Kasambilizya 7 - Amazwi Yakwe Leza 2013

Amano

¹ Izina lisuma lyazipa ukuluta amafuta acinunu cisuma amutengo. Uwanda wa mfwa itu ukazipa ukuluta uwanda uno twavilwepo.

² Cazipa ukuya ku ng'anda ya ndosya ukuluta ukuya ku ng'anda ya mateweto, pano antu apuma yalinzile kwiusya ukuti swensi kwene tulafwa.

³ Amalanda yazipa ukuluta inseko. Amalanda yakakungumalika, lelo yakaapa umuntu amano.

⁴ Umuntu wino lyonsi akaelenganya sile pa nsansa, wene iciwelewele. Umuntu uwamano akaelenganya pamulandu wa mfwa.

⁵ Cazipa kutezya ku muntu wamano wino akukunenola, kuluta ukuuvwa ku viwelewele ivikwimba inyimbo zyakulumbanya.

⁶ Inseko zya ciwelewele zili wa myunga ikupantoka pi ziko. Nacikwene, icasilesile.

⁷ Umuntu angaya uwamano, lelo ndi watumpoka umuntu umwi ala waicita wa ciwelewele. Ukupokelela amafukakanwa kukaonona umwenzo wa muntu.

⁸ Impelelekezyo ya cintu yazipa ukuluta utandiko wakweco Ukuteeka umwenzo kwaluta ukuya ni cilumba.

⁹ Mutasoka zuwa, pano ukukwata kaikila uwelewele.

¹⁰ Mutauzya muti, “Uzye pacani ivintu vyali ningo mu manda yampiti ukuluta ivintu vya mu manda ya ndakai?” Iuzyo lyamusango uu lisi iuzyo lyamano, awe.

¹¹ Umuntu wensi uwa umi alinzile kuya uwamano. Ukuya na mano caya kwati ukupokelela icaupyanyi,

¹² nupya cikacingilila wakwe vino impiya zikacingilila. Amano yakasunga umuntu umutende. Endi, uu uli usuma wa kukwata amano.

¹³ Mwelenganye pali vino Leza wacita. Uzye aweni angololola icintu cino Leza waumba icinyongane?

¹⁴ Lino ivintu vikukuzipila, wemo uwazanga, nga nupya lino intazi zyakuponela, uwaiusya ukuti a Leza akatuma vyoili, insansa ni ntazi. Utange umanye ivili nu kukuponela uku nkolelo.

¹⁵ Mu umi wane uwaula muzano mu nsi ii, nalola ivintu viili. Antu yamwi asuma yakafwa, antu aipe yene yasyala nanti angala yakucita iviipe.

¹⁶ Fwandi we muntu utacizyapo ukuya umusuma nanti ukuya uwamano. Uzye pacani cino ungaikomela?

¹⁷ Utayesya umwipe, nupya utayesya iciwelewele. Uzye pacani cino ungafwila lino insita yako yakufwa itali ifike?

¹⁸ Fwandi we muntu ulinzile ukuteeka umwenzo pa milandu ii iili. Wemo ndi cakuti ukaoopa Leza, ale lyene imilandu ii yoili ukailondela ukwaula intazi.

¹⁹ Amano yakalundulwila umuntu amaka ukuluta amaka yano yakateeka ya misumba ikumi yakwata.

²⁰ Cumi cumi, mu nsi ii mutaya umuntu nanti umwi akacita vyaololoke lyonsi, nupya kutaya nanti umwi asitala aluvyanya.

²¹ Nupya utasumba amano kuli vyonsi vino antu yakuzaila, pano limwi unguvwa yakuti umuomvi wako akukutuka.

²² Mu mwenzo wako nawe kwene watumanya ukuti watusile antu yauze maila auvule.

²³ Naomvizye amano yane mukwetetula vyonsi vii. Nalondanga ukuya uwamano, lelo imposiwa.

²⁴ Uzye umuntu angamanya uli usenulo wa umi? Icintu cii icizike, nupya swemo tutangacuvwa. Icikome, icitale swe antu tutange tucuvwe.

²⁵ Lelo naipezile pamulandu wa kusambilila pakuzana amano. Nalondesya ukuzana amano, alino nu kuzana amaasuko yakuzana amano, alino nu kuzana amaasuko yaku mauzyo yane. Nupya nalondanga ukusambilila vino uyi waya, vino uwelewele waya, na vino kutumpa kwaya.

²⁶ Nazanyile icintu cimwi iciwaye ukuluta imfwa, umwanaci wene wakola ulukose. Icitemwiko cino wene akalanga ku onsi cikalema antu wi sumbo, alino amakasa yano akakumbatila umonsi yakafyela wa munyololo. Umonsi wino akazanzya Leza angapusuka ku mwanaci wiyo, lelo kaifya alalemwa ku mwanaci wii.

²⁷ Endi ivyalanzile kasambilizya, nazanyile ivintu vii panono panono lino nalondelezyanga amaasuko.

²⁸ Nalondelezyanga amaasuko nayauze, lelo ntayazana foo. Nazanyile umonsi wenga pa antu izimbi lyonga wino nacindike, lelo kutali umwanaci nanti wenga wino nazanyile.

²⁹ Vii avili vino nasambilile. Leza watuumvile swe antu aula ulema umwi. Lelo swe eneco tukailetelela ku misango itu iipe ivule.