Kufuma 12 - Amazwi Yakwe Leza 2013

Cimulo ca Ucilo

¹ Lyene Yawe avwanga kuli Mose na Aaloni mu Eguputo ati,

² “Umwezi uu ukaya uwakutandika kunondi cila mwaka.

³ Mukonganike aina Izlaeli yonsi muyalondolwele ukuti, pa wanda uwalenga ikumi uwa mwezi kwene uu, cila muntu mu ng'anda yakwe akalondele amu ng'anda yakwe kasuuku nanti kasawe.

⁴ Ndi amu ng'anda yakwe yacepa cakuti yatangalya inyama yonsi, lyene angama mwinipamba mwina Izlaeli kuti yalile pamwi. Mulinzile kulinganya cifwa pa kwaya kuli cila muntu kulingana navino angalya.

⁵ Mulinzile kulonda kana ka mfwele nanti kana ka mbuzi ka mwaka onga akaula ulema.

⁶ Mulinzile kusunga ningo kanyama kako kufika pa wanda uwalenga ikumi na yani uwamu mwezi kwene uu. Manguzi ya wanda kwene uwo aina Izlaeli yalakongana nu kufyula twasuku nanti twasawe twao.

⁷ Lyene mu ng'anda muno yalaliila inyama yace yatole uwazi umwi uwa nyama nu kupaka ku meema na pali pungwe wa ng'anda.

⁸ Usiku wa wanda ulya yace yoce inyama, yalye nga nu mukate usi na citutumusi pamwi nu musalu ulule.

⁹ Mutaca mulye inyama iisi nanti iyeleke, lelo muce mulye iyoce yonsi kumwi nu mutwe, amakulu nga na vyonsi vya munda.

¹⁰ Mutalinzile kusya nanti cimwi kuti cifike katondo. Ndi cimwi casyala mulinzile kucoca.

¹¹ Lino mulalya muce mucite vii. Muce munyepe mingila inu ni misipi inu mu misana. Muce muzwale ndyatu zinu ku ngazo. Muce muleme intuwa zinu mu minwe, nga pakulya muce mulye zuwazuwa. Cimulo cii ca Ucilo icakucindika Nene ne Yawe.

¹² “Pa wanda ulya usiku ndasalala mu mpanga ya Eguputo nu kukoma umwana wi yeli wensi umonsi. Iyeli lya muntu nga ni yeli lya nyama kwene ndakoma. Ndavunuka tuleza tonsi twamu Eguputo. Nene indi Yawe.

¹³ Uwazi wa pa meema cilaya cili cimanyililo cakulangilila mang'anda muno mwe ina Izlaeli mukaikala. Lino ndavunuka aina Eguputo, ndi nalola uwazi pa meema ndacilila ng'anda iyo, nga ni mpungo italapona panomuli kuti imonone.

¹⁴ Uwanda uu, uwa ciusizyo. Mulinzile kuzevya pa wanda wakucindikilapo Nene ne Yawe. Mwazevya uwanda uu mu mikulo inu yonsi.”

Cimulo ca Mukate usi na Citutumusi

¹⁵ Lyene Yawe avwanga ati, “Pa manda cinimbali mutalinzile ukulya umukate umuli icitutumusi. Mulinzile ukulya sile umukate usi na citutumusi. Pa wanda wakutandika wa manda cinimbali mulinzile kufumya icitutumusi mu mang'anda inu. Pano ndi umwi mu manda cinimbali angalya umukate umuli icitutumusi, wene alinzile kusukulwa mu antu yane.

¹⁶ Pa wanda wakutandika, nga na pa wanda uwalenga cinimbali, mulinzile kukongana ku kupepa. Mutalinzile ukuomba mulimo nanti umwi pa manda yao, lelo ivyakulya vyene mungateyanya.

¹⁷ Mwaiusya uwanda wa cimulo cii, pamulandu wakuti pa wanda kwene uu apano nafumizye imitundu inu mu Eguputo. Caleka mikulo yonsi ilinzile kuzevya uwanda uu.

