Kasambilizya 5 - Amazwi Yakwe Leza 2013

Utazakantika pa kulaya

¹ Mwatekela pakuya ku Ng'anda ikulu yakwe Leza. Cazipa ukuya ku Ng'anda ikulu yakwe Leza ku kusambilila kuluta ukupeela impolelwa wakwe vino antu atumpe yakacita, yano yatamanya uyi wao uno yakacita.

² Mwatala mwelenganya lino mutali muvwange, nupya mutazakantika lino mukulaya kuli Leza. Leza wene waya umwiyulu. Lelo mwemo mwaya umu nsi. Acino mutalanda ivingi ukuluta pali vino mungacita.

³ Umuntu ndi wakwata amasakamiko avule, ala ni viloto kwene amakwata ivivule. Nupya ndi wavwangikisya, angavwanga ni vintu vyaulamo amano.

⁴ Acino ndi mwalaya kuli Leza, mulinzile kufikilizya zuwa. Pano Leza atatemwa antu viwelewele. Fikilizini vyonsi vino mwalaya ukucita.

⁵ Cazipa kuntalaya ukuluta ukulaya nga lyene uposiwa nu kufikilizya.

⁶ Utaleka imvwango zyako zyakulenga ukwifya cakuti pacisila uya ku kunena simapepo wakwe Leza uti, “Awe nasekanga sile.” Uzye icani cino ungaleka kuti Leza akusokele pamulandu wa vwango zyako? Uzye ukalonda kuti Leza aonone vyonsi vino waombela wemwisikulu?

⁷ Nanti ulote viloto vya musango cii, nanti uombe incito zya musango cii, wemo ulinzile ukoopa Leza.

Ivyuma ivyasilesile

⁸ Utazunguka lino walola ukuti uteko ukutitikizya apina nu kuyafyenga mu nsambu zyao. Cilolo wensi wacingililwa na wiyo akamwangalila, alino yaa yoili yacingililwa ni vilolo iviyalusile.

⁹ Alimi yonsi yakazombola ivintu vyamu vyalo vyao. Umwene umwisikulu akazana umuzano uwamu vyalo vyao.

¹⁰ Antu yano yatemwa impiya yasiikuta impiya zizyo. Nupya icili cimwi na antu yano yatemwa ukama, yene yasiikuta umuzano. Cii, icasilesile.

¹¹ We muntu ndi wavulilwa icuma, akulya icuma cico ala nayo yavula. Wemo umuzano wako uwakumanya ukuti, ee, nene mukama.

¹² Umuomvi akakasula utulo lino wataikuta nanti atikwite. Lelo umukama icuma cisimulalika utulo pamulandu wakusakamikwa.

¹³ Kwaya icintu cimwi iciipisye cino nemo nalola mu nsi ii, icakuti umuntu asunga impiya zyakwe zyakuomvya pa nsita ino wene angazilonda.

¹⁴ Lyene uwanda wi syamo aponzya zyonsi pyu, ukwaula ni zyakuti angapeela ana yakwe.

¹⁵ Tukafuma mu nsi ii tupu ndi vino twavilwe tupu. Pa milimo yonsi yakukailwa ino twaomvile, kusi nanti acimwi cino tungasenda mu minwe itu.

¹⁶ Icintu cii cisi cisuma! Swemo tukaswilila umu mwata kwene uno twizilemo, vwile! Nga fwandi umuzano cii uno swe antu tukazana pakuzinganya umuza?

¹⁷ Mu umi witu tukaikala mu kanda nu mu malanda, mu masakamiko, mu cipyu nu mu ndwala.

¹⁸ Acino nemo nazana ukuti icintu cisuma cino umuntu ali wensi angacita, ukulya nu kumwa nga nu kuilyokezya pa vintu vyonsi vino waombela mu umi wakwe uwipi uno Leza wamupeela. Kusi icintu nacuze cino umuntu angacita.

¹⁹ Leza ndi cakuti wapela umuntu icuma ni vikwatwa nu kulenga kuti ailyokezya, ee umuntu alinzile kutaizya nu kuilyokezya pa vintu vyonsi vino waombela. Uu, uwila uwafuma kuli Leza

²⁰ Pano Leza uwalenga kuti umuntu asansamuke, umuntu atangasakamala sana pamulandu wa manda yanono aumi wakwe umu nsi.