Kasambilizya 4 - Amazwi Yakwe Leza 2013

Uzunyo, kuombesya, nu wanisi

¹ Lyene ndolekesya pa lufyengo lonsi ulukacitika mu nsi ii. Antu yano yatitikiziwa yakulosya nga kusi nanti aumwi uwakuti angayazwa. Kusi nanti aumwi uwakuti ayazwe pano antu yano yakuyatitikizya yakwatisya maka.

² Nkakumbwa yayo afwa, yano yatusya mpiti. Yene yazipapo ukuluta yayo acili nu umi.

³ Lelo yayo atatala yavyalwa, yano yatatala yalola ulufyengo ulukucitika mu nsi yonsi ii, yene yasyuka ukuluta antu apuma na afwe kwene.

⁴ Nupya nasambilila nacuze icikalenga ukuti antu yaombesya, apamulandu wakuti yene yakakumbwa ivintu vino ainipamba yao yakwata. Lelo cii naco kwene icasilesile. Cili wa kuzinganya umuza.

⁵ Antu yakavwanga yati umuntu angaya iciwelewele ndu mwisikulu wafyatila makasa nu kuleka kuti afwe uku nzala.

⁶ Limwi cingaya vivyo kwene. Lelo cingazipa ukukwata tunono ukwaula masakamika, kuluta kuivunola ukwaula muzano, umu kwezya ukuzinganya umuza.

⁷ Mu wikazi nalola icintu nacuze icasilesile.

⁸ Silolini umuntu wino wikala wenga. Wene atakwata umwana nanti umwina, lelo wene akaomba pe, nga atiikuta ni cuma cino walonka. Uzye aweni wino umuntu wi akakaililwa nu kuikanya ukusansamuka? Camusango uu naco kwene icasilesile, nupya icaulanda mu wikazi wa muntu.

⁹ Ukuya yaili cazipa kuluta ukuya wenga, pano antu yaili yangaomba umulimo ulondoloke.

¹⁰ Pano ndi wenga wapona pansi, umuze angamukatusya. Lelo ndu muntu ali wenga alino wapona pansi, icintu ciipe wakwe cimwi, pano pasi angamukatusya.

¹¹ Ndi mwalala yaili pakakaya ndi kuli impepo. Uzye ndu uyizi wenga pangakaya uli?

¹² Umuntu ndi ali wenga angacimviwa mu ulwi, lelo ndi muli antu yaili mungazyansya. Icikome ukutankola umwando uno wapyatwa ni myando itatu.

¹³ Umupina nupya uwamano wazipa ukuluta umukote umutumpe wino asiuvwa ku kupanziwa amano.

¹⁴ Umwance umwi angafuma mu ng'anda ya minyololo nu kuya umwene wa mpanga kwene iyo ino wavyalilwemo, nanti limwi ale wavyalilwe mu upina mu mpanga yakumwao.

¹⁵ Nelenginye pa antu yonsi yano yakaikala mu nsi ii, alino niluka ukuti mu antu kwene yaa, ku ncende imwi kuli umulumendo wino alatola icifulo ca ukateeka.

¹⁶ Umwene angateeka imintapendwa ya antu, lelo ndi wafwa kusiya nanti aumwi akataizya pali vino mwene wacisile. Ala cii icasilesile. Cili wa kuzinganya umuza.