Ezila 9 - Amazwi Yakwe Leza 2013

Ezila wamanya vyakutwalana na inamasi

¹ Pacisila lino vyonsi vii vyacitika, nga intunguluzi zimwi iziza kunondi iziti, “Aina Izlaeli pamwi na yasimapepo nga na ina Levi yataizilizye ku utwazi ni mitundu ya inamasi iyatuzinguluka. Iyi, imitundu ya ina Kenani, Hiti, Pelizi, Yebusi, Amoni, Moabu, Eguputo na ina Amoli. Yene yakucita ivyawinyi ndi vino ainamasi yonsi yakacita.

² Aina Izlaeli yamwi, ana yao aonsi yatandike ukutwala akazyana ya inamasi. Pali cii umutundu witu uziliziwe wavulungana ni mitundu ya antu yauze. Nupya intunguluzi na antu yakalamba kwene alio yalusizye umu cimvulunganya ca mutundu uu.”

³ Lino nuvwile vii, alino ndepola vyakuzwala vyane nu mwingila wane kwene pamulandu wa nsonyi. Lyene mpela ni nyele ku mutwe wane kumwi ni vilezu kwene nga nikala pansi ulanda ulanda.

⁴ Natenzi pansi mpaka ukufika amanguzi. Lyene antu akweti icoopo ku mazwi yakwe Leza wa ina Izlaeli yalola ukuntataila kwa ntalanganyi zyawelulwike ukufuma ku uzya, yatandika ukwiza kunondi nu kulongana.

⁵ Lino insita yakupeelelapo impolelwa amanguzi yafika, mvwandamuka nga nimilila ni vyakuzwala vyane vilepoke. Lyene mfukama nu kukatusya amakasa yane umupela kuli Yawe Leza wane.

⁶ Alino mpepa inti, “We Leza wane, insonyi nu ulanda vyandesya ukusanzula amanso kunuli, Leza wane, pamulandu wakuti amaifyo itu yavulisya cuze ukuluta imitwe itu. Icumi kwene uyi witu wavulisya wakwe cimwi ukufika nu kwiyulu.

⁷ Ukufuma ku nsita zya vikolwe vitu mpaka na ndakai twikalilila umu maifyo aipisye cuze. Pamulandu wakwe cii, sweswe kumwi na ene itu na yasimapepo itu twapelwa mu makasa ya ene ya inamasi, kuti yatulwisye yatutwale umu uzya, yatusampe nu kutuzewanya sana ndi vino cili manda yaa.

⁸ “Lelo umu kasita kanono, we Yawe Leza witu watuyela amizu nu kututuula ku uzya, kuti twikale umu ncende yako yamuzilo. Wemo watutuula ukufuma ku uzya nu kutupela umi upya.

⁹ Twali azya, lelo wemo utatutazyezile. Wapile yamwene aku Pesya amizu akutuzumilizya ukwikala umu mpanga nu ku kuululula Ng'anda ikulu yakwe Leza. Wemo mwatupela umutende umu Yuda nu mu Yelusalemu.

¹⁰ “Lelo ndakai, we Leza witu, ivyani vino tungavwanga pacisila cakwe vyonsi vii? Nupya kwene twatitusuula amasunde yako

¹¹ yano watupile ukupitila mu yaomvi yako yakasema. Yene atunena ukuti impanga ino mukuya mwenemo ikowele pano antu aikala mwenemo yikalila ukucita vyawinyi ukufuma ku lusansa longa mpaka ukufika nu ku luze kwene.

¹² Yene yatunena ukuti tutalinzile ukutwalana nayo nanti kuyazwilizya umu nzila ili yonsi. Ndi cakuti tukulonda kuilyokezya ivisuma vyamu mpanga nu kusiilako ivizikulula vitu kuti viye vyaupyanyi vya manda pe, tutaezya kucita cipangano cakwandana ucuza nayo.

¹³ Vii vyonsi vyakutuzunya pamulandu wa maifyo ni viipe vitu vyasila, nga lelo swemo tumanyile ukuti wewe we Leza witu ukutuvunuka sile panono, ivitangalingana ni vicitwa vitu kuno yamwi pakasi kitu twatitupusuka.

¹⁴ Uzye pacani cino tungilila amasunde yako nupya nu kutandika ukutwalana na inamasi? Ndi tungacita cico, lyene wemo ulatulovya swensi pyu.

¹⁵ We Yawe, Leza wa ina Izlaeli, wemo wewe mololoke! Watuzumilizya kuti tuye nu umi. Acino twailongwela amaifyo itu kunuli. Tusi ni nsambu zya kwiza apa manso yako.”