Kasambilizya 10 - Amazwi Yakwe Leza 2013

¹ Insazi zifwe zingonona umusazi onsi uwa mafuta acinunu cisuma, nu kutumpa kunono kungonona amano aingi.

² Umuntu wamano waelela ukucita ivisuma. Ciwelewele naco caelela ukucita ivintu viipe.

³ Uwelewele wakweco ukamanyika nu ku mwenyi wino cakomenkana nawe umu nzila. Cene cikalenga kuti umuntu wensi acimanye ukuti iciwelewele.

⁴ Ndi ntunguluzi yakusokela, wemo utata incito, pano ukufuuka kungalenga kuti wemo welelwe ni vintu ivikalamba vino waluvyanya.

⁵ Umu nsi ii nalola iciipe nacuze. Icintu ciipe cii ulufyengo, lulo luno yakateeka yakacita.

⁶ Uteeko ukapeela iviwelewele incito zicindame, akama yene iyapeelwa incito izyakuti cikulu incito.

⁷ Nemo nalola azya yakukwela pa mfwalasi lino acindami yakupita pansi wa azya.

⁸ Wino wensi akaimba iciwina, alaponelamo. Wino wensi akaomolola iciumba, inzoka ilamuluma.

⁹ Wino wensi akatamola amawe, amawe yalamucisa. Wino wensi akalepola inkwi, inkwi zilamucisa.

¹⁰ Impasa yako ndi itune, utainyozile pakuiomvya, ala ukalemasye pakuiomvya. Umutalampiti ukaazwilizya.

¹¹ Ukumanya ivyakutonsya inzoka lino yatikuluma mpiti, ala ukuicuzya sile.

¹² Ivilandwa vya muntu wa mano vikamuletela ucindami. Lelo ivilandwa vya ciwelewele vikaciletela umusaalula.

¹³ Iciwelewele cikatandikila na mazwi akuzaila, nu kumalila na mazwi aucipena.

¹⁴ Iciwelewele cisita kuvwanga. Kusi umuntu nanti wenga uwamanya ivili nu kucitika ku nsita yaku nkolelo. Nupya kutaya angatunena ivili nu kucitika pacisila ca mfwa itu.

¹⁵ Suka sile iciwelewele ca muntu icingaomba imilimo mpaka citemboke cakuti ciponge ni nzila yakuswililila ku muzi.

¹⁶ Impanga ikaya mu ntazi lilyo lino kateeka wakweyo umwance, nga na lino intunguluzi zyaiko zikacesya mu miteweto.

¹⁷ Lelo impanga ikaya nu longo lilyo lino kateeka wakweyo akapingula ivintu umweneco, nga na lino intunguluzi zyaiko zikalinga pakuipakizya, nupya pa nsita isuma, nupya zisikoleka awe.

¹⁸ Umuntu umwi ndi waya umukasu, waposiwa ukusomela ipaala lya ng'anda yakwe, ing'anda iyo ilanyeka nga ilawa nu kuwa.

¹⁹ Vimulo vingakusansamusya, alino waini nawe angakuzanzya. Lelo utange uzane vyoili vii ukwaula impiya.

²⁰ Utalengulula kateeka, nanti umu mwenzo wako kwene. Nupya utalengulula umukama, nanti umu muputule kwene wa musanzi wako. Pano limwi akunyi nanti akazizi akakapapuka kangasenda amazwi yayo nu kuyanena antu yayo vino walukutaka.