Kasambilizya 6 - Amazwi Yakwe Leza 2013

¹ Kwaya icintu cimwi iciipe cino nemo nalola mu nsi ii, cico cino cikacuzya umuntu wakwe cimwi.

² Leza apeela umuntu icuma, ucindami, nga ni vikwatwa, ee ni vintu vyonsi vino umuntu akalonda. Lelo Leza asilenga kuti umuntu ailyokezye pa vintu vivyo. Umwenyi aliwe aliza ailyokezye pa vintu vivyo. Cii, icasilesile, nupya cisi cisuma.

³ Umuntu angavyala ana umwanda onga nga nu kwikala amanda avule. Lelo ndi atakusansamuka nupya atazisilwe mu mucinzi, lyene nemo ningavwanga ukuti akanya akavyalwa akafwe kazipa ukuluta umuntu wiyo.

⁴ Akanya akafwe kakavyalwa ukwaula kumanyikwa, nupya kazikwa mu mfinzi, nga kililikwa nu kwililikwa.

⁵ Akanya kaa kasitala kalola uluswepo nanti ukumanya vino umi waya. Kene kakazana upuzo ukuluta umuntu wilya umukama,

⁶ makamaka umuntu wino atailyokizye lino wali umu nsi, nanti angala wene watenzi imyaka amazimbi yaili. Endi, akanya nu mukama, yoili kwene yakaya kuli kumwi.

⁷ Umuntu akaomba imilimo yakwe yonsi yakukailwa kuti angazana cakulya, lelo wene asiikuta.

⁸ Uzye pacani umuntu wamano waluta iciwelewele? Nga fwandi umuzano cii uno umupina akazana pakumanya imikalile ya munsi ii?

⁹ Ala cii icasilesile. Cili wa kuzinganya umuza. Cazipa ukwikuta vino ukweti ukuluta ukulonda ukulonka insi yonsi.

¹⁰ Icintu consi icayapo cinikwe izina mpiti, nupya swensi twamanya ukuti utange upazyanye nu muntu wino akulusile amaka.

¹¹ Amazwi ndi yavula, ni vyasilesile navyo vikavula. Uzye umuzano cii uno umuntu angazana?

¹² Uzye aweni angamanya icingatuzipila mu manda itu anono aumi witu uwasilesile, umi uno ukapita wa cinzingwa? Uzye tungamanya uli icilacitika mu nsi pacisila ca mfwa itu?