga iyapita amanda yatatu, lelo kwaula kuzana amanzi.

²³ Lino yafika pa cifulo ci zina lyakuti Mala iyazana amanzi, lelo ala alule cakuti muntu atangamwa. Acino yatemela cifulo cici yati, Mala.

²⁴ Antu yailizyanya kuli Mose nga yamuzya yati, “Uzye ndakai tumamwa cani?”

²⁵ Mose apapata kuli Yawe, alino Yawe amulanga kamuti. Mose atoola kamuti akasumbila mu manzi, na manzi yaluluka. Kuku kwene akuno Yawe ayapeela amasunde akuti yalondela mu wikazi wao. Yawe ayezya kuti alole ndi yangayela amasunde yakwe.

²⁶ Lyene Yawe avwanga ati, “Ndi mukanguvwila ne Yawe, Leza winu nu kucita vyawololoke, nga nu kuyela malamulo yane, lyene ntalalenga kuti mulwale zyandwala ndi zino naponyezizye aina Eguputo. Nene indi Yawe, wino akamupozya.”

²⁷ Ukufuma ku Mala iyaya ku Elimu kuko kuno yazanyile tufukoka twa manzi ikumi na twiili nga nu tuncindu amakumi cinimbali, lyene iyakuula insakwe mu pipi na manzi.