Filimoni 1 - Amazwi Yakwe Leza 2013

¹ Kalata kufuma kuli ne Paulo munyepwe pamulandu wa kutumikila Klistu Yesu, nga nu kufuma ku mwina witu Timoti. Kuli Filimoni cuza witu nga nu muomvi unji,

² nu kwi uvi lino likakongana mu ng'anda yako, na kuli Afiya kaci witu, nga na kuli Akipusi musilika unji umu nkondo ya Mwene.

³ Leza Tata nga nu Mwene Yesu Klistu yaye ni cikuku kunomuli nga nu kumupeela mutende.

Kutemwa nu utailo wakwe Filimoni

⁴ Mwinane Filimoni lyonsi lino nkapepa nkakwiusya nu kutaizya Leza.

⁵ Pano nkauvwa kutemwa kuno wakwata ku antu yakwe Leza nga nu utailo uno wakwata mu Mwene Yesu.

⁶ Ipepo lyane ilyakuti utandano witu namwe ataila, ulalenga ukuvwikisya mulimo uno tukaomba.

⁷ We mwinane mukundwe, kutemwa kuno wakwata kwatuletela luzango lukulu nu ukomelezyo cuze! Wemo wasansamusya myenzo ya antu yakwe Leza onsi.

Paulo Walenga Filimoni Pamulandu wakwe Onesimasi

⁸ Pamulandu kwene uu, mwi zina lyakwe Yesu nemo ningapama pa kukupeela ilamulo lyakuti wacita cino ulinzile kucita.

⁹ Lelo pamulandu wakuti nakutemwa, nkukulenga kuti ucite cino ulinzile kucita. Nemo nkucita cii nanti angala nene Paulo, inkombe yakwe Klistu, nga ndakai nene munyepwe pamulandu wa kutumikila Klistu Yesu.

¹⁰ Acino nkukulenga kuti wazwe Onesimasi, wino kunondi akoline wa mwanane lino tuli nawe mung'anda yaminyololo.

¹¹ Pa nsita imwi wene atali nu mulimo kunuli. Lelo ndakai wene akweti mulimo kunuli na kunondi kwene.

¹² Ndakai pakutuma Onesimasi kunuli candenga kuuvwa ulanda.

¹³ Nemo ningatemwa kuti nsunge Onesimasi kuno, lino indi mu ng'anda yaminyololo pamulandu wa kusalanganya ilandwe lisuma. Ningatemwa kuti wene angazwe mu cifulo cakuti wewe ungazwe.

¹⁴ Nanti cingaya vivyo, ntakulonda kukupatikizya kungazwa. Lelo ningatemwa ukuti wemwisikulu ungazwe kwaula kupatikiziwa. Caleka ntalacita cintu cili consi suka nkolelo utale unzumilizye.

¹⁵ Cingaya limwi Onesimasi wafumiziwe kunuli pa kasita kanono sile pakuti lino yamuwezya aye pamwi nawe nsita zyonsi.

¹⁶ Ndakai wene asi sile muzya, lelo wene alusile muzya. Kunondi wene alusile pa mwina! Lelo kunuli alalusya nu kuluta, wa muzya nupya wa mwina mu Mwene!

¹⁷ Caleka ndu kanjelenganya wakwe cuza kunuli, lyene uzengele Onesimasi ndi vino unganzengela.

¹⁸ Ndi cakuti wene waluvyanya cimwi kunuli nanti ali ni nkongole zimwi kunuli, lyene ulifye nene.

¹⁹ Nene nalemba kwi kasa lyane nemwisikulu ukuti ne Paulo ndakulipa (lelo utailila ukuti umi wako inkongole kunondi).

²⁰ Caleka mwinane, nakupapata uncitile uwazwilizyo pamulandu wa Mwene. Wa mwina muli Klistu, wemo ulinzile kunsansamusya!

²¹ Nemo, lino nkulemba, nkusininkizya ukuti wemo ulacita vino nuzya kuti ucite, nupya manyile ukuti ulacita nu kuluta.

²² Pa nsita ili yonga kwene unteyanyizizye muputule umwi, pano nkupaalila ukuti Leza alaasuka mapepo inu yonsi nga nu kuleka kuti nize kunomuli.

Kulamuka kwakusyalikizya

²³ Epafula, wino ali pamwi nani mu ng'anda yaminyololo pamulandu wa kutumikila Klistu Yesu, akukulamuka.

²⁴ Aomvi yanji, Mako, Alisitako, Demasi, na Luka yamulamuka.

²⁵ Cikuku ca Mwene ciye namwe mwensi.