Habakuku 2 - Amazwi Yakwe Leza 2013

Yawe waasuka Habakuku

¹ Namayanga nga kalinda wa mpongolo akwimilila apapela yi linga. Indi nu kulolela vino Yawe alangasuka alino ndamanya vino wene alangasuka pakuilizyanya kwane.

Yawe waasuka

² Yawe wangaswike ati, “Lemba umbwilo uu, uulembe ningo apa vipampa, kuti umuntu uwalola awelenge ukwaula intazi.

³ Uumbwilo uu uli nu kufikiliziwa apa nsita yakweo ilingine, ino ili nu kufika ukwaula kuzimba. Nupya ulacitika ukwaula kutwisika. Lelo ndi mwalola ukuti wene wazimba, nemo nkuti muulolele mutazukuwa. Wene ulafikiliziwa ukwaula kucelwa nanti ukulezyalezya.

⁴ Uu uli usemo: Yakacita ya viipe yalalowa, l lelo yakacita ya visuma yalaya nu umi. Yonsi akacita vyaololoke yalaya nu umi pano yene acumi kuli Leza.

Ukuzanwa kwa antu asicita vyaololoke

⁵ Ndi vino umuntu uwatakoleka uwengwa akavulungana, ali vino na wensi akaitukumula atakwata iteko. Avino na antu a lwiswa yakolana ni mfwa itiikuta. Yene yakalema antu amitundu yonsi nu kuyakonganika wa antu yao.

⁶ Lelo yao ati yalemwa yalamutumfya nu kumusausya pakuvwanga yati, ‘Kalanda kuli wino akaikolonganikila icuma cakwiya, wiyo akalonkela umu nkongole zya umfisolo. Uzye wene alatwalilila ukufika lilaci?’ ”

⁷ Yano wapokolola icuma yalakukatukila lino wemo utali kuti umanye cico. Yalakoofya nu kukupoka icuma cako consi.

⁸ Pano wemo wasampa ivingi ukufuma ku mitundu iingi, acino antu alapusuka yaliza yakusampe ivyakwako. Pano wemo wakoma antu aingi nupya wemo onona imisumba yonsi kumwi na antu akaikalamo.

⁹ “Kalanda ku antu yano yakalonkela umu kwiila auze pakuti alio yacingilile uwikalo wao, nu kuleuka uzanzo nu ucuzi pa mili yao.

¹⁰ Wapangile ukonona antu amitundu iingi, lelo wemo waletelela akazi kako insonyi nu kuponzya umi wako.

¹¹ Ni ngelwa zya ciumba ca ng'anda yako nazyo kwene zikukulilila nga ni nsondo zyonsi nazyo kwene zikutolelela.

¹² “Kalanda kuli wino akakuula umusumba umu utazi wa katwe nu kuumalila mu kukalala.

¹³ Antu yano mwacimvizye iyatovoka pamulandu wa milimo ya mulaza uwasilesile. Na vyonsi vino yatukuta vyati vipya nu moto. Antu amitundu yonsi yakwazya sile amaka yao. Vii ivicitwa vyakwe Yawe.

¹⁴ Lelo insi nu kukwata umanyililo wa ucindami wakwe Yawe, ndi vino yayemba yakulu yazula amanzi.

¹⁵ “Kalanda ku muntu wino akamwesya auze cakumwa icilume. Umu cipyu cinu mwatitikizya nu kuzewanya ainipamba. Mwemwe mwalenzile kuti yapita yakupempezyoka uti yatiyakoleka.

¹⁶ Mwemwe lyene mulasauka mucifulo cakucindama. Mwemwe mulamwa nu kupempezyoka. Yawe alamusunda cakuti mulamwela ku cisengo, nga nu kucindama kwinu kulasanguka ukusauka.

¹⁷ Mwakomola imitengo yaku Lebanoni. Lyene namwe muli nu kuputolwa mpaka pansi. Mwakomozile ni nyama zyonsi zyamu mutengo kwene. Lyene inyama izilamoofya. Vii vilamucitikila pano mwemo mwali atazi ya katwe. Nupya mononyile imisumba kumwi na ikazi ya mwenemo.

¹⁸ “Uzye umulimo cii uno akaluwi kakwata? Kene kapangwa sile nu muntu, nupya katange kamunene icili consi suka intumpu. Uzye icani cingalenga ukuti kapanga wa kaluwi akataile? Utuluwi tuno wene akapanga tutangavwanga.

¹⁹ Kalanda ku muntu wino akanena umuti ati, ‘Zyuka!’ Nanti iciliwe ati, ‘Katuka!’ Uzye akaluwi nako kangamunena icakucita? Nanti angala antu yangakapomela siluva na zaabu, lelo musi umi muno kali.

²⁰ Lelo Yawe wene ali umwi Taalu lyakwe ilyamuzilo. Acino lekini umuntu wensi aye cele pa manso yakwe.”