Kasambilizya 9 - Amazwi Yakwe Leza 2013

Uyo wakwe cele wensi

¹ Nelenginye wakwe cimwi pa nsita itali pali vino nazana, nga indola ukuti Leza awino akatungulula ivicitwa vya antu yamano na antu akacita vyaololoke, nupya aliwe akalenga kuti yatemwa nanti yapata. Kutaya umuntu akamanya ivyankolelo.

² Pataya upusano foo. Icikaponela umuntu mololoke, icikaponela na kaifya kwene. Icikaponela umuntu musuma, icikaponela nu muntu mwipe kwene. Icikaponela kapepa, icikaponela na asipepa kwene. Icikaponela akapeela impolelwa, icikaponela na asipela kwene. Umuntu mololoke atalusile kaifya, na wino akalapa umulapo, atalusile wiyo asilapa.

³ Endi, swensi kwene icikatuponela icili cimwi, nga icintu cii iciipe mu vintu vyonsi ivikacitika umu nsi ii. Lino antu yacili nu umi amelenganyo yao yakazulamo uyi nu upena, alino yakaiukila ukuti iyafwa.

⁴ Lelo umuntu wensi ali nu umi wakwata upaalilo. Simbwa mupuma wazipa ukuluta cisama umufwe.

⁵ Endi, antu lino yacili nu umi yakamanya ukuti yalafwa. Lelo afwe yatamanya nanti acimwi. Yene yatakwata icilambu nacuze. Yene yililika pyu.

⁶ Ulukundo lwao, ulupato lwao, uluse lwao, vyonsi vyalowa pamwi nao. Yatalatala yakumeko nupya mu vintu ivikacitika mu nsi ii, awe.

⁷ Twalilila, uwalya ivyakulya vyako nu kusansamuka. Uwamwa waini wako nu kuzanga, pano ndakai Leza watazumilizya kuti wacita cico.

⁸ Lyonsi uwazwala ivitiswe, nu kupaka amafuta apa manso, apakulanga insansa nu luzango.

⁹ Uwailyokezya nu mwanaci wino watemwa lino ucili nu umi, umi uwasilesile uno Leza wakupeela mu nsi ii. Uwailyokezya mu manda yonsi aumi wako, pano avino ungazana mu milimo yako ya macuzi.

¹⁰ Uwaombesya muli vyonsi vino ukucita, pano kuzimo kutalaya vicitwa, kutalaya amelenganyo, kutalaya kumanya, kutalaya amano, nga kuko akuno ukuya.

¹¹ Naweni icintu nacuze. Icintu cico icakuti antu yano yakwatisya ulwilo yasicimvya mu kucimvyanya, na antu aposye yasicimvya mu nkondo. Antu yamano asi lyonsi lino yakwata ivyakulya. Antu acenjele asi lyonsi lino yakaya akama. Antu asambilile asi lyonsi lino yakasyukila incito ya papela, pano isyamo likaponela umuntu ali wensi.

¹² Umuntu atange amanye lino insita yakwe iliza. Cili wakwe vino ivyunyi vikaiukila ivilemya mu lukose, wa nswi ikaiukila yatilemya mwi sumbo. Avino naswe kwene tukaponelwa na masyamo pa nsita ino tutenekile.

Amelenganyo pa mano nu uwelewele

¹³ Kwaya icintu nacuze cino nalola. Icintu cico icilangililo cisuma icikasambilizya vino antu amu nsi yasuula amano.

¹⁴ Kwali umusumba unono muno mwali antu akupenda. Lyene kateeka wamaka aiza ku kuzanza umusumba uo. Ivita vyakwe vizinguluka umusumba uo nu kuiteyanya kuti vyomolole ilinga nu kwingila mwenemo.

¹⁵ Lyene mu musumba unono ulya mwatenzi umuntu umwi umupina, nga wene wali umucenjele wakwe cimwi cakuti wapuswisye umusumba. Lelo kutali umuntu nanti aumwi uwelenganyanga pali aliwe.

¹⁶ Lyonsi nkalanda ukuti amano yazipa ukuluta amaka. Lelo kutaya umuntu nanti aumwi akaelenganya ukuti apina nayo kwene yakwata amano, nanti ukusumba amano kuli vino yakataka.

¹⁷ Cazipa ukukutika ku mazwi ya mutembo a muntu wamano, kuluta ukukutika kuli kateeka akupunda lino akulanda ku cilye ca viwelewele.

¹⁸ Amano yazipa ukuluta ivyanzo vya nkondo, lelo kaifya wenga angonona ivisuma ivingi.