Kufuma 11 - Amazwi Yakwe Leza 2013

Mose walanda imfwa ya mayeli

¹ Nupya Yawe anena Mose ati, “Lyene ndalenga kuti kuye uvunuko onga sile uwakusyalikizya pali Falao na pa ina Eguputo yonsi. Pacisila cakwe cii alamuta mupite. Kulanda mucumi, wene alamuzinga mwensi pyu muno mpanga.

² Lyene ndakai vwanga na ina Izlaeli uyanene kuti yanene ainipamba aina Eguputo yayapeele viyembelo vino vyapangilwa na zaabu na siluva.”

³ Lyene Yawe alenga kuti aina Eguputo yacindike aina Izlaeli. Mucumi, inkombe zyakwe Falao pamwi na antu aina Eguputo yaweni ukuti Mose umuntu umwi mucindame cuze.

⁴ Nupya Mose anena Falao ati, “Yawe wavwanga wati, ‘Usiku, manye pakasi, namasalala mu Eguputo monsi.

⁵ Nga nu mwana umonsi iyeli lya mwina Eguputo ali wensi amaiza afwe, kutandikila kwi yeli lyakwe Falao wino wali nu kupyana pa cilimba ca wene kufika nu kwi yeli umonsi umwana wa mwanaci muzya wino akasya usu. Iyeli lya citeekwa icili consi limaiza lifwe nalyo kwene.

⁶ Mu Eguputo monsi mulaya impoma ya kulosya ino itatala yacitika mwenemo nupya ino italatala icitike.

⁷ Lelo uku kaikala aina Izlaeli kutaluvwika nanti kuwata kwakwe simbwa nanti kulila kwa viteekwa vyao. Lyene alino mulamanya ukuti Nene ne Yawe, napaatula aina Eguputo ukufuma ku ina Izlaeli.’ ”

⁸ Pakusyalikizya Mose avwanga ati, “Yacilolo yako yonsi yaliza kunondi nu kumfukamila. Nga yalampapatila kuti nsende antu yane twapita. Alino pacisila cakwe cico ndapita.” Lyene Mose afuma kuli Falao ala umusoke cuze.

⁹ Lyene Yawe anena Mose ati, “Falao amatwalilila kukana uvwa amazwi yako, pakuti ningacita vizungusyo navyuze mu mpanga ya Eguputo.”

¹⁰ Mose na Aaloni iyacita vizungusyo vyonsi pa manso yakwe Falao, lelo Yawe alenga Falao kuti akome umwenzo. Caleka atazumilizye aina Izlaeli kuti yafume mu mpanga yakwe