¹⁸ Ukufuma manguzi ya wanda uwalenga ikumi na yani mu mwezi wakutandika kufika ku manguzi ya wanda uwalenga amakumi yaili na onga uwa mwezi kwene uwo, mutalinzile ukulya umukate umuli icitutumusi.

¹⁹ Pa manda cinimbali mu mang'anda inu mutalinzile kuzanwa icitutumusi. Pano ndi umwi, wino wavyalilwa munomuli nanti mwinamasi, walya umukate umuli icitutumusi, wene alinzile kusukulwa mu antu yane.”

²⁰ Mutalinzile ukulya icili consi umuli icitutumusi, nupya mu mang'anda inu mwalya sile umukate usi na citutumusi.

Kuzevya kwa Cimulo ca Ucilo Cakutandika

²¹ Lyene Mose aama intunguluzi zyonsi zya ina Izlaeli nga azinena ati, “Muntu wensi ali ni ng'anda alinzile kusolola kana ka mfwele nanti kana ka mbuzi ka kufyula pakuti amu ng'anda yakwe yangazevya Cimulo ca Ucilo.

²² Mukatole kamusambo kakwe isopu mukatimpike mu lweso lwa wazi wa nyama, alino mukapake uwazi umwi ku meema na pali pungwe wa ng'anda inu. Muntu nanti wenga atakafume mu ng'anda kufika katondo.

²³ Lino Yawe alasalala mu mpanga ya Eguputo kulenga kuti aina Eguputo yafwe, alalola uwazi ku meema na pali pungwe wa ng'anda inu. Cii cilalenga kuti Yawe atazumilizya mungeli mononyi kuti aingile mu mang'anda inu ku kulenga kuti mufwe.

²⁴ Manda pe mwemwe pamwi na ana inu mulinzile kuyela malamulo yaa akuzevya cimulo cii.

²⁵ Lino mulingila mu mpanga ino Yawe walaya kumupeela, mulinzile lyonsi mwaiusya ukucita lutambi lu.

²⁶ Lino ana inu yalamuzya yati, ‘Uzye kuzevya ku kukasenula cani?’

²⁷ Muce mwasuke muti, ‘Cii, impolelwa ya Cimulo ca Ucilo ca kucindika Yawe, pamulandu wakuti wacilile mang'anda ya ina Izlaeli mu Eguputo, lino wakomile aina Eguputo lelo asya amu ng'anda zitu.’ ” Lyene intunguluzi zya ina Izlaeli zifukama nga zipepa Yawe.

²⁸ Lyene aina Izlaeli yaya yacita wakwe vino Yawe wapeezile ilamulo kuli Mose na Aaloni kuti yacite.

Imfwa ya mayeli

²⁹ Usiku pakasi Yawe alenga kuti ana mayeli yonsi aonsi amu Eguputo yafwe. Kutandikila ku mwana umonsi iyeli lyakwe Falao, wino wali nu kupyana cilimba ca wene, kufika nu ku mwana umonsi iyeli lya munyepwe wino ali mu ng'anda yaminyololo. Nga na ana mayeli a nyama nayo kwene alenga kuti yakomwe.

³⁰ Usiku pakasi Falao, yacilolo yakwe na antu yonsi aina Eguputo iyazyuka. Antu yonsi aina Eguputo yakatusya impoma, pamulandu wakuti mu ng'anda yonsi mwali icitumbi ca mwana umonsi iyeli.

³¹ Usiku kwene wa wanda ulya Falao, atuma akuya ama Mose na Aaloni nga aiza ayanena ati, “Pitangini, mwemwe na aina Izlaeli! Mufume mu mpanga yane, mwapita mukapepe Yawe wakwe vino mwandenzile.

³² Musende imfwele zinu, imbuzi, ni ng'ombe mwapita. Nupya nani kwene mundengele upolelelo.”

