Kasambilizya 2 - Amazwi Yakwe Leza 2013

¹ Insita imwi nelenginye inti, “Nkailyokezya pakuti nkamanye vino insansa zyaya.” Lelo nazanyile ukuti naco kwene icasilesile.

² Nazanyile ukuti inseko uwelewele. Ukusansamuka nako kusiomba cimwi cisuma.

³ Campamvizye ukulondesya ukuzana amano, nga inelenganya ukuti naisansamusya na waini nu kukwata insita isuma. Nelenginye ukuti limwi ii ingaya inzila isuma ino antu yangaomvezya amanda yao anono amu nsi.

⁴ Naomvile ivintu vikulu wakwe cimwi. Nakuuzile amang'anda yane nu kulema amatingi yane.

⁵ Nalimile imiyanda indema ni mitingi ino ikaseeka vizao vipusanepusane.

⁶ Lyene nimba viziya vya manzi akukontelela imiti.

⁷ Nakazile azya avule cuze, nga na azya yauze yavyalilwe mu ng'anda yane. Nakweti viteekwa ivivule kuluta umuntu wensi uwa nkolelile ukwikala mu Yelusalemu.

⁸ Nupya natulike imitumba yakwe siluva na zaabu ukufuma kuli yamwene yano nateekanga alino nu ku mpanga zyuze zino nateekanga. Nakweti yakiimba aonsi na anaci akunsansamusya. Nupya nakweti anaci yano umonsi wensi angatemwa kukwata.

⁹ Endi, nacindime ukuluta antu ankolelile ukwikala mu Yelusalemu, nga na mano yene nakweti.

¹⁰ Consi cino nalondanga calolike. Nailyokezyanga muno nkulondela. Namekelanga icintu consi cino naombile na vyonsi vii vyali ivilambu vya milimo yane.

¹¹ Lyene natandike kwelenganya pali vyonsi vino naomvile, alino nu kukailwa iyevu kuno nakailwe lino nkuomba ivintu vii, alino niiluka nga nzana ukuti vyonsi ivyasilesile. Cali kwati ukuzinganya umuza muno mutaya umuzano foo.

¹² Ukuya kwene kateeka angacita vino yakateeka amukolelile yacisile. Caleka papo kwene ntandika ukwetetula muno calola ukuya na mano, nanti ukuya nu uwelewele.

¹³ Iyee, naweni ukuti amano aasuma ukuluta uwelewele, ndi vino uluswepo ulusuma ukuluta imfinzi.

¹⁴ Antu yamano yangalola kuno yakuya, lino iviwelewele vitangalola kuno vikuya. Lelo namanya ukuti icikaponela umuntu wa mano, icikaponela iciwelewele na cipena kwene.

¹⁵ Lyene nelenginye inti, “Icikaponela iviwelewele, icilaponela nani kwene. Nga fwandi umuzano cii uno nazana pakuya uwa mano?” Namaasuka inti, “Kusi nanti cimwi.”

¹⁶ Kutaya nanti umuntu wenga akaiusya antu yamano, alino kutaya umuntu umwi akaiusya iviwelewele. Mu manda akwiza inkolelo swensi kwene tulililika. Swensi tulafwa, antu yamano nga ni viwelewele icili cimwi.

¹⁷ Fwandi umi wane utantumbwilile nanti cintu cimwi, pano vyonsi ivyacitikanga mutali umuzano, suka sile intazi. Umi wane wali uwasilesile. Nazinganyanga umuza.

¹⁸ Vyonsi vino nalonsile ivyasilesile kunondi, pano namanyile ukuti vyonsi ndasila impyanyi yane.

¹⁹ Nupya impyanyi yane limwi ingaya iyamano nanti ciwelewele, angamanya aweni? Nanti cingaya vivyo umuntu wiyo alapyana ivintu vyonsi vino nalonsile, vyonsi vino nalonsile ku mano yane, mu nsi ya pansi. Ala cii icasilesile.

²⁰ Cii, candetile ukulanguluka pakuombesya kuno naombisye.

²¹ Umuntu uombela icintu na mano yako yonsi, na ucinda wako onsi, alino pacisila uwiza usiila umuntu muze wino ataciombile. Cii icauwelewele, nupya cisi cisuma foo!

²² Umuntu aomba nu kusakamikwa insita ya umi wakwe onsi, uzye umuzano cii uno akazana?

²³ Vyonsi vino umuntu akaomba mu nsita ya umi wakwe mutaya umuzano, lelo amasakamiko nu kuwavya umwenzo. Usiku nalyo kwene atangalola utulo. Ala cii icasilesile.

²⁴ Fwandi icintu cisuma cino umuntu ali wensi angacita, ukulya nu kumwa nga nu kuilyokezya pa vintu vino walonka. Lelo nilwike ukuti vyonsi vii vikafuma kuli Leza.

²⁵ Nga fwandi ungazana uli icili consi icakulya nanti icakuilyokezya ukwaula Leza?

²⁶ Leza akapeela amano, ukumanya nga ni nsansa ku antu akamuzanzya. Lelo akalenga kuti yakaifya yaombe nu kulonka icuma pakuti yangapeela icuma cao ku antu akazanzya Leza. Ala cii icasilesile. Cili wa kuzinganya umuza.