Ezila 8 - Amazwi Yakwe Leza 2013

Antu awelulwike ukufuma ku uzya

¹ Uu, uli utantiko wa ntunguluzi zya ng'anda izyawelulwike pamwi na alio ukufuma ku Babiloni mu manda ya kuteeka kwa mwene Alitakisesi:

² Gelisyomu, uwamu mupanda wakwe Pineasi. Danieli, uwamu mupanda wakwe Itamali. Hatusyi,

³ uwamu mupanda wakwe Syekaniya, uwamu mupanda wakwe Davidi. Zakaliya uwamu mupanda wakwe Palosyi. Wikwene walemvilwe pamwi na antu yauze aonsi ukulingana ni mpendwa umwanda onga na yasano (150).

⁴ Elieoenai, umwana umonsi wakwe Zelaya, uwamu mupanda wakwe Paati Moabu. Wene wali pamwi na onsi imyanda iili (200).

⁵ Syekaniya, umwana umonsi wakwe Yaazieli, uwamu mupanda wakwe Zatu. Wene wali pamwi na onsi imyanda itatu (300).

⁶ Ebedi, umwana umonsi wakwe Yonatani, uwamu mupanda wakwe Adini. Wene wali pamwi na onsi amakumi yasano (50).

⁷ Yesyaya, umwana umonsi wakwe Ataliya, uwamu mupanda wakwe Elamu. Wene wali pamwi na onsi amakumi cinimbali (70).

⁸ Zebadiya, umwana umonsi wakwe Mikaeli, uwamu mupanda wakwe Syefatiya. Wene wali pamwi na onsi amakumi cinani (80).

⁹ Obadiya, umwana umonsi wakwe Yeeiyeli, uwamu mupanda wakwe Yoabu. Wene wali pamwi na onsi imyanda iili ikumi lyonga na cinani (218).

¹⁰ Syelomiti, umwana umonsi wakwe Yosifiya, uwamu mupanda wakwe Bani. Wene wali pamwi na onsi umwanda onga na makumi mutanda (160).

¹¹ Zakaliya, umwana umonsi wakwe Bebai, uwamu mupanda wakwe Bebai kwene. Wene wali pamwi na onsi amakumi yaili na cinani (28).

¹² Yoanani, umwana umonsi wakwe Hakatani, uwamu mupanda wakwe Azigadi. Wene wali pamwi na onsi umwanda onga ni kumi (110).

¹³ Amu mupanda wakwe Adonikamu, ali akusyalikizya, amazina ya ntunguluzi zyao a Elifeleti, Yewele na Syemaya. Yene yali pamwi na onsi amakumi mutanda (60).

¹⁴ Amu mupanda wakwe Bigivai, amazina ya ntunguluzi zyao a Utai na Zakuli. Yene yali pamwi na onsi amakumi cinimbali (70).

Ezila wasolola aina Levi

¹⁵ Antu yonsi yaa nayakonganike ku luzi ulukakonkoloka ukufika nu ku musumba wa Aava, nga akuno twaizi amanda yatatu mu nsakwe. Lino naceceta mwi umba na muli yasimapepo, indola ukuti aina Levi yasimo.

¹⁶ Acino intuma akuya aama intunguluzi zii fundimbali: Elieza, Alyeli, Syemaya, Elinatani, Yalibu, Elinatani, Natani, Zakaliya na Mesyulamu, alino na yakasambilizya yaili, Yoyalibu na Elinatani.

¹⁷ Lyene njatuma na kuli Ido, intunguluzi yaku Kasifiya. Njanena ivyakuyanena Ido pamwi na auze, yafundi aku Ng'anda ikulu yakwe Leza yaku Kasifiya, pakuti yangantumila antu akwiza kukuombela Leza mu Ng'anda yakwe ikulu.

¹⁸ Pamulandu wa luse lwakwe Leza witu, nayo yatutumila Syelebiya, umuntu umwi mulamoke, uwamu mupanda wakwe Maali, umwana umonsi wakwe Levi, umwana umonsi wakwe Izlaeli, pamwi na ana aonsi yakwe Syelebiya na ina yao. Yonsi pamwi yali aonsi ikumi na cinani (18).

¹⁹ Wene watutumile na Hasyabiya kwene na Yesyaya amu mupanda wakwe Melali, pamwi na akazi kao. Yonsi pamwi yali aonsi amakumi yaili (20).

²⁰ Ukulunda pali yayo kwali na yafundi ya Ng'anda ikulu yakwe Leza imyanda iili na makumi yaili (220), yano umwene Davidi na yacilolo yakwe yapaatwile ivikolwe vyao pakuti yangazwilizya aina Levi imilimo. Ivikolwe vyao vyayalemvile amazina.

