Filipi 2 - Amazwi Yakwe Leza 2013

Kuicefya nu ukulu wakwe Klistu

¹ Caleka ndi Klistu akumukomelezya, ndi nu kutemwa kwakwe kukamutekezya myenzo, ndi muli nu utandano wa Mupasi Wamuzilo, nga nu kusakamala nu kuya ni nkunkunsi na antu yauze,

² lyene mukafikilizya nsansa zyane. Mwikale mukusakamalana pa kulanga kutemwana. Mulemane mukwelenganya kwati limwi ukwelenganya kwa muntu wenga.

³ Mutacita cimwi mukuitemwa nanti mu cilumba, lelo muicefye nu kulola auzo ukuya acindame kuluta mwemwe.

⁴ Mutacita vingamuzipila mwenga sile lelo mwacita vingazipila na auzo kwene.

⁵ Mwacita nu kwelenganya mu musango uli onga na uno Klistu wakweti.

⁶ Nanti angala Wene lyonsi wali muli u Leza, 1lelo atelenginye ukuti angezya kupatikizya kulingana na Leza.

⁷ Lelo waicefizye, nu mukuitemelwa wasile vyonsi vino wakweti, atoola mwata wa muzya. Wene wizile aya umuntu nu kuloleka wa muntu.

⁸ Wene waicefizye nu kuyela Leza kufika nu ku kufwa kwakwe ukwa pa lupanda.

⁹ Pamulandu kwene uu, Leza wamukwezizye cuze amupeela zina lilusile mazina yonsi.

¹⁰ Pa kucindika zina lyakwe Yesu viumbwa vyonsi vya mwiyulu, pano pansi, nga na pansi ya nsi, vilamufukamila.

¹¹ Vyonsi vilazumilizya paswe ukuti Yesu Klistu Umwene, alino vilalumbanya Leza Tata.

Ina Klistu yaengesa wa lutanda mu nsi

¹² Caleka, mwe yakundwe yane, ndi vino mwayelanga nene lino nali pamwi namwe, lyene calondekwa ukuti ndakai lino nsi namwe mwayela kuluta. Twalililini kuomba mu coopo nu kuzakaza kuti mufikilizye ufyusi winu,

¹³ pano lyonsi Leza akaomba munomuli kuti mwalonda kuomba vivyo vingamuzanzya.

¹⁴ Mwacita vyonsi kwaula kuilizyanya nanti vikanza,

¹⁵ pakuti muye akaele, ana yakwe Leza aswepe nupya afumaluke, yano akaikala mu nsi ikowele nupya pakasi kakwe yakaifya. Mulinzile kuyengesa munoyali wa ntanda zino zikupeela luswepo mupela mwiyulu,

¹⁶ lino mukuyanena mazwi yano yakapela umi. Ndi mwacita vivyo, lyene nemo ndailumba pamulandu winu pa Wanda uno Klistu alawela. Pano lyene ndamanya vino maka nu kuomba kwane kutali kwasilesile.

¹⁷ Utailo winu mu Mwene nga nu kuomba kwinu vikoline wa mpolelwa iyapeelwa kunoli. Nu wazi wane ungapongolwelwa pa kupeela impolelwa. Cii ndi cacitika, ndazanga nu kusansamuka pamwi namwe.

¹⁸ Mu musango uli onga, mulinzile kuzanga nu kusansamuka pamwi nani.

Timoti na Epaflodito

¹⁹ Nkupaalila mu Mwene Yesu ukuti ndatuma Timoti kunomuli zuwa kuti ntekeziwe pa kuuvwa vino muli.

²⁰ Kusi namuze wakwe Timoti angaya nu mwenzo ndu wane wakusakamala pali mwemwe.

²¹ Cila muntu akasakamala pa vintu vyakwe umwisikulu, kwaula kusakamala mulimo wakwe Yesu Klistu.

²² Lelo mweisikulu mumanyile vino Timoti waya ni cumi, na vino wene nani twaombanga pamwi wa mwana ni si pamulandu wi Landwe Lisuma.

²³ Caleka nkupaalila kumutuma kunomuli zuwa lino ndamanya muno vintu vilancitikila.

²⁴ Nupya ndu Mwene wazumilizya ndiza zuwa kunomuli.

²⁵ Nelenginye ukuti calondekwa kutuma mwina witu Epaflodito kunomuli. Wene mulondezi, nupya muomvi ni cita ca Mwene, ndi vino indi. Mwemo mwamutumile kuti aiize mukungazwa.

²⁶ Lelo ndakai akulondesya kulola mwemwe mwensi. Wene watasakamikwa pamulandu wakuti muvwa vino wali mulwale.

²⁷ Cumi kwene, wene wali mulwale pipi nu kufwa. Lelo Leza wali nu luse panoli, na pali nene kwene, nga wansunzile ku kuntanyomelwa nu ulanda.

²⁸ Ndakai nkulondesya kutuma Epaflodito kunomuli pakuti muye ni nsansa zya kumulola nupya, na kuti ulanda uno indi nao usile.

²⁹ Mumuzengele nu luzango wa mwina akatumikila Mwene. Mwapeela mucinzi ku antu yonsi ali nga aliwe,

³⁰ pano wene nga waponzizye umi wakwe, nupya wali pipi nu kufwa pamulandu wa mulimo wakwe Klistu, kuti ampeele wazwilizyo uno mwemo mwaposiwe ku mpela.