Kasambilizya 12 - Amazwi Yakwe Leza 2013

¹ Acino uwaiusya kaumba wako lino ucili umwance, lino amanda ni myaka ya ulanda itali ikufikile, lino ulavwanga uti, “Awe nemo ntatala nailyokezya.”

² Mu nsita ya ukote wako alino uluswepo lwi lanzi, lwa mwezi nu lwa ntanda lulakuzimila. Nupya amakumbi ya mvula yatalata ukufisya foo.

³ Lyene amakasa yako yano waipokololangako yalazakaza, nga na maulu yako yano ndakai yacikomile, lilyo lyene yalaya atonte. Amino yako yalaya akupenda yano utange usyetele ivyakulya, na manso yako yalaya akafinzi cakuti ulafindamila pa kulola.

⁴ Icongo camu museo utalacuvwa pamulandu wa ucipuuli wako. Ulaposiwa ukuvwa icongo ca mwanansyo lino umwi akusya, nanti inyimbo lino yakwimba, lelo nu lwimbo lwa kunyi kwene lulakuzyula.

⁵ Wemo ulaoopa incende zisanzame, nu kupitana kulaya intazi zitupu. Ku mutwe wako kulaya imvwi zitupu. Ulaposiwa nu kukweteka, nga ni nsuna ya vintu vyosi kutalaya. Tukuya ku uyo witu uwa upuzo, nga lyene kulaya ukulosya mu misolo.

⁶ Umunyololo wakwe siluva ulaputuka ni lampi lyakwe zaabu lilapona nu kutamoka. Umwando wa pa cifula ulaputuka ni nsembo ilatamoka.

⁷ Imili itu ilaswilila ku lukungu ku musili. Umupu ulaswilila kuli Leza wino watupile.

⁸ Icasilesile, icasilesile, ivyavwanzile kasambilizya. Ala cii icasilesile.

Amazwi yakumalila

⁹ Pamulandu wakuti kasambilizya wali uwamano, wene wakonkomizye antu vino wamanyile. Wasambilile imvwango nu kulondelezya nga azana icumi muno zili.

¹⁰ Kasambilizya wezizye ukulonda amazwi akutekezya, lelo amazwi yano walemba yali acumi.

¹¹ Imvwango zya antu yamano zyaya wa ntuwa zisongozye zyakwe yakacema ya mfwele zino yakaomvya pakutungulula amaufyo yao. Imvwango zyao zyaya wa nsunga zino yapampamila. Imvwango zizyo zyafuma kuli Leza, kacema witu swensi pakuti wene atutungulula swe antu.

¹² We mwanane umonsi kwaya icintu nacuze cakucenjela naco. Ukulemba kwa mpapulo kusisila. Ukupituluka mu mpapulo nako kulakutonsya.

¹³ Fwandi vyonsi vyativyuvwika. Izwi lyakumalilila umulandu aili: uwaoopa Leza nu kuyela amasunde yakwe, pano acino antunze yaumbilwe.

¹⁴ Endi, Leza alatupingula pa vintu vyonsi vino tukacita, cisi cimwi viye ivisuma nanti iviipe, nanti ivintu ivyacitwa mu nkama.