Ezila watungulula antu umu kuleka ukulya apakuwaka amapepo

²¹ Kuku kwene uku luzi lwa Aava, nemo ne Ezila napiile antu amasunde akuti swemo swensi tutale tute ukulya, pakuti tuicefye kuli Leza, tumupapate apakuti atutungulule umu ulendo witu nu kutucingilila, sweswe pamwi na ana itu, kumwi ni vyuma vitu vyonsi.

²² Nemo nakweti insonyi izyakulenga umwene Alitakisesi impuka ya vita, vya pa ngazo ni vya pa mfwalasi, ivyakutucingilila ku anisi pa lwendo lwitu. Pasipano alanga twanena umwene ukuti Leza witu alapolelela umutundu witu onsi uwamutaila, lelo wene alavunuka umuntu wensi uwamusangukile.

²³ Acino naswe pali pakusazya ukulya, ituwaka sile ukupepa Leza pakuti awino atucingililako, nga nawe auvwa amapepo itu.

Amawila akupeela ku Ng'anda ikulu yakwe Leza

²⁴ Alino napaatwile yasimapepo akalamba ikumi na yaili, ukwikapo Syelebiya, Hasyabiya nga na ina ikumi.

²⁵ Ali yano nemo pamwi nayo twapima amawila yakwe siluva na zaabu pamwi ni viya vino umwene Alitakisesi na yacilolo yakwe, na yamusika yakwe, na ina Izlaeli yapiile ivyakutuula ku Ng'anda ikulu yakwe Leza, nga nani pali pakuvipeela kuli yasimapepo.

²⁶ Napimile kunoyali amakilogalamu amazimbi amakumi yaili na yasano (25,000) yakwe siluva, ni viya vyakwe siluva amakilogalamu amakumi cinimbali (70), nga na vyakwe zaabu ukulingana amakilogalamu amazimbi yatatu ni myanda ini (3,400),

²⁷ ni mbale amakumi yaili (20) zyakwe zaabu izinganyoma ukulingana amakilogalamu cinani (8) na citika, nga ni viya vyuze vya mukuwa, ivyampomvu wakwe zaabu.

²⁸ Nemo pali pakunena yasimapepo inti, “Mwemo mwemwe antu apaatwilwa Yawe, Leza wa vikolwe vinu kumwi ni viya vyonsi vyakwe zaabu vino yatuuzile Leza mu kuitemelwa.

²⁹ Mwavisunga ningo mpaka muce mukavifisye umu Ng'anda ikulu yakwe Leza. Muce mukavipimile mu miputule yakwe yasimapepo nga muce mukapeele yasimapepo yakalamba na akalamba ya ina Levi nga ni ntunguluzi zya ng'anda zya ina Izlaeli mu Yelusalemu.”

³⁰ Fwandi yasimapepo na ina Levi pali pakusunga siluva, zaabu, nga ni viya vyakutwala ku Ng'anda ikulu yakwe Leza ku Yelusalemu.

Yaswilila ku Yelusalemu

³¹ Alino itufuma ku luzi lwa Aava pa wanda walenga ikumi na yaili mu mwezi wakutandika, nga ituya ku Yelusalemu. Leza witu wali naswe nu kutucingilila ku anisi itu, makamaka ku antu atufisamilanga umu nzila.

³² Lino twafisile ku Yelusalemu twatenzi amanda yatatu ala tukupuza sile.

³³ Pa wanda wakwe cini, twaile ku Ng'anda ikulu yakwe Leza witu, tupima siluva, zaabu nga ni viya nu kuvipeela mu makasa yakwe simapepo Melemoti, umwana umonsi wakwe Uliya, ala yali na Eleaza umwana umonsi wakwe Pineasi, nga na ina Levi yaya yaili, Yozabadi umwana umonsi wakwe Yesyua na Noadiya umwana umonsi wakwe Binui.

³⁴ Vyonsi pyu vyapenzilwe nu kupimwa, alino yavilemba nu kuvilemba.

³⁵ Pa nsita kwene iyo antu awelulwike ukufuma mu uzya yapeela impolelwa zya mawila yakoca kuli Leza wa ina Izlaeli. Yatuulila aina Izlaeli yonsi yacipambasi 12, na yasuuku 96, na ana ya mfwele 77, alino na yasawe ikumi na yaili, wa wila wakwelela amaifyo. Vyonsi vii vyali amawila yakocela Yawe.

³⁶ Yatola na kalata wino umwene Alitakisesi wayapile, yatwalila alasi na yamusika akuno mbalama ya luzi lwa Yufulate, nayo ali pakwazwilizyako antu nu kwazwilizya Ng'anda ikulu yakwe Leza.