Galatiya 3 - Amazwi Yakwe Leza 2013

Utailo ili nzila sile

¹ Mwe ina Galatiya viwelewele mwe! Uzye aweni watamupumvyanya? Nalondolola ningo pa manso inu mulandu wa mfwa yakwe Yesu Klistu pa lupanda!

² Ningatemwa kumanya cintu conga kufuma kunomuli. Uzye mwapokelile Mupasi Wamuzilo pa kuyela Masunde nanti mukuuvwa nu kutaila Ilandwe?

³ Uzye lyene mungaya viwelewele uli? Uzye vino Mupasi Wamuzilo watandike kuomba munomuli lyene avino mukwelenganya mungamalila na maka ya untunze?

⁴ Uzye vintu vino mwapitangamo vitakusenula cimwi? Mu cumi pali vino vikusenula!

⁵ Uzye Leza akamupeela Mupasi Wamuzilo nu kuomba vinjelengwe pakasi kinu pamulandu wakuti mukayela Masunde, nanti pamulandu wakuti muvwa nu kutaila Ilandwe?

⁶ Elenganyini pa vintu vino Abulaamu wapisilemo, ndi vino calembwa mu malembelo cati, “Wene wataile Leza, nga pa utailo wakwe, Leza wamuzumile kuya mololoke.”

⁷ Lyene mulinzile kumanya vino vizikulula vya cumi vyakwe Abulaamu antu yano yaya nu utailo.

⁸ Malembelo yasowile ukuti Leza alacita Akulukuwa kuya aololoke pa manso yakwe umwisikulu kupitila mu utailo wao. Acino Leza wanenyile Abulaamu Ilandwe Lisuma lyakuti antu amu nko zyonsi yalapolelelwa pamulandu na aliwe.

⁹ Abulaamu wataile nga Leza amupolelela. Caleka yonsi ataila pamwi na Abulaamu Leza alayapolelela.

¹⁰ Muntu akaikalilila mukuyela Masunde ala wene ali mu citipu. Pano calembwa mu malembelo cati, “Wino wensi asyayela pe vyonsi ivyalembwa mu lupapulo lwa Masunde ala wene umutipwe!”

¹¹ Lyene cili paswe ukuti kusi umwi angacitwa kuya mololoke pa manso yakwe Leza pakuyela sile Masunde, pano nupya calembwa mu malembelo cati, “Suka sile umuntu uwacitwa kuya mololoke pakutaila aliwe alaya nu umi.”

¹² Lelo Masunde yatemelela ku utailo. Ndi vino calembwa mu malembelo cati, “Wino wensi akayela vyonsi ivyalembwa mu Masunde wene alaya nu umi.”

¹³ Lelo Klistu watukulula ku citipu ca Masunde, lino umwisikulu waipile kuya citipu mu cifulo citu. Pano calembwa mu malembelo cati, “Wiyo wensi uwatanwa pa cimuti ala citipu cakwe Leza cili panoli.”

¹⁴ Klistu wacita cii kuti upolelelo uno Leza walavile kuli Abulaamu upelwe ku Akulukuwa muli Klistu Yesu. Cii cacitike kuti mu utailo tungapelwa Mupasi Wamuzilo wino Leza walavile Abulaamu.

Masunde nga nu ulayo

¹⁵ Inane, namaomvya cilangililo ca vintu vikacitika iyonsi, kuti ndondolole ningo vino nkusenula. Lino antu yaili yapangana kusi umwi angasenula nanti kulundako cimwi ku cipangano cico.

¹⁶ Vii avino cili ku malayo yano Leza wacisile kuli Abulaamu ni cizikulula cakwe, vino malembelo yakati malayo yatapilwe ku “Vizikulula ivingi,” lelo “Ku cizikulula,” kuli kuti wenga, na wiyo a Klistu.

¹⁷ Cino nkusenula cakuti Leza wacisile upangano na Abulaamu nga alaya kufikilizya. Masunde yatangasenula upangano uwo nanti konona ulayo wakwe Leza uno wacisile kulingana pa myaka myanda ini na makumi yatatu lino Masunde yakwe Mose yatali kuti yapelwe.

¹⁸ Pano ndi tukuyela Masunde pakuti tupokelele upolelelo wakwe Leza, lyene ale mu cumi upolelelo uwo utakupelwa kunotuli pamulandu wa ulayo wakwe Leza. Lelo cali apamulandu wa ulayo wakwe acino Leza wapile upolelelo kuli Abulaamu.

¹⁹ Uzye lyene Masunde yakwata mulimo cii? Masunde yapilwe pakuti yatulange vino tukaifya, lelo yali akuti yaomba kufika nu kukwiza kwa cizikulula cakwe Abulaamu wino ulayo wapilwe kunoli. Angeli ayano yalesile Masunde ku muntu uwali nu mulimo wakukundanya.

²⁰ Kwaya sile Leza wenga, nga Masunde nayo yatapilwe kwaula umuntu wakukundanya.

Mulimo wa Masunde

²¹ Uzye cii cikusenula vino Masunde yasyazumilizyanya na malayo yakwe Leza? Awe, cisi vivyo! Pano antu ndi yapokelela Masunde angayapeela umi, ale lyene umuntu ali wensi angacitwa kuya mololoke pa manso yakwe Leza pakuyela Masunde.

²² Lelo calembwa mu malembelo ukuti iifyo lyateeka antu yonsi uzya. Caleka uwila uno Leza walaya uwakwe wino wensi uwataila muli Yesu Klistu

²³ Lino insita yali itali ifike, Masunde yatwangalilanga wa azya kufika na lino insita yafisile yakuti tutaile.

²⁴ Acino Masunde yali wa mwangalizi witu. Yene yali akutwangalila kufika nu ku kwiza kwakwe Klistu, pakuti tungacitwa aololoke pa manso yakwe Leza pa kutaila munoli.

²⁵ Lelo lino umuntu wasambilila kutaila, citangalondekwa kuti nupya Masunde yaye kangalila wakwe.

²⁶ Mwensi kwene mwemwe ana yakwe Leza pa kutaila muli Klistu Yesu.

²⁷ Na lino mwawatiziwe apa kutaila muli Klistu mwazwite Klistu mu musango uli onga ndi vino mukazwala vizwalo vipya.

²⁸ Caleka pasi upusano pakasi ka Ayuda na Akulukuwa, azya na antungwa, aonsi na anaci. Mwensi mwaya wenga pa kutaila kwinu muli Klistu Yesu.

²⁹ Ndi mwemwe yakwe Klistu, lyene ale mwemwe vizikulula vyakwe Abulaamu nga mulapelwa vino Leza walaya.