Galatiya 5 - Amazwi Yakwe Leza 2013

Klistu akapeela untungwa

¹ Untungwa auno tukweti pano Klistu watukulula. Lyene ndakai twikale antungwa nupya tutakaye azya ya Masunde.

² Uvwini! Nene, ne Paulo, nkumunena ukuti ndi mwazumilizya kuti musilamulwe, ale cikusenula vino Klistu asi nu mulimo kunomuli.

³ Nupya kwene nkusoka umuntu wensi ukuti ndi wazumilizya kuti asilamulwe, ale lyene alinzile kuyela Masunde yonsi.

⁴ Mwe muno mukaezya kucitwa kuya aololoke pa manso yakwe Leza pa kuyela Masunde, mwaipaatula kuli Klistu, nga nu ku cikuku cakwe.

⁵ Lelo swemo, upaalilo witu uwakuti Leza alatucita kuya aololoke pa manso yakwe. Na cii, acino tukulolela nu kusininkizya mukuomba kwakwe Mupasi Wamuzilo mu utailo witu.

⁶ Pano lino twaya yakwe Klistu Yesu, lyene kusilamulwa nanti kuntasilamulwa kusyalanga kupusana kumwi. Lelo cintu cino mulinzile kusakamala utailo winu ungamulenga kutemwana.

⁷ Mwacitanga sile ningo nkolelo! Uzye lyene aweni uwamuongwile kuti mute kuyela cumi? Uzye wamupatikizye uli?

⁸ Leza, wino akamwama asi aliwe uwacita cii.

⁹ Citutumusi cinono sile cingalenga ukuti munya onsi ututumuke.

¹⁰ Nemo mu Mwene ncili nkutaila vino mwemo mutalazumila lango lyuze ilipusane ni lyakwane. Lelo muntu akumuvulunganya alavunukwa na Leza.

¹¹ Inane, ndi ncili nkukosola ukuti kusilamulwa kukulondekwa kucitwa, uzye pacani ncili nkuzunyiwa? Mu cumi nda vino cili, lyene ale kukosola kwane pamulandu wa lupanda lwakwe Klistu kutangaleta intazi.

¹² Ningatemwa ukuti antu yano akumuvulunganya yangasilamulwa, nga nu kucila pali cii yaitungule aisikulu!

¹³ Lelo mwemo inane, Leza wamwama kuti muye antungwa. Lelo mutaleka untungwa uu, uye ni nsambu yakuleka kuti mutekwe uzya ni vilondwa vinu vya mwili. Mu cifulo cakwe cico lekini kutemwa kumutungulule mu kutumikilana.

¹⁴ Pano Masunde yonsi iimikwa mwi lamulo lii likati, “Uwatemwa umuzo ndi vino waitemwa.”

¹⁵ Lelo ndi micitile inu yaya wa micitile yanyama, kulwisyanya nu kucisana, mucenjele pano limwi mungasila kuyonona.

Mupasi Wamuzilo asyazumilizyanya nu untunze

¹⁶ Nemo nkumunena ukuti, lekini Mupasi Wamuzilo atungulule umi winu, nga lyene mutalazanzya vilondwa vya untunze.

¹⁷ Pano vintu vino untunze witu ukalonda vyapusana na vino Mupasi Wamuzilo akalonda, nga ni vintu vino Mupasi Wamuzilo akalonda navyo vyapusana na vino untunze ukalonda. Vii vyoili vyaya pa wanisi na cii cikusenula ukuti mutangacita vino mukasi kucita.

¹⁸ Lelo ndi mukutungululwa na Mupasi Wamuzilo, ale lyene mutangaya azya ya Masunde.

¹⁹ Vintu vino untunze ukacita vyene vyamanyikwa pa swe. Vyene vikaloleka mu vicitwa vya winyi, vikowele nga ni vya nsonyi,

²⁰ mu kupepa tuluwi nu mu ulozi. Antu yakaya anisi nga nu kulwa. Yene yakazuwilana nu kusokana, nu kupaatukana.

²¹ Yene yaya nu muvimbila, akolesi nupya yakacita ya muzangalwe nga navyuze vikoline na vii. Ndakai nkumuceula ndi vino namucewile inkolelo ukuti, yao akacita vintu vii yene yatalapyana Wene wakwe Leza.

²² Lelo Mupasi Wamuzilo wene akatulenga kuti twatemwana, kuya nu luzango, mutende, kuteeka mwenzo, uluse, cikuku, kuya a cumi,

²³ kuicefya, nu kuikanya. Kutaya Masunde akalwisyanya ni micitile ii.

²⁴ Yao ali yakwe Klistu yene yata ivya untunze wao nga ni vilondwa vyauko.

²⁵ Mupasi Wamuzilo aliwe watupeela umi. Acino tulinzile kumuyela kuti atungulule umi witu.

²⁶ Tutalinzile kuitutumula nanti kusosyanya nanti kuzuwilana.