Kufuma 10 - Amazwi Yakwe Leza 2013

Makanta

¹ Nupya Yawe anena Mose ati, “Yanga kwi sano unene Falao uti, ‘Nene natindenga kuti aliwe na yacilolo yakwe yakome myenzo pakuti incite vizungusyo pakasi kao.

² Nkulonda mwalondolwela ana inu na aizikulu inu pa vizungusyo vii nu kuti mwayalondolwela vino nalenzile aina Eguputo kuti yaloleke atumpe. Lyene mwensi mulamanya ukuti Nene indi Yawe.’ ”

³ Acino Mose na Aaloni yaya kuli Falao nga yamunena yati, “Yawe, Leza wa Ayebulai wavwanga wati, ‘Uzye amaila yanga yano ulatalama kunondi? Ta antu yane yapita, pakuti yangampepa.

⁴ Ndi cakuti watwalilila kukomya umwenzo ndalenga makanta kuti aize mutondo mu mpanga yako

⁵ Makanta alavula cuze nu kwandatila impanga yonsi ya Eguputo cakuti musili utalaloleka. Alalya vimelwa vyonsi vino vyasile ku mvula ya mawe, ni vimiti kwene ivyasile alatondola.

⁶ Alalimba mwi sano lyako, mu mang'anda yakwe yacilolo yako nga nu mu mang'anda ya antu yako. Makanta wiyo alipa cuze, wino vikolwe vinu vitatala vyalola mwi landwe lya mpanga ya Eguputo.’ ” Lino Mose wamala kuvwanga vii kuli Falao afutata apita.

⁷ Lino yacilolo yakwe Falao yuvwa pali cii, yuzya Falao yati, “Uzye umuntu wii tulamuzumilizya kutusomba kufika lilaci? Leka aina Izlaeli aonsi atupu yapite pakuti yakapepe Leza wao. Uzye utaweni vino impanga ya Eguputo yatiyononeka?”

⁸ Caleka Falao atuma aomvi yakwe kukwama Mose na Aaloni kuti iize kunoli nga aiza ayanena ati, “Mungapita nu kuya pepa Yawe, Leza winu. Lelo nkulonda imanye uzye aweni amapita?”

⁹ Mose aasuka ati, “Swensi pyu tumapita pamwi na ana itu nga na akote kwene. Tukusenda ana itu aonsi na anaci, imfwele ni mbuzi nga ni ng'ombe, pamulandu wakuti tulinzile kuyazevya cimulo ca kucindikilamo Yawe.”

¹⁰ Falao avwanga ati, “Nalapa pa manso yakwe Yawe kuti ntangamuzumilizya kusenda anaci na ana. Cii caloleka paswe kuti mukweti akaikila.

¹¹ Nakana! Aonsi yatupu aliyo yangapita yakapepe Yawe ndi cakuti acino mukulonda.” Pacisila ca mazwi ya, Falao azinga Mose na Aaloni pa manso yakwe.

¹² Lyene Yawe anena Mose ati, “Konzolola ikasa lyako usonte pa mpanga ya Eguputo kuti makanta awe. Makanta alalya cimelwa consi cino capuswike ku mvula ya mawe.”

¹³ Caleka Mose akatusya intuwa mwi yulu na Yawe alenga umuza ukufuma ku ufumondaka kuti upunge. Umuza upunga uwanda onsi usiku nu musanya. Uwanda uno walondelilepo lino ilanzi likutunka, makanta ala wataandalala impanga yonsi ya Eguputo.

¹⁴ Makanta aiza mu mikumbi mikumbi nga aandalila mu Eguputo monsi. Lyali ikumbi lyakwe makanta likulu cuze lino litatazile liloleke mwi landwe lya mpanga ya Eguputo nupya litalatala liloleke.

¹⁵ Makanta alimba pa musili ponsi ipafita paya na fititi. Alya vyonsi vino vitononyilwe ni mvula ya mawe, kumwi ni viseekwa vya miti kwene. Kutali ifwa nanti limwi ilyasile ku muti. Asinkitula vimelwa vyonsi mu mpanga ya Eguputo yonsi.

¹⁶ Lyene Falao kwaula ukusumba insita atuma akuya ama Mose na Aaloni nga aiza ayanena ati, “Natinifya kuli Yawe Leza winu nga nakuli mwemwe kwene.

¹⁷ Pamulandu wakuti nacita cii, munjelele iifyo lyane. Mpapatilini kuli Yawe kuti asisye kuvunuka kuno kungaleta imfwa panondi.”

¹⁸ Mose afuma kuli Falao nga aya amupapatila kuli Yawe kuti asisye makanta.

¹⁹ Yawe alenga muza uno wapunganga ukufuma ku ufumondaka kuti upunge ukufuma ku uwondaka. Muza iulwila makanta wensi pyu kuli Yemba Muyenzu. Kutali makanta nanti wenga wino wasile mu Eguputo.

²⁰ Lelo Yawe alenga kuti Falao akome umwenzo cuze cakuti nupya kwene akanya aina Izlaeli kuti yapite.

Imfinzi

²¹ Nupya Yawe anena Mose ati, “Konzolola ikasa lyako usonte mwi yulu, pakuti uleke kuye imfinzi ikome fititi ino imaandatila impanga yonsi ya Eguputo.”

²² Mose akatusya ikasa lyakwe mwi yulu, ni mfinzi iya mu Eguputo monsi pa manda yatatu.

²³ Aina Eguputo yakwata kanda cakuti yatalolanga nanti umuntu wino ali pipi, nupya kutali umuntu nanti umwi uwatazile afuma pa ng'anda yakwe pa nsita ilya. Lelo aina Izlaeli kuno ikalanga kwene kwali uluswepo.

²⁴ Lyene Falao atuma akuya ama Mose, nga aiza amunena ati, “Mungapita mukapepe Yawe. Na anaci yonsi na ana yonsi mungapita nayo. Lelo imfwele, imbuzi nga ni ng'ombe zinu zyene zilinzile kusyala kuno.”

²⁵ Mose aasuka ati, “Fwandi ale lyene wewe kwene ulatupela inyama zyakupeela impolelwa nga nu wila wakocela Yawe Leza witu.

²⁶ Nomba swemo tulasenda inyama zitu tutalasya nanti yonga mu mpanga ya Eguputo. Sweswe sweisikulu tulinzile kusola inyama zino tuli nu kupeela impolelwa kuli Yawe, Leza witu. Ndakai tutangamanya inyama zyakuyapeela impolelwa kunoli suka sile lino twafika kwakuya pelela impolelwa.”

²⁷ Lelo Yawe alenga Falao ukukoma umwenzo cakuti nupya kwene akanya aina Izlaeli kuti yapite.

²⁸ Falao anena Mose ati, “Fuma pano ntaakulola! Ntalatala ince nkulole nupya! Uwanda uno ndakulola ulafwa!”

²⁹ Mose aasuka ati, “Wavwanga ningo. Utalatala undole nupya.”