Kufuma 14 - Amazwi Yakwe Leza 2013

Aina Izlaeli yalamba Yemba Muyenzu

¹ Lyene Yawe anena Mose ati,

² “Nena aina Izlaeli ukuti yalinzile kusenuka nu kuya kuula insakwe pa nkolelo ya musumba Pi Hailoti, uwaya pakasi ka musumba Migidoli na Yemba Muyenzu pipi nu musumba Baali Zefoni.

³ Falao wilya alelenganya ukuti aina Izlaeli yakululumba sile mu mpanga nupya ulwanga lwatilulenga kuti yataya ku ufumondaka.

⁴ Ndalenga Falao kuti akome umwenzo, nupya alamulondelela kuti aezye kumulema. Lelo vino ndacita kunoli nu ku vita vyakwe, vilalenga kuti antu yancindike. Lyene aina Eguputo yalamanya ukuti nene indi Yawe.” Aina Izlaeli iyayela amazwi yakwe Yawe nga yaya yakuula insakwe kuno wayanenyile.

⁵ Lino umwene waku Eguputo uvwa ukuti aina Izlaeli yatiyapuuka, Falao pamwi na yacilolo yakwe yasenula amano yavwanga yati, “Uzye vino twacita asi kuli kutumpa? Twaleka aina Izlaeli yapuuka, na azya yaa tutalatala tuyalole nupya!”

⁶ Acino Falao anena akuti yamuteyanyizizye celeta lya kuila ku ulwi nga anena ni vita vyakwe kuti vipite nawe.

⁷ Atoola maceleta yakwe yonsi amu Eguputo, pamwi na maceleta imyanda mutanda yano yali ampomvu. Cila celeta lyakweti musika wino wangalilanga celeta lilyo.

⁸ Yawe aleka Falao umwene waku Eguputo kuti akome umwenzo, cakuti alondelela aina Izlaeli lunkwalunkwa, yano afumanga mu mpanga ilya nu kupama.

⁹ Vita vyakwe Falao umwene waku Eguputo, ivyali pa mfwalasi, ivita vino vyali pansi, yalondelela aina Izlaeli lunkwalunkwa nga yaya yayazana lwa pano yakuuzile insakwe mu nkumba yakwe Yemba Muyenzu, pipi na Pi Hailoti na Baali Zefoni.

¹⁰ Lino aina Izlaeli yalola Falao ni vita vyakwe yafika pipi, yuvwa intete nga yapunda yati, “Yawe, twapapata tutuule!”

¹¹ Yanena Mose yati, “Uzye watuleta kuti twize tufwile muno mu lwanga vwile? Uzye pamulandu wakuti mu Eguputo mutali incende ikulu ya malindi? Lola lyene vino wacita pa kutufumya mu Eguputo.

¹² Uzye tutakunenyile lino tutali tufume ukuti vii vingacitika? Twakunenyile ukuti utuleke sweisikulu tutwalilile ukuya azya ya ina Eguputo. Cange cituzipile ukuya azya kuku ukuluta kufwila muno mu lwanga.”

¹³ Mose aasuka ati, “Awe mutoopa! Posyini, mumalola vino Yawe amacita ilelo pakuti atutuule, mutalatala mulole aina Eguputo yaa nupya.

¹⁴ Yawe aliwe amamulwila ulwi. Mwemo mwikale sile myaa.”

¹⁵ Yawe anena Mose ati, “Uzye pacani cino mukulu kupunda kunondi kuti mwazwe? Nena aina Izlaeli yomolole insakwe yatwalilile ulendo.

¹⁶ Katusya intuwa yako ukonzolole ikasa lyako pali yemba. Amanzi yamapaatukana yaye kuu na kuu pakuti yapeele inzila ku ina Izlaeli kuti yapite mwenemo pa musili uume.

¹⁷ Ndalenga aina Eguputo kuti yakome imyenzo cuze cakuti yalalondelela aina Izlaeli. Lulumbi lulapelwa kunondi pakucimvya Falao ni vita vyakwe vyamu maceleta kumwi ni vya pa mfwalasi.

¹⁸ Lino ndacimvya vita vyao, alino aina Eguputo yalamanya ukuti Nene indi Yawe.”

¹⁹ Lyene mungeli wakwe Leza, wino wali ku nkolelo ya vita vya ina Izlaeli afumako aiza kucisila cao, ni kumbi kwene lifuma ku nkolelo liiza ku cisila cao.

²⁰ Liya pakasi ka ina Eguputo na aina Izlaeli. Ikumbi ilipela imfinzi. Cii cilenga kuti vita vitalolana usiku onsi.

Aina Izlaeli yalamba yemba pa musili uume

²¹ Lyene Mose akonzolola ikasa lyakwe pali yemba, alino Yawe alenga kuti muza upunge ukufuma ku ufumondaka. Muza upunga usiku onsi nu kulenga kuti amanzi yapaatukane cakuti musili uume uloleka pali yemba. Amanzi yapaatukana kuu na kuu,

²² nga aina Izlaeli yapita mwenemo pa musili uume.

²³ Ivita ivya ina Eguputo vyonsi ivyali mu maceleta na pa mfwalasi vilondelela aina Izlaeli lunkwalunkwa muli yemba pakasi.

²⁴ Ku macaca Yawe wino wali mwi kumbi nu mu cimbilimbili ca moto alolekesya pa vita vya ina Eguputo, alenga kuti yuvwe intete nga yalonda kupuuka.

²⁵ Yawe alenga kuti mipeto ya maceleta yao isokozoke, cakuti iyapita panono panono. Aina Eguputo yavwanzyanya yati, “Yawe akulwila aina Izlaeli yaa. Acino lekini tuutuke ukufuma kunoyali.”

²⁶ Yawe anena Mose ati, “Konzolola ikasa lyako usonte intuwa yako pali yemba, pakuti amanzi yaswilile nu kulenga kuti aina Eguputo ali mu maceleta, na ali pa mfwalasi, na ali pansi yonsi yamwele.”

²⁷ Caleka Mose akonzolola ikasa lyakwe pali yemba. Lino ilanzi lyatunka yemba aswilila vino wali. Aina Eguputo yezya kuti yapuuke amanzi, lelo Yawe aleka yaswilila muli yemba pakasi.

²⁸ Amanzi yaswilila nu kutuwizya maceleta ni vita ivya pa mfwalasi, ivita vyonsi vya ina Eguputo yano alondelelanga aina Izlaeli, muli yemba. Kutali nanti wenga wino wapuswike.

²⁹ Lelo aina Izlaeli yalamba yemba pa musili uume ala amanzi yatiyapaatukana mbali ziili wa lung'umba kuu na kuu.

³⁰ Pa wanda ulya Yawe atuula aina Izlaeli ku ina Eguputo. Aina Izlaeli yalola vyala vikwelela mu mbali yakwe yemba.

³¹ Lino aina Izlaeli yalola maka yano Yawe waomvya pa kucimvya aina Eguputo, iyatandika koopa Yawe. Pali cii aina Izlaeli yataila Yawe na Mose muomvi wakwe.