Galatiya 2 - Amazwi Yakwe Leza 2013

Paulo waya pamwi na atumwa yauze

¹ Pacisila ca myaka ikumi na iini, naswilile ku Yelusalemu pamwi na Banaba nga na Tito.

² Napisile pamulandu wakuti Leza wasokolwile kunondi ukuti ndinzile mpite. Lino twakomenkine ni ntunguluzi mu nkama nalondolwile Ilandwe lino nakosozile ku Akulukuwa. Nalondanga kusininkizya vino mulimo wane pa mpiti nga nu mu nsita ikwiza utaya uwasilesile.

³ Tito wino twali nawe, nanti wali u Mugiliki, yatamupatikizye kusilamulwa,

⁴ nanti angala yamwi yalondanga ukuti avino ciye. Antu yaa, iizanga kwati nayo yataila, lelo yene yasokelelanga mwiumba litu wa nengu, pakuti yangalondelezya untungwa uno twakwata muli Klistu. Yene yalondanga kutucita azya.

⁵ Lelo pakuti tucingilile cumi ci Landwe, swemo tutayasilile mweko nanti panono.

⁶ Lelo yao alolekanga kwati intunguluzi, nkulanda cii kunoyali pano kunondi ntasakamile vino yali. Leza asyapingula umuntu ku milolekele ya kunzi. Intunguluzi zizyo zitalunda cimwi cipya kwi Landwe.

⁷ Ku mbali yuze, yene yaweni ukuti Leza wampile mulimo wa kukosola Ilandwe ku Akulukuwa, wakwe vino wapile Petulo mulimo wa kukosola Ilandwe ku Ayuda.

⁸ Pano kupitila mu maka yakwe Leza nacisilwe kuya mutumwa ku Akulukuwa, wakwe vino Petulo wacisilwe kuya mutumwa ku Ayuda.

⁹ Yakobo, Petulo na Yoane zili ntunguluzi zyamanyile vino Leza wampeela mulimo uwa kukosola Ilandwe. Caleka yalemine makasa na Banaba nga nani, tulamukana, kuti ciye cilangililo cakuti swensi twaya pamwi. Twazumilizyanyizye ukuti Banaba nani twaombela pakasi ka Akulukuwa nga nao pakasi ka Ayuda.

¹⁰ Cintu cino yene yuzizye sile kunotuli cakuti tulinzile kwiusya kusakamala apina aya mwi umba lyao, na cii cili cino nalondesyanga kucita.

Paulo wakalipila Petulo ku Antioki

¹¹ Lelo lino Petulo wizile ku Antioki, nemo namukalipile pa manso ukuti wene waluvyanya.

¹² Lino antu yamwi yano Yakobo watumile yatali yafike kuku, Petulo walyanga pamwi na Akulukuwa ataila. Lelo pacisila lino antu yaa yafika, Petulo aoopa yao alondanga kuti Akulukuwa yasilamulwe, nga atukulya na Akulukuwa.

¹³ Wene pamwi na Ayuda yauze yacisile usomvi cakuti na Banaba kwene wayalondelizye.

¹⁴ Lelo lino naweni ukuti cino yacita citaine ni cumi icaya mwi Landwe Lisuma, nakalipile Petulo inti, “Petulo, wemo wewe Muyuda. Lelo ukaikala wa Mukulukuwa, asi wa Muyuda. Uzye lyene, ungapatikizya uli Akulukuwa kuti yaikala wa Ayuda?”

Ayuda pamwi na Akulukuwa kwene yakatuulwa kupitila mu utailo

¹⁵ Mu cumi sweswe Ayuda kucivyalilwa nga tusi “Akulukuwa yakaifya,” ndi vino yakaamwa.

¹⁶ Lelo twamanya vino umuntu akacitwa kuya mololoke pa manso yakwe Leza pa utailo wakwe muli Yesu Klistu, lelo asi mu kuyela Masunde. Pano kusi umwi angacitwa kuya mololoke pa manso yakwe Leza mu kuyela Masunde.

¹⁷ Lyene ndi swe Ayuda, lino tukwezya kuya aololoke pa manso yakwe Leza, twazanwa kuya yakaifya ndi vino Akulukuwa yaya, uzye ale cikusenula ukuti Klistu uwatucita kuya yakaifya? Awe cipelele kutali!

¹⁸ Ndi natandika kukuula cintu camu Masunde cino nomolola lyene ale nkusininkizya vino nkolelo nali nene mpulamasunde.

¹⁹ Nafwile ku masunde, pano Masunde a nkoma. Nata kwikalilila mu masunde pakuti mu umi wane onsi naombela Leza. Nemo natanwa pa lupanda pamwi na Yesu.

²⁰ Nemo nafwa, lelo Klistu akaikala munondi. Umi uno ndakai ndi nao, nkaikala pakutaila mu Mwana wakwe Leza, wino uwantemilwe nga nu kupeela umi wakwe pamulandu wane

²¹ Nemo nsizumila kukana cikuku cakwe Leza, lelo ndu muntu akacitwa kuya mololoke pa manso yakwe Leza pakuyela sile Masunde ale lyene cikusenula ukuti cali icasilesile ukuti Klistu afwe.