Kufuma 13 - Amazwi Yakwe Leza 2013

Kupaatwila Yawe umwana wi yeli umonsi

¹ Yawe anena Mose ati,

² “Mwampaatwila ana yonsi mayeli aonsi. Mu ina Izlaeli umwana wensi umonsi wi yeli, umwana wa muntu nanti umwana wensi wa nyama uwakwane.”

Cimulo ca Mukate usi na Citutumusi

³ Mose anena antu ati, “Lyonsi mwaiusya uwanda uu. Uli wanda uno mwafumile mu Eguputo, ku cifulo cino mwali azya. Uu uli wanda uno Yawe waomvizye maka yakwe pa kumufumya kuku. Caleka mutalinzile ukulya umukate umuli icitutumusi.

⁴ Mukufuma mu mpanga ya Eguputo pa wanda uu mu mwezi wakutandika, umwezi wakwe Abibu

⁵ Yawe umwisikulu walavile nu mulapo ku vikolwe vinu kumupeela impanga ya ina Kenani, Hiti, Amoli, Hivi, nga na aina Yebusi. Lino alamwingizya mu mpanga ilya ya ukama nupya ivunde, mulinzile kuzevya cimulo ci mu mwezi wakutandika cila mwaka.

⁶ Pa manda cinimbali mulinzile ukulya umukate usi na citutumusi, nga pa wanda kwene uwalenga cinimbali paye cimulo ca kucindika Yawe.

⁷ Pa manda cinimbali mutalinzile ukulya umukate umuli icitutumusi. Mu mpanga inu yonsi mutalinzile ukuya icitutumusi nanti umukate umuli icitutumusi.

⁸ Lino insita yakuzevya cimulo yafika, mwalondolwela ana inu ukuti mukacita cii pamulandu wakwe cino Yawe wamucitile lino mwafumile mu Eguputo.

⁹ Lutambi kwene lu lulaya wa cimanyililo cino canyepelelwa kwi kasa nanti wa ciusizyo icanyepelelwa pa mpumi zinu wa mupango. Mu musango kwene uu mulasunda yauze vyamu usambilizyo wakwe Yawe, pano aliwe wamufumizye mu Eguputo ku maka yakwe akulu.

¹⁰ Mwasunga isunde lii pa nsita ili yonga kwene cila mwaka.

Kupaatwila Yawe ana mayeli aonsi

¹¹ “Yawe alalenga kuti mwingile mu mpanga ya Kenani ino walavile nu mulapo kunomuli nga nu ku vikolwe vinu. Lino alapeela mpanga ilya kunomuli,

¹² Mulinzile kupaatwila Yawe ana yonsi mayeli aonsi. Maeli ya nyama zinu yonsi nayo kwene mwayapaatwila kuli Yawe. Vyonsi vii ivyakwe Yawe.

¹³ Lelo pali mwana punda mulinzile kupyanikizyapo umwana wa mfwele. Ndi mutakulonda kupyanikizyapo, mutola mwana punda imumuvuna insingo.

¹⁴ “Mu manda akwiza, ana inu yalamuzya yati, ‘Uzye cii cikusenula cani?’ Mulayaasuka muti, ‘Pakuti tufume mu Eguputo kuko kuno twali mu uzya, Yawe waomvizye maka yakwe akulu.

¹⁵ Lino Falao wakomile umwenzo nu kukana kuti tufume mu mpanga yakwe, Yawe walenzile kuti ana mayeli ya antu na a nyama yafwe mu mpanga yonsi ya Eguputo. Uli mulandu uno tukapeela impolelwa kuli Yawe inyama zya kalume mayeli. Lelo mayeli itu aonsi tukayakulula.’

¹⁶ Lutambi lu lulaya wa ciusizyo kunotuli, lulaya wa cimanyililo icanyepelelwa ku makasa itu nanti icanyepelelwa pa mpumi zitu wa mupango, cakutwiusya ukuti Yawe watufumizye mu Eguputo ku maka yakwe akulu.”

Ikumbi ni cimbilimbili ca moto

¹⁷ Lino Falao wazumilizya aina Izlaeli kuti yapite, Leza atayazumilizye kuti yapite ku museo uwapita ku nkumba yakwe yemba, uno waya ku mpanga ya Filisti nanti angala wali umuseo uwipi. Leza aelenganya kuti, “Anisi yao ndi yayazanza, antu yaa yangasenula amano nu kuswilila ku Eguputo.”

¹⁸ Lelo Leza alenga antu kuti yazinguluke ku museo uwapita ku lwanga ukuya kuli Yemba Muyenzu. Aina Izlaeli yali aipangasye pa kufuma mu Eguputo.

¹⁹ Mose asenda mafupa yakwe Yosefu wakwe vino Yosefu walenzile kuti aina Izlaeli yalape nu mulapo ukuti yalacita. Yosefu wavwanzile ati, “Lino Leza alamupususya, mulinzile kusenda mafupa yane ukufuma mu mpanga ii.”

²⁰ Aina Izlaeli iyafuma ku Sukoti nga iyaya yakuula insakwe ku Etamu mu mbali ya lwanga.

²¹ Insita ya musanya Yawe wayatungululanga ni kumbi pa kuyalanga inzila. Alino insita ya usiku wayatungululanga ni cimbilimbili ca moto kuyapeela uluswepo. Cii calenzile kuti yangapita ulwendo lwao usiku nu musanya.

²² Ikumbi lyakolelelanga antu insita yonsi ya musanya, cimbilimbili ca moto naco insita ya usiku.