Kasambilizya 3 - Amazwi Yakwe Leza 2013

Icintu consi cakwata insita

¹ Icintu consi icikacitika muno mu nsi ii, cikacitika pa nsita ino Leza wika.

² Kwaya insita ya kuvyalwa ni nsita ya kufwa, kwaya insita ya kulema ni nsita ya kwipula vilemwa vivyo,

³ kwaya insita ya kukoma ni nsita ya kupozya, kwaya insita ya komoola ni nsita ya kukuula.

⁴ Kwaya insita ya kuvwa ulanda ni nsita ya kusansamuka, kwaya insita ya kulosya ni nsita ya kucina.

⁵ Kwaya insita ya citemwiko ni nsita isi ya citemwiko. Kwaya insita ya kutonsola ni nsita isi ya kutonsola.

⁶ Kwaya insita ya kuzana ni nsita ya kuponzya, kwaya insita ya kusunga ni nsita ya kusumba.

⁷ Kwaya insita ya kulepola ni nsita ya kusuma, kwaya insita ya kwikala cele ni nsita ya kuvwanga.

⁸ Kwaya insita ya kutemwa ni nsita ya kupata, kwaya insita ya nkondo ni nsita ya mutende.

⁹ Uzye umuzano cii uno tukazana mu milimo itu yonsi?

¹⁰ Namanya ivisendo vino Leza watutwika swe yantunze.

¹¹ Wene wika akasita kayane pa cintu consi. Watupeela ukulonda ukumanya ivintu iviliza, lelo atatupela ukumanya kumalilike ukwakumanyikisya vino wene akacita.

¹² Acino nilwike ukuti cino swemo tungacita ukukwata insansa nu kuomba vino tungaomba lino tucili nu umi.

¹³ Swensi tulinzile ukulya nu kumwa nga nu kuilyokezya pa vintu vino twaombela. Vyonsi vii uwila wakwe Leza kunotuli.

¹⁴ Namanya ukuti vyonsi vino Leza akacita viikalilila amanda pe. Kusi nanti umuntu umwi angungilizya cimwi pa vintu vivyo. Cino Leza wavicisile apakuti swe antu twamoopa.

¹⁵ Consi icikacitika nanti icingacitika cacitike nu ku mpiti kwene. Leza akalenga icintu icili cimwi kuti cacitika lili lili.

Ulufyengo lwa mu nsi

¹⁶ Cuze cino nalola mu nsi ii, icakuti ulufyengo lukazanwa apalinzile ukuzanwa ulungami, na palinzile ukuzanwa usuma pakazanwa uyi.

¹⁷ Alino inelenganya inti, “Leza alavunuka antu aololoke na yakaifya mu musango onga kwene, pano icintu consi ni cicitwa consi, cilacitika pa nsita yakweco.”

¹⁸ Nasondolwile ukuti Leza akaezya swe antu, kuti atulange vino twalingana ni nyama.

¹⁹ Nupya icikaponela umuntunze, icikaponela ni nyama kwene. Umuntunze akafwa ndi vino inyama ikafwa. Vyonsi vyakolana pano vyene iviumbwa. Umuntunze ataluta inyama, pano vyoili vyakwata umi umutaya umuzano.

²⁰ Vyoili kwene vikaya uku ncende ili yonga, ku lukungu. Akuno vyoili vyafumile, nupya akuno vyoili vilaswilila.

²¹ Nga fwandi umuntu angasininkizya uli ukuti mupasi wa muntunze ukakwela ukwiyulu, nu mupasi wa nyama wene ukaya pansi mu musili?

²² Lyene iniluka, inzana ukuti icintu cisuma cino swe antunze tungacita, ala ukuilyokezya pa vintu vino twaombela. Kusi cintu nacuze cino swe antunze tungacita. Kusi nanti aumwi angamanya icilacitika pacisila ca mfwa itu.