Kolose 3 - Amazwi Yakwe Leza 2013

¹ Mwemo mwazyukwilwe pamwi na Klistu nu kuya nu umi. Caleka ikini myenzo inu pa vintu vino vili mwiyulu, muno Klistu atenzi pa cilimba cakwe kwi kasa lilunji lyakwe Leza.

² Mwalonda sile vya mwiyulu asi vya pano nsi.

³ Pano mwemo mwafwile, icikusenula ukuti umi winu wafiswa pamwi na Klistu muli Leza.

⁴ Umi winu uwa cumi a Klistu nga lino alaloleka, lyene namwe kwene mulaloleka pamwi nawe nu ku kumako kululumbi lwakwe!

Umi wa mpiti nga nu upya

⁵ Mutaleka mili inu yamutungulula. Mulinzile kukoma vilondwa viipe vya mwili vino vikuomba munomuli, wakwe vii, kulongozya, vya winyi, nsuna, cipyu, lwiswa (pano lwiswa u musango wa upefi wa tuluwi.)

⁶ Pamulandu wa vintu vya musango uu, Leza alaya nu ukali pa antu yano asyamuyela.

⁷ Namwe kwene mwikalanga umi wakucita vintu kulingana ni vilondwa vii, avino mwacitanga.

⁸ Lelo ndakai mulinzile kufumako ku vintu vii. Mulinzile kutaluka ku kusoka, cipyu, nga nu lupato. Mutatukana nanti kulanda vya winyi.

⁹ Mutatumpokana pano mwemo mwafumako ku umi wa mpiti ni micitile yakweo yonsi,

¹⁰ nupya mwati mwingila mu umi upya. Ndakai mukulunduluka mu kulolana na kaumba winu pakuti mumumanyikisye ningo mu ufumaluke.

¹¹ Kusi upusano pa Akulukuwa nanti Ayuda, musilamulwe nanti asi musilamulwe, mututu, nkakasi, azya nanti antungwa. Lelo Klistu ali vyonsi, wene akaikala muli vyonsi.

¹² Mwemwe antu yakwe Leza. Wene wamutemwa nupya wamusolwile kuti muye antu yakwe. Caleka mulinzile kuya na mizu, afuke, aluse, aicefya, amutembo nupya antu akateeka myenzo.

¹³ Mwatekelana nu kwelelana lyonsi lino umwi wailizyanya pa muze. Mulinzile kwelelana ndi vino Mwene wamwelela.

¹⁴ Na pa vintu vii vyonsi mulundepo ukutemwa kukakundanya vintu vyonsi pamwi mukulemana kumalilike.

¹⁵ Mutende uno Klistu akapeela uwa kutungulula myenzo inu. Leza wamusolwile kuti mwikale mu mutende kwene uu, pano mwemwe vilundwa vya mwili onga. Nupya mulinzile mwataizya.

¹⁶ Lekini Ilandwe lyapali Klistu likale mu myenzo inu, mu ukama wi landwe mwasambilizyanya nu kutungululana na mano onsi. Mwaimbi nyimbo zya kulumbanya, ni zyamuzilo kuli Leza. Mwaimbila Leza ni ntaizyo mu myenzo inu.

¹⁷ Vyonsi vino mukucita nanti kulanda, nanti mukuomba milimo, mulinzile mucitile mwi zina lya Mwene Yesu, lino mukutaizya Leza Tata muli Klistu.

Umi upya mu utwazi

¹⁸ Mwe aci mwatontela yaiya inu, pano avino mulinzile kucita wa ina Klistu.

¹⁹ Mwe yaiya, namwe temwini aci inu nupya mutayaanola.

²⁰ Mwe ana, namwe umulimo winu kuyela akwasi inu lyonsi, pano cii cikazanzya Leza.

²¹ Mwe akwasi, namwe mutasosya ana inu, pano limwi yanganenuka.

²² Mwe aomvi, namwe mwayela asambazi inu mu vintu vyonsi, asisile lino yakumwangalila pamulandu wakuti mukulonda kuyazanzya. Lelo mulinzile kuyela ni myenzo inu yonsi pamulandu wakucindikilamo Mwene.

²³ Mulimo onsi uno mukuomba, ombini ni myenzo inu yonsi, kwati limwi mukuombela Mwene, asi kuombela umuntu.

²⁴ Mwiusye ukuti Mwene alamupeela icilambu, na cico upolelelo uno wasungila antu yakwe. Pano mucumi Klistu ali Musambazi wino mukatumikila.

²⁵ Muntu wensi wino akacita viipe alavunukwa kulingana pa viipe vyakwe, pano Leza atakwata kasoozi.