Habakuku 3 - Amazwi Yakwe Leza 2013

Ipepo lyakwe Habakuku

¹ Lii, lili pepo lyakwe kasema Habakuku ukulingana ni mimbilile yakwe Syigionoti

² We Yawe, natinuvwa vyakulumbuka kwako. We Yawe nupya nuvwa intete. Acino ivicitwa vyako kwene vii, uviswilizye nupya kwene kuti viye vimanyikwe amanda kwene yaa, ivizungusyo vikulu vino wacitanga. Lelo ukwate uluse nanti umu nsita kwene ino watusoka.

³ Leza umwisikulu ali nu kwiza iila lyakwe ciili ukufuma ku Edomu. Leza wamuzilo ali nu kwiza ukufuma ku myamba yamu mpanga ya Palani. Ucindami wakwe wakupa iyulu, ni nsi izilemo ululumbi lwakwe.

⁴ Wene akaiza kunotuli nu kumyansya kwa nkuwa. Uluswepo lwakwe lukayengesa ilufuma mu makasa yakwe, kuko ukwazula amaka yakwe afisame.

⁵ Wene akatuma impungo ya ndwala apa nkolelo yakwe nu kupeela ilamulo ku mfwa kuti ilondele apacisila cakwe.

⁶ Wene ndi wimilila, insi yonsi ikatenkana. Ndi walolekesya, insi yonsi izakaza. Imyamba yape ikasunguluka ni milundu yamuyayaya nayo ikalokotela pansi. Ikwene ili milundu ino twapitangamo.

⁷ Naweni aina Kusyani yali mu ntazi na ina Midyani ala yatiyavulungana.

⁸ We Yawe uzye inguzi izyatizikukalifya? Uzye imilonga yatikuletela icipyu? Uzye a yemba uwakusosizye, lino wakwezile pa mfwalasi zyako nu kuleta ucimvyo ku antu yako?

⁹ Wemo waiteinye ukuzumba ulapwa wako, nu kufiika inceto zyako. Inkuwa zyako zyapalunkinye insi ni nguzi.

¹⁰ Lino imyamba yakulola, itandika kuzakaza. Amanzi yapongoloka ukufuma ukwiyulu. Na maimbi yakatuka papela wakwe cimwi.

¹¹ Ilanzi nu mwezi ivimilila umwiyulu, apakulola ukuyengesa kwa nceto zyako, nu kukaoka kwa kuyengesa kwi sumo lyako.

¹² Wemo mu ukali wako uwiza usalala ukucilinganya insi yonsi, ulyatola antu amitundu yonsi mu cipyu cako.

¹³ Wemo wafumile nu kuya kulula antu yako, ku kutuula kateeka wino wasolola. Wemo wakomozile intunguluzi zya antu ankota, nu kulovya alondezi yakweyo yonsi pyu.

¹⁴ Mwemo uku nceto zinu mwalasile musika wa mpuka ya vita vyakwe, vivyo ivizile ungati icipupu ku kutusalanganya. Ala yakutuseka kwati awiya amaleta ivisuma, fwandi ala uononesi sile ku apina.

¹⁵ Wemo pa mfwalasi zyako walyatozile pali yayemba yakalamba na manzi amuli yayemba yapasika.

¹⁶ Ndi nuvwa vyonsi vii, awe Mwene nkuvwa intete. Ni milomo yane izakaza nu kulumanya incecete pamulandu wa congo. Umwili wane onsi iuma uti kwililili. Alino ni ngazo zyane izipumika pansi.

¹⁷ Cingaya cemvya nanti umutingi utangaseeka ivizao, nu musamvu utangaya ni luwa nu kuseeka ivizao, ni cazi kwene citangaseeka, lelo umu vyalo vyao mutakatale mufume kamwi. Nga imfwele mu vitata ni ng'ombe zyao kwene mu nduwa zifwe zilukute zyonsi.

¹⁸ Lelo nemo namazangila muli Yawe, namakwatanga insansa pamulandu wakuti Leza a Katuula wane.

¹⁹ Yawe Simwandalali aliwe akampeela amaka. Wene akakomya amakulu yane kuti naimilila wakwe mpombo, pakuti ningakwela na papela ya mwamba. Yakasaula ya nyimbo, si yale yimbile na mazeze.