Kasambilizya 8 - Amazwi Yakwe Leza 2013

¹ Uzye aweni uwaya wa muntu wamano? Uzye aweni uwamanya usenulo wa vintu vii? Amano yakalenga kuti umuntu asansamuke, nupya amano yakalenga kuti inkansi zisenke apa usyu.

Mwayela kateeka

² We muntu ulinzile kuyela amalamulo yakwe kateeka pamulandu wa ulayo wako kuli Leza.

³ Kateeka angacita cili consi cino akasi, acino uwafuma ku manso yakwe zuwa. Utalanda pamulandu umwi uwipe.

⁴ Kateeka wa mpanga akalanda na maka. Kusi nanti umwi angamucilinganya.

⁵ Wensi wino akayela malamulo akaya uwakaele insita zyonsi. Umuntu wamano akamanya insita ni nzila yakucitilamo ivintu vyonsi.

⁶ Icintu cili consi cakwata insita yakweco, alino ni nzila yakuciombelamo. Lelo swe antu tutacimanya ningo.

⁷ Kusi nanti aumwi uwamuno tuli angamanya ivilacitika ku nkolelo itu, nupya kutaya angatunena.

⁸ Kusi umuntu nanti umwi angaleuka imfwa, nanti ukusisya uwanda wa mfwa yakwe. Ala imfwa inkondo ino umuntu atangaleuka, nanti ukucenjela kusi.

Antu ankota na yakacita ya ololoke

⁹ Lino nelenginye pa vintu ivikacitwa mu nsi ii, naweni ukuti antu yamwi a maka yakateeka auze mu unkalwe.

¹⁰ Endi, nemo nalola kuno antu ankota yakuzikwa mwi lindi. Lelo akula muli umu nzila mukufuma kwi lindi, uuvwa antu yakumulumbanya mu musumba ulya kwene muno wacitanga ivintu viipe. Cii, icasilesile.

¹¹ Uzye pacani cino antu yakatalila imilandu uku mufulo? Aeci yakapingula ya milandu yasipingula zuwa.

¹² Umuntu muyi nanti angatala imilandu umwanda onga, lelo wene angikala sile ningo. Endi, nemo kwene cino namanya icakuti antu yano yakaoopa Leza yene yakaya nu longo.

¹³ Lelo antu aipe yene yakasyama. Umi wao waya wa cinzingwa. Yene yakafwa lino yacili ance, pano yasioopa Leza.

¹⁴ Lelo kwene umu nsi ii mwaya ukuicuzya sile. Silolini ivikacitika umu nsi ii. Limwi antu akacita vyaololoke yakavunukwa na antu aipe alino antu aipe nayo yapokelela icilambu ca antu akacita vyaololoke. Nemo nkuti cii, icasilesile.

¹⁵ Acino nemo nasininkizya ukuti swemo tulinzile ukuilyokezya, pano ukusansamuka kuno twakwata mu umi uu, ukulya nu kumwa sile, alino nu kuilyokezya. Tungacita vii lino tukuomba imilimo yi yevu mu nsita ya umi witu uno Leza watupeela mu nsi ii.

¹⁶ Lyonsi lino nezizye ukuti inje uwamano, alino nu kusambilila ivikacitika umu nsi, nilwike inzana ukuti ungamala amanda avule ukwaula kukasula.

¹⁷ Lelo utange uvwikisye vino Leza akacita. Nanti ungezya na maka yonsi, utange uzane. Antu yamano yakaitunga ukumanya, lelo mucumi yatamanya.