Filipi 1 - Amazwi Yakwe Leza 2013

¹ Kalata kufuma kuli ne Paulo na Timoti, swe aomvi yakwe Klistu Yesu. Twalembela antu yakwe Leza nupya yakwe Klistu, yano ali ku Filipi nga ni ntunguluzi pamwi na Yadikoni onsi amu mauvi inu.

² Leza Tata nu Mwene Yesu Klistu amupeele cikuku nu mutende.

Paulo wapepela iuvi lyaku Filipi

³ Lyonsi lino nkaiusya mwemwe, nkataizya Leza wane.

⁴ Lyonsi lino nkamupepela, nkapepa nu luzango

⁵ pamulandu wa musango uno mwangazwilizye mu mulimo wakusalanganya Ilandwe Lisuma kufuma pa wanda wakutandika kutaila kufika na ndakai.

⁶ Nupya nkusininkizya ukuti Leza, wino uwatandike mulimo usuma uu munomuli, alautwalilila kufika lino alaumala pa Wanda wakwiza kwakwe Klistu Yesu.

⁷ Lyonsi nkaelengenya pali mwemwe mu mwenzo wane. Pano namutemwa cuze. Pano mwensi mwakumako pamwi nani muli vino Leza wancitila, pali ndakai lino indi mu ng'anda yaminyololo nga na lilyo lino nali kunzi kuti ncingilile Ilandwe Lisuma nu kulikosola na maka.

⁸ Leza ali kambone wane ukuti nkulanda cumi. Wene amanyile vino nkalondesya kumulola. Namutemwa mwensi nu kutemwa kwakwe Klistu Yesu.

⁹ Nkulenga Leza kuti kutemwa kwinu kwakulilako lyonsi pamwi na mano akumanya nu kupingula ningo,

¹⁰ pakuti lyene mwamanya kusolola ivili visuma kuti mukazanwe asanguluke aula mulandu pa Wanda wa kwiza kwakwe Klistu.

¹¹ Nga umi winu ulavulilwa vizao vyawololoke ivikaizila muli Yesu Klistu ku kuleta lulumbi nu kulumbanyiwa kwakwe Leza.

Kunondi umi a Klistu

¹² Inane nkulonda kuti mumanye ukuti vintu vino vyancitikile, mucumi vyacitike kuti mulimo wakusalanganya Ilandwe Lisuma uye nkolelo.

¹³ Caleka yakalinda yonsi amwi sano pali pamwi na antu yauze yonsi ali pano yamanyile ukuti nemo indi mu ng'anda yaminyololo pamulandu wakuti nene muomvi wakwe Klistu.

¹⁴ Nupya cii cati cilenga kuti aina itu aingi yakule mu utailo yakosola ilandwe insita zyonsi kwaula intete.

¹⁵ Yamwi yakakosola Klistu pamulandu wakuti yakweti uzuwa nu muvimbila, lelo yamwi yakacita cii pa kulonda kwazwa yauze.

¹⁶ Yaa yakacita cii nu kutemwa, pamulandu wa kumanya ukuti Leza wampeela mulimo wakucingilila ilandwe.

¹⁷ Yauze yasyakosola Klistu mu cumi, lelo mu uzuwa, pano yakalonda sile kunjika mu ntazi lino indi mu ng'anda yaminyololo.

¹⁸ Lelo cico cisi cimwi. Cikulu cakuti antu yakosola Klistu, mu cumi nanti mu uzuwa kwene. Cikwene icikanzanzya.

¹⁹ Nupya nemo namatwalilila kuya nu luzango, pano manyile ukuti kupitila mu mapepo inu nga nu wazwilizyo kufuma kuli Mupasi wakwe Yesu Klistu, nemo yalansapula kuya muntungwa.

²⁰ Cintu cino nkalonda nu kupaalila icakuti ntacitisya Klistu insonyi, nkupaalila kuya muposye ndakai ndi vino naya lyonsi kuti Klistu acindikilwe munondi lino indi nu umi nanti mufwe.

²¹ Uzye uumi icani? Kunondi umi a Klistu ni mfwa umuzano.

²² Lelo kwikala muno nsi ndi kungaleka mbombe milimo isuma iingi, lyene ntamanyile ningo cino ningasolola.

²³ Cili icitale kusolola. Nkulonda ukufwa kuti nje pamwi na Klistu, pano cii cazipisya kuluta.

²⁴ Lelo pamulandu winu cazipa kuti ntwalilile kuya nu umi.

²⁵ Nkusininkizya cii nupya manyile ukuti namaikala. Namaikala pamwi namwe kuti nungilizye kumwazwa kukula nu kuya ni nsansa mu utailo winu.

²⁶ Mulaya ni nsansa lino ndaya namwe nupya pakuti mwailumba pamulandu wane nu umi winu muli Klistu.

²⁷ Acino cintu cicindame kuluta cakuti umi winu ulinzile kuya kulingana na vino Ilandwe lyakwe Klistu likalonda twacita. Kuti lino ndamutandalila nanti foo, ince nuvwe ukuti mwensi mwakwata kwelenganya kuli kumwi. Nupya ndamanya ukuti mukaombela pamwi nu kulwisya kuti nayauze yuvwe Ilandwe Lisuma.

²⁸ Mutoopa anisi inu lelo mwaposya lino mwalolenkana nao. Kuposya kwinu kulayalanga ukuti yene yalononwa, nga nu kumulanga ukuti mwemo mulatuulwa. Leza alalenga vii vyonsi vicitike,

²⁹ nupya wene wamupeela isyuko lya kutumikila Klistu asi kukwata sile utailo munoli, lelo nu kumuculila.

³⁰ Mwaya mu ulwi uli umwi na uno mwalola munondi na ndakai mukuuvwa ukuti ncili nao.