Hagai 1 - Amazwi Yakwe Leza 2013

Ucincizyo wa kukuula cipya cipya Ng'anda ikulu yakwe Leza

¹ Mu mwaka wakwe ciili uwa kuteeka kwakwe Dalyusi, apa wanda uwakutandika uwa mwezi wakwe mutanda, amazwi yakwe Yawe yafikiile kuli kasema Hagai. Amazwi yali akunena Zelubabeli, umwana umonsi wakwe Syeatieli, umulasi waku mpanga yaku Yuda. Nga alino nakuli Yoswa, umwana umonsi wakwe Yeozadaki, Simapepo Mukulu.

² Yawe Wamaka Onsi wanena Hagai wati, “Antu yaa yakuvwanga yati, ‘Ndakai isi nsita ya kukuula cipya cipya Ng'anda ikulu yakwe Leza.’ ”

³ Fwandi ali cino Yawe wavwanga ukupitila muli kasema Hagai wati,

⁴ “Mwe antu yane uzye mwemo icamuzipila icani apakuti mwemo mwaikala umu mang'anda inu ausaka lino Ng'anda yane ikulu ili icipompa?”

⁵ Uli mulandu uno Nemo ne Yawe Leza Wamaka Onsi nkuvwanga kuno muli nkuti, “Simwatala mwelenganyapo nu kukutumala pa vintu vyonsi ivikamuponela!

⁶ Akula mwakomela imbezu izingi lelo mukazombola sile tunono. Nanti mungalya lelo musiikuta, imumwa lelo ulusala lutangaputuka. Nanti limwi imuzwala lelo ukwaula ukukankamuka. Ukufola kwene nanti mungafola impiya kuno muli mwe yakaomba lelo zitalatala zivule nanti panono. Mwakolana na antu akasembela amanzi umu cituluke.”

⁷ Uli mulandu uno Nemo ne Yawe Wamaka Onsi nkumunena nkuti, “Mwelenganyepo lili pamulandu kwene uu.

⁸ Yangini uku myamba mukalepule imbao apakuti mwize munkuulile Ng'anda ikulu iisuma iyakuti naikalamo nu kucindamikilwa mwenemo.” Avino Yawe wavwanga.

⁹ Mwemo mukupaalila ukuzombola ivivule, lelo silolini vino mwazombola sile tunono. Lino mwakoozyanga ivilimwa vinu, anene navipasanga nu kuvisalanganya. Acino nene ne Yawe Wamaka Onsi nkumuuzya nkuti, “Uzye apacani cino nacitilanga vii kuno muli? Apamulandu wakuti Ng'anda yane ikulu icili cipompa lino mwemo mukutwalilila ni milimo inu, nu kwikala umu mang'anda inu asuma.

¹⁰ Uli mulandu uno mwalola imvula yapisya icilala yati mpii, nu musili uma ndii.

¹¹ Acino naponya icilala panonsi ponsi, pa vyalo vinu vyonsi vya ngano, ni vyalo vya matingi ni miti ya miolivi nga alino na pavimelwa vyonsi vyapano nsi pa musili, nivya vilimwa vyonsi nga na pa antu yonsi ni nyama kwene.”

Antu yuvwila ilamulo lyakwe Yawe

¹² Papo kwene ali pano Zelubabeli umwana umonsi wakwe Syeatieli, Yoswa umwana umonsi wakwe Yeozadaki, simapepo mukalamba, alino na antu yonsi awelulwike uku uzya iyacitila ndi muno Yawe wayapelile ilamulo. Nga antu yonsi iyuvwila malamulo yano Hagai, kasema wakwe Yawe, watungulwile, nga yuvwa intete izikalamba cuze.

¹³ Alino Hagai, intumi ilya ilondolwela antu amazwi yakwe Yawe ndi muno yaelile akuti, “Nene ne Yawe nkumumanyisya ukuti namayanga namwe pe.”

¹⁴ Lyene Yawe acincizya umwenzo wakwe Zelubabeli umwana umonsi wakwe Syeatieli, musika waku Yuda, na Yoswa umwana umonsi wakwe Yeozadaki, Simapepo Mukulu nga na antu yonsi pyu. Iyakatuka iyatandika umulimo wa kukuululula Ng'anda ikulu yakwe Leza Wa maka Onsi, Leza wao,

¹⁵ pa wanda walenga amakumi yaili na yani, uwa mwezi wakwe mutanda uwa mwaka wakwe ciili uwa kuteeka kwakwe Dalyusi.