Kasambilizya 1 - Amazwi Yakwe Leza 2013

Umi wene uwasilesile

¹ Yaa, ali mazwi yakwe Kasambilizya, umwana wakwe Davidi, uwali kateeka mu musumba wa Yelusalemu.

² Kasambilizya walanda wati, “Vyonsi vitakwata muzano, mutaya muzano. Umi mutaya muzano, vyonsi sile mutaya muzano.”

³ Umuntu akasumba insita mu wikazi ala akuomba, akwazika, lelo uzye ivyani vino akatumbulamo?

⁴ Imikulo ikavyalwa nupya ipita, lelo insi yene yaya sile icili conga.

⁵ Ilanzi likatunka, nupya iliwa, kuswililoka muli mumwi nupya.

⁶ Umuza ukapunga kuya ku kayeya, iupunga kuya ku katutu, iwalukuzinguluka nga wiza ufika kuno watandikile,

⁷ Inguzi zyonsi zikapita ziitila muli yemba, lelo yemba asizuula. Amanzi yaswilila ku ntulo ya nguzi kuno yafumile. Nupya yatandika ukupita.

⁸ Ivintu vyonsi vikatendusya, kutendusya kwacipezya amano. Amanso itu yakalola lelo yasyalola kuti cifuule, amatwi itu yakauvwa, lelo yasiiuvwa kuti cifuule.

⁹ Vyonsi ivyacitike mpiti nupya vilacitika. Cino icaomvilwe mpiti nupya cilaombwa. Mu nsi mutaya icintu cimwi icipya.

¹⁰ Antu yakati, “Silola! Icintu cii icipya.” Lelo awe na mpiti kwene cacitike, mpiti mpiti, lino tutali tuvyalwe.

¹¹ Aici kutaya umuntu wino akaiusya ivyacitike mpiti. Nupya mu manda akunkolelo kutalaya aliusya ivyacisila.

Ukulondelezya amano ukuicuzya sile

¹² Nene, ne Kasambilizya nali kateeka wa ina Izlaeli mu Yelusalemu.

¹³ Nelenginye kuti ningalondelezya pa vintu ivikacitika umu nsi. Si lolini icisendo cino Leza watufumbatika swe antunze.

¹⁴ Nemo pano nalola ivintu ivyacitwa mu nsi ii, nga nkumunena ukuti ala cii icasilesile. Cili wakuzinganya umuza.

¹⁵ Utange uolole cintu icinyongane, utange upende ivintu ivisipo.

¹⁶ Nelenginye inti, “Nemo natinkwata amano kuluta yakateeka yonsi ankolelile ukuteeka muno mu Yelusalemu. Nemo natimanya muno amano nu kumanya vyalola.”

¹⁷ Nelenginye kusambilila kuti imanye upusano pakasi ka mano nu uwelewele, na pakasi ka mano nu upena. Lelo nazanyile ukuti limwi nani kwene ningazinganya umuza.

¹⁸ Lino wakwata amano avule, na masakamiko nayo ala yavulisya. Lino wamanya ivingi, ukulunda ucuzi.