³³ Aina Eguputo yacincizya aina Izlaeli kuti yakalauke ukufuma mu Eguputo yati, “Mumaleka tufwe ndi mutapisile!”

³⁴ Caleka aina Izlaeli yatoola usu wa ngano yika mu ngeso, nga yakandila. Lelo yatatikinkinye icitutumusi mu munya kuti utatutumuka. Yatola umunya yika muno yakapangila umukate alino yapomba mu nsalu zyao nga yasenda pa viye.

³⁵ Aina Izlaeli iyacita wakwe vino Mose wavwanzile. Iyalenga aina Eguputo viyembelo vino vyapangilwa na zaabu na siluva nga ni vyakuzwala.

³⁶ Yawe aleka kuti aina Eguputo yacindike aina Izlaeli pakuyapeela vyonsi vino yayalenzile. Mu nzila ii aina Izlaeli yasenzile icuma ca ina Eguputo.

Aina Izlaeli yafuma mu Eguputo

³⁷ Aina Izlaeli yakatuka ulendo ukufuma ku musumba wa Lamesesi ukuya ku musumba wa Sukoti. Aonsi apenzilwe yali manye 600,000, kufumyako anaci na ana.

³⁸ Impendwa ikulu ya antu yauze, nga ni mfwele, imbuzi nga ni ng'ombe zingi yapita navyo.

³⁹ Iyapanga makeke asi na citutumusi ku munya uno yafumile nao ku Eguputo, pano yayapamvizye cakuti yatakweti insita yakuteyanya ivyakulya nanti kuteyanya umunya umuli icitutumusi.

⁴⁰ Aina Izlaeli yatenzi mu Eguputo imyaka 430.

⁴¹ Pa wanda uno imyaka 430 yasizile, ukufuma lino aina Izlaeli ingile mu Eguputo, imitundu yonsi ya antu yakwe Yawe ifuma mu Eguputo.

⁴² Mu usiku wa wanda kwene ulya alino Yawe wacesizye nu kuyatungulula pa kuyafumya mu Eguputo. Acino usiku wa wanda uu Yawe waipaatwila ku nkulo zyonsi. Usiku wa wanda uu aina Izlaeli yonsi yakacesya pa kucindika Yawe.

Amalamulo ya Cimulo ca Ucilo

⁴³ Lyene Yawe anena Mose na Aaloni ati, “Malamulo ya Cimulo ca Ucilo aeya: Kusi mwinamasi umwi wakulya cakulya ca Cimulo ca Ucilo,

⁴⁴ lelo muzya wensi wino mwakala ndi mwamusilamula angalya.

⁴⁵ Mulendo nanti muomvi winu atalya.

⁴⁶ Mulinzile kuliila vilyo vyonsi mu ng'anda ino vyateyanyiziwa. Kusi cilyo cimwi cakufumizya panzi. Nupya kusi kuvuna ifupa nanti lyonga lya nyama iyo.

⁴⁷ Aina Izlaeli yonsi yalinzile kuzevya cimulo cii.

⁴⁸ Lelo umonsi wino atasilamulwa atangalya. Ndi cakuti mwinamasi umwi wiza wikala munomuli akulonda kuzevya Cimulo ca Ucilo ca kucindika Yawe, mulinzile mutale musilamule ana aonsi amu ng'anda yakwe yonsi. Lyene mungamutola aye wa mwina Izlaeli nu kuzevya nawe cimulo cico.

⁴⁹ Malamulo ali onga kwene yaa yalinzile kulondelwa ku ina Izlaeli nga na inamasi yano aikala pakasi kinu.”

⁵⁰ Aina Izlaeli yonsi iyayela malamulo nu kucita wakwe vino Yawe wapeezile ilamulo kuli Mose na Aloni.

⁵¹ Pa wanda kwene ulya Yawe aleka kuti aina Izlaeli yafume mu Eguputo ukulingana ni mitundu yao.