Hagai 2 - Amazwi Yakwe Leza 2013

Ukuyemba kwa ng'anda ikulu yake Leza iipya

¹ Pa wanda walenga ikumi na onga, umu mwezi wakwe cinimbali uwa kuteeka kwakwe Dalyusi, umwene waku Pesya, Yawe wapile izwi kuli kasema Hagai.

² Ni izwi lyalungime Zelubabeli umwana umonsi wakwe Syeatieli, musika mukulu uwa ku Yuda, na kuli Yoswa umwana umonsi wakwe Yeozadaki, Simapepo Mukulu nga na kuli yauze yonsi ukuti,

³ “Uzye pangayako yamwi pano muli atazile yalolako ululumbi ulwakweti Ng'anda ikulu ii yakwe Yawe? Uzye icumi kwene mutakuilolela ukuti lyene umucinzi nu lulumbi vyati visila?

⁴ Lelo nanti cingaya vivyo kwene ne Yawe nkuti, uposye mwine Zelubabeli, uposye mwine Yoswa we mwana monsi wakwe Yeozadaki, we simapepo mukalamba, muposye mwe antu mwensi kwene, mwe ikazi amu mpanga. Acino tandikini umulimo pano nene ne Yawe namayanga namwe lyonsi pe.

⁵ Mutuvwa intete awe, pano umupasi wane uli pano muli kuti umwazwe muli vyonsi vino mukucita ndi vino nalavile lino namufumizye umu Eguputo.”

⁶ Vino nkumunena ne Yawe Wamaka Onsi aivi, “Pasyala sile panono ale natensya iyulu ni nsi yonsi, yemba ni cituntu kwene nga na vyonsi ivyaya mwenemo.

⁷ Indi nu kusunkanya imitundu ya antu yonsi iyaya muno nsi alino ni cuma cao cilaletwa kunondi, icakuti nupya kwene Ng'anda yane ikulu ilazulamo ululumbi lukulu. Nene nkuvwanga ne Yawe Wamaka Onsi.

⁸ Siluva na zaabu vyonsi ivyakwane.

⁹ Ali cino ululumbi lwa Ng'anda ii yakwe ciili lulaluta pa lulumbi lwa Ng'anda ya pakutandika iyaliko. Nupya indaleta untungwa nu mutende panonsi ponsi. Ivyavwanga Yawe Wamaka yonsi.”

Kulanda pa vyakuikowezya

¹⁰ Pa wanda walenga amakumi yaili na yani, umu mwezi wakwe fundimbali uwamu mwaka wakwe ciili, uwa kuteeka kwakwe Dalyusi, umwene waku Pesya, nupya kwene Yawe wapile izwi kuli kasema Hagai ilyakuti,

¹¹ “Vino nkulanda nene ne Yawe Wamaka Onsi aivi: Londini yasimapepo kuti yaputule umulandu uu:

¹² Ndi cakuti umuntu umwi wafundila inyama iziliziwe, iyo iyatuzilwe ngi mpolelwa umu nsalu yakwe, alino insalu yakwe yakumya ku nsima nanti uku musunyi nanti kuli waini nanti uku mafuta ya miolivi nanti uku cakulya icili consi sile, uzye ivyakulya vyonsi ale vyaya ivikowele?” Yasimapepo nayo ali pakwasuka yati, “Awe.”

¹³ Papo kwene Hagai ayuzya nupya ati, “Ndi cakuti umuntu wakweyowezya pa kukumya uku cala ca muntu alino waya walema ivyakulya, uzye vyonsi kwene vingaya ivikowele?” Yasimapepo apali pakwasuka yati, “Ee navyo kwene ala vyakowela.”

¹⁴ Lyene Hagai avwanga ati, “Vino Yawe akuvwanga aivi: Icili cimwi na antu kwene yaa, nupya icili cimwi nu mutundu kwene onsi uu apa manso yane. Ivicitwa vyao vyonsi kumwi ni mpolelwa zyao zyonsi izikowele nupya izya mifitalila ku mulola wane.

Yawe walaya ukuyapolelela.

¹⁵ “Lyene mutale mwelenganye ivyali nu kuyacitikila lino yatatala yatandika ukukula Ng'anda ikulu yakwe Leza.

¹⁶ Pano umuntu wakweti upaalilo wakuzombola ingano ya mpokoso makumi yaili, lelo azombola sile ikumi lyonga. Ndi walooka kuti akanyemule insembo makumi yasano yakwe waini, aya anyemula sile amakumi yaili.

¹⁷ Anene kwene nononyile imbezu zinu zyonsi ku tuzizi, uku munyezi alino nuku mvula ya mawe. Lelo pali vyonsi vi musikutala mwelenganya ukuti mungazenzuka. Kuli kuvwanga kwakwe Yawe.

¹⁸ Ilelo uwanda uwalenga makumi yaili na yani, umwezi wakwe fundimbali auno umufula wa Ng'anda ikulu yakwe Yawe wikwa. Acino mwelenganyepo lyene pali ci,

¹⁹ mutakweti ing'ano izingi umu nkoma zinu. Amatingi, amasamvu, imipomegeleneti ukwikapo ni miolivi kwene vyonsi vitaseeka. Lelo ukutandika pa wanda wi lelo kwene nemo namamupolelelanga pe.”

Ulayo wakwe Yawe kuli Zelubabeli

²⁰ Pa wanda kwene uwalenga amakumi yaili na yani uwa mwezi kwene ulya, Yawe wapiile Hagai izwi iila lyakwe cili ilyakuti,

²¹ “Umunene Zelubabeli umulasi waku Yuda ukuti indi nu kutensya iyulu kumwi ni nsi yonsi iya pansi.

²² Indi nu kuwisya yamwene yonsi amitundu ya inamasi yonsi nga nu kulovya maka yao. Indi nu kuzangawalika amaceleta na akakwelapo yonsi. Indi nu kulovya imfwalasi zizi na akakwelapo yonsi yali nu kukomana.

²³ Nene ne Yawe Wamaka Onsi amazwi yane aeya: Pa wanda kwene uo wemo we muomvi wane Zelubabeli, we mwana monsi wakwe Syeatieli, indakutoola nu kukulasika apa wene mwi zina lyane, pano ale nati nkusolola. Kuu kuli kuvwanga kwane ne Yawe Wamaka Onsi.”