Galatiya 1 - Amazwi Yakwe Leza 2013

¹ Kalata kufuma kuli ne Paulo, wino kwamwa kwane kwa kuya mutumwa kutafuma ku muntu nanti kupitila mu muntu, Lelo kwafuma kuli Yesu Klistu, na Leza Tata, wino uwazyukwile Klistu kufuma ku afwe.

² Aina itu yonsi ali kuno yatuma ulau wao ku mauvi amu Galatiya.

³ Cikuku nu mutende viye kunomuli kufuma kuli Leza Tata nu Mwene witu Yesu Klistu.

⁴ Klistu waipile mwisikulu wa mpolelwa umulandu wa maifyo itu, pakuti tungakululwa ku mukulo uu, uwipe. Wene wacisile cii, mu kuyela Leza witu ali Tata.

⁵ Lulumbi luye kuli Leza manda pe! Ameni.

Ilandwe Lisuma a lyonga sile ilya cumi

⁶ Nkuzunguka pamulandu wa miyele inu! Kwaula kusumba insita mwemo mukufutatila Leza wiyo uwamusolwile kupitila mu cikuku cakwe Klistu, nga nupya mukutaila ilandwe lyuze.

⁷ Mu cumi kutaya “ilandwe lyuze”, lelo nemo nalanda cii pano kuli antu yamwi yano yakumuvulunganya nu kwezya kusenula Ilandwe lyakwe Klistu.

⁸ Lelo nanti cingaya a sweswe nanti mungeli kufuma kwiyulu angakosola ilandwe lipusane na lino twakosozile kunomuli, cingazipa kuti Leza amuvunuke!

⁹ Vino twamunenyile mpiti avino nkumunena nupya. Muntu umwi ndi akukosola ilandwe kunomuli lipusane na lino mwataila, cingazipa kuti Leza amuvunuke!

¹⁰ Uzye pakulanda vii nkwezya kuzanzya antu nanti Leza? Awe cisi vivyo! Nemo nkasi kuzanzya Leza! Uzye nkwezya kuti ndumbuke ku antu! Ndi avino nkwezya kucita, lyene ntangaya muomvi wakwe Klistu.

Vino Paulo wizile aya mutumwa

¹¹ Lekini munene inane, ukuti Ilandwe lino nkakosola litafuma ku muntu.

¹² Ntalipokelile kufuma ku muntu, nupya kusi umuntu umwi uwansambilizye. Yesu Klistu umwisikulu uwalisokolwile kunondi.

¹³ Mwamanya vino nikalanga wa Muyuda mu upefi wa Ciyuda, na vino nazunyizye iuvi lyakwe Leza kwaula luse nga nu kuombesya cuze kuti ndyonone.

¹⁴ Nemo nalusile Ayuda yanji, yano tuine myaka mu kulondela upefi wa Ciyuda, nupya nali muipelesye mu kulondela ntambi zya vikolwe vitu.

¹⁵ Lelo Leza mu cikuku cakwe wene wansolwile na lino ntali kuti mvyalwe. Wene wangamile kwiza mutumikila.

¹⁶ Wasokolwile Mwana wakwe kunondi, pakuti ningakosola Ilandwe Lisuma lya pali aliwe ku Akulukuwa, nemo ntaile ku muntu ali wensi kuti ampande mano,

¹⁷ nanti kuya ku Yelusalemu ku kulandana na atumwa yao ankolelile. Lelo mu cifulo cakwe cii, nemo naile zuwa ku Alabya, nga pacisila mbweluluka ku Damasiko.

¹⁸ Cali pacisila ca myaka itatu lino naile ku Yelusalemu ku kulanzyanya na Petulo, nga natenzi pamwi nawe kulingana ni milungu iili.

¹⁹ Ntaweni mutumwa namuze sukasile Yakobo mwina wa Mwene.

²⁰ Vino nkulemba ivya cumi. Leza amanyile vino nemo nsyakutumpoka!

²¹ Pacisila cakwe cii nemo naile ku ncende zyamu Kilikya na Kilikya.

²² Pa nsita ilya vilundwa vyamu mauvi amu Yudeya vitatazile vindole nu kumanya.

²³ Yene yamanyile sile vino yauze yayanenanga yati, “Muntu wino watuzunyanga ndakai akukosola Ilandwe lino wezyanga konona!”

²⁴ Caleka yene yatasyanga Leza pamulandu wane.