Filipi 4 - Amazwi Yakwe Leza 2013

Utunguluzi

¹ Caleka, mwe inane nupya akundwe yane, nkulondesya ku mulola. Endi, lolini vino mukanzanzya, na vino nemo nkaitumika pamulandu winu. Nkumupapata kuti muye azyansye mu Mwene.

² We, Yuodia na Sintinke, nkumupapata kuti mwauvwana pano mwemwe yamangu aina mu Mwene.

³ Nawe kwene, we cuza wa cumi pa mulimo witu, nkulonda kuti wazwe yamama yaa. Pano yene yaombisye cuze pamwi nani mukusalanganya Landwe Lisuma, pamwi na Klementi nga na aomvi yanji yonsi yano ndakai mazina yao yalembwa mu lupapulo lwa umi.

⁴ Mwazanga mu Mwene. Nupya kwene nkuti mwazanga!

⁵ Mwalanga kuteka mwenzo ku antu onsi. Mwene akwiza zuwa.

⁶ Mutasakamikwa pa cintu cili consi, lelo pepini pamulandu wa vintu vyonsi, mule mukulenga Leza nu kutaizya mu myenzo.

⁷ Lyene pamulandu wakuti mwemwe yakwe Klistu, Leza alamupeela mutende uno kusi umuntu nanti wenga angaumanyikisya. Mutende kwene uu, ulatungulula umi winu ni myelenganyizizye inu.

⁸ Mukumalila, inane lekini myenzo inu izulemo kwelengenya vintu visuma vilinzile kutasiwa, ivya cumi, ivya mpomvu, visanguluke, viyembe, nga ni vyakucindikwa.

⁹ Mwacita vino mwasambilila kufuma kunondi, vyonsi vino navwanzile na vino mwaweni nkucita. Alino Leza wino akatupeela mutende, alaya namwe.

Paulo wataizya pa mawila yano wapilwe

¹⁰ Mu umi wane mu Mwene, caya ica luzango cuze kunondi ukuti pacisila ca nsita ntali mwemo alino mwatandike nupya kunsakamala. Ntakusenula ukuti mwemo mwatile kunsakamala. Mutakweti sile insita yakucita vivyo.

¹¹ Ntakulanda vii pa kwelenganya ukuti nuulilwa cimwi, lelo pano nasambilila kwikuta vino nakwata.

¹² Namanya vino cikasenula, kuulilwa nanti kuvulilwa. Nasambilila nkama ii, pakuti kuli konsi, nu mu nsita ili yonsi, inje mwikute, na lino nindya na lino indi ni nzala, na lino nkweti vingi nanti vinono.

¹³ Klistu wampeela maka akulungatana ni miyele ili yonsi.

¹⁴ Lelo mwacisile cisuma pa kungazwa lino nali mu nsita ya ntazi.

¹⁵ Mwe ina Filipi mumanyile ningo ukuti lino nafumile ku Makedoniya mu manda yano natandike kukosola Ilandwe Lisuma, mwemwe sile mwali iuvi lino lyangazwilizye. Mwemwe mwakumile ku mawila yano napokelile nga na yano napeelanga.

¹⁶ Na lino nali mu Tesalonika mwemo mwangazwilizye maila avule pali vino nulilwe.

¹⁷ Asi pamulandu wakuti nkulonda sile kupokelela cimwi kufuma kunomuli, lelo nkulonda kuti namwe mupokelele upolelelo kufuma mu kupeela.

¹⁸ Napokelela vyonsi, ndakai ntuulilwa. Nupya napokelela mawila yano Epaflodito wandetile kufuma kunomuli. Yene yakoline wa mununko usuma uwa wila uno wapelwa kuli Leza, impolelwa ino yapokelelwa na Leza nupya iya kumuzanzya.

¹⁹ Leza wane umukama cuze, nupya muli Klistu Yesu wene alamupeela vyonsi vino muulilwa.

²⁰ Alumbanyiwe Leza nupya Tata witu manda pe! Ameni.

Kulamuka kwakusyalikizya

²¹ Mundamukile antu yakwe Leza yonsi yakwe Klistu Yesu. Aina itu yano ali nani yamulamuka.

²² Antu yakwe Leza yonsi ali kuno yamulamuka, maka maka yao akatumikila mwi sano lya Mulasi uwaku Loma.

²³ Cikuku ca Mwene Yesu Klistu ciye namwe mwensi.