Ezila 7 - Amazwi Yakwe Leza 2013

Ezila wafika ku Yelusalemu

¹ Apacisila ca vintu vii, umu manda ya kuteeka kwakwe Alitakisesi umwene waku Pesya, kwali kweneko umuntu wino yatemile izina Ezila. Wene wali umwana umonsi wakwe Selaya, umwana umonsi wakwe Azaliya, umwana umonsi wakwe Hilikiya,

² umwana umonsi wakwe Syalumu, umwana umonsi wakwe Zadoki, umwana umonsi wakwe Aitubi,

³ umwana umonsi wakwe Amaliya, umwana umonsi wakwe Azaliya, umwana umonsi wakwe Melaiyoti,

⁴ umwana umonsi wakwe Zelaya, umwana umonsi wakwe Uzi, umwana umonsi wakwe Buki,

⁵ umwana umonsi wakwe Abisyua, umwana umonsi wakwe Pineasi, umwana umonsi wakwe Eleaza, umwana umonsi wakwe Aaloni simapepo mukulu.

⁶ Ezila wii atenuka ukufuma ku Babiloni. Wene wali akalemba, nupya inkonkotela yakwe yakasambilizya ya vyalembwa mu mpapulo zyakwe Mose vino Yawe Leza wa ina Izlaeli wayapezile. Kateeka Alitakisesi wamupile vyonsi vino wene walenzile, pano Yawe Leza wakwe wali nawe.

⁷ Umu mwaka kwene uwakwe cinimbali, uwa utesi wakwe Alitakisesi, aina Izlaeli yamwi, yasimapepo, aina Levi, yakiimba ya nyimbo pamwi na yakalinda ya mpongolo, ukwika penepo na aomvi yamwi, yizile uku Yelusalemu.

⁸ Ezila pamwi na ina Izlaeli yafumile uku Babiloni apa wanda wakutandikilapo uwa mwezi wakwe cisano uwa mwaka wakwe cinimbali.

⁹ Alino nu kufika mu Yelusalemu umu mwezi wakwe cisano umu mwaka uwalenga cinimbali uwa utesi wakwe Alitakisesi. Ulongo lwakwe Leza ulwa mukolelelanga nu kumusunga.

¹⁰ Apa mulandu wakuti Ezila walanga wika umwenzo wakwe uku kusambilila amasunde yakwe Leza nu kuyalondela nga nu kuyasambilizya uku ina Izlaeli, ivipope ni misango ino yangalondelamo lyonsi.

Kalata wakwe Alitakisesi kuli Ezila

¹¹ Alitakisesi watumile kalata kuli Ezila, simapepo na kalemba umwi umucenjele umu masunde yakwe Leza ni vipope vino wapile ku ina Izlaeli.

¹² Mwali amazwi akuti, “Ukufuma kuli Alitakisesi umwene mukalamba. Nalemba kuli Ezila, simapepo, kalemba wa masunde yakwe Yawe Leza wa mwiyulu.

¹³ “Napanga isunde ilyakuti umwina Izlaeli wensi, ciye a simapepo nanti umwina Levi cikulu sile waya umu mpanga zino nkateeka, ndi cakuti akulonda ukuswilila ku Yelusalemu angapita nawe.

¹⁴ Pasipano ne mwene pamwi ni nkombe zyane cinimbali, sweswe tukukutuma kuti ukalondelezye ivyaya umu mpanga yakwe Yuda nu mu Yelusalemu, pakuti tumanye ndi cakuti antu yakulondela ningo Amasunde yakwe Yawe Leza wako yano wayapeela.

¹⁵ Utwalekweneko siluva na zaabu vino ne mwene pamwi na makombe yane yatiyapeela uku kutemwa kwao ni myenzo yonsi, kuli Yawe Leza wa ina Izlaeli, wino uwikalo wakwe wayela umu Yelusalemu.

¹⁶ Siluva na zaabu wensi wino ulazana umu mpanga ya Babiloni, wino antu na yasimapepo yangapeela vyonsi ivyakusenda nu kuyavipeela mu kuitemelwa ku Ng'anda ikulu yakwe Leza umu Yelusalemu.

¹⁷ “Impiya zyonsi ni vyuma ivingazanwa ivyakukalila ingo'mbe, imfwele, ivyakulya, ivyakumwa nu kuvipeela vyonsi pyu apa kavuwa ka Ng'anda ikulu yakwe Leza umu Yelusalemu.

¹⁸ Siluva na zaabu vino vingasyala penepo mungaviomvya umu musango uno wewe na anyonko mwalola ukuti cingalinga, ukulingana nu kulonda kwakwe Leza winu.

¹⁹ Iviya vyonsi vino yakupeela ivya kuomvya umu Ng'anda ikulu yakwe Leza winu ule uviike apa mulola wakwe Leza ku Yelusalemu.

²⁰ Ni cintu icili consi cino walola ukuti cingalinga ukutuula umu Ng'anda ikulu yakwe Leza, uce utoole mu cipao cakwi sano.

²¹ “Lyene nene kwene ne mwene Alitakisesi, anene napeela isunde lii kuli yonsi akasunga icipao umu mbalama ya luzi lwa Yufulate kuti vyonsi vino simapepo Ezila, kalemba wa Masunde yakwe Leza wa mwiyulu, alamulenga, muce mu mupeele papo kwene.

²² Muce mumupeele siluva ukufika nu kucipimo ca makilogalamu angalingana amazimbi yatatu ni myanda ini (3,400). Ingano nazyo ukufika nu ku cipimo ca makilogalamu angalingana amazimbi ikumi (10,000). Waini nawe ukufika nu ku cipimo ca malita angalingana amazimbi yaili (2,000). Mafuta ya miolivi nayo ukufika nu ku cipimo ca malita angalingana amazimbi yaili (2,000). Umusilya wene ukulingana icipimo consi icingalondekwa.

²³ Mulinzile mwacincila nu kutekela sana apakupeela consi cino Leza wa mwiyulu akulonda kuti ciombe umu Ng'anda ikulu yakwe Leza. Mutalinzile mwamufisya uku mwenzo icakuti akancitile icipyu nanti kuli yao alalondela pacisila cane.

²⁴ Mutakezye ukusonkesya yasimapepo umusonko nanti umwi, aina Levi, yakiimba ya nyimbo, yakalinda ya mpongolo, nanti aomvi yauze asyala amu Ng'anda ikulu yakwe Leza.

²⁵ “Acino wemo Ezila, umu kuomvya amano yano Leza wako wakupeela, wewe ulinzile wasonta intunguluzi na yakapingula akuteeka antu umu mbalama ya luzi lwa Yufulate, yao amanya isunde lyakwe Leza wako. Nupya ulinzile ukusambilizya amasunde kuli wensi atayamanyile.

²⁶ Wino wensi asiyela amasunde yakwe Leza na masunde ya mwene, cumi kwene wene alinzile avunukwe lilyo kwene. Wene alinzile akomwe, nanti kuzingwa mu mpanga kwene iyo, nanti apokololwe ivintu vino wakwata, nanti yamusumbile mu ng'anda ya minyololo.”

Ezila walumbanya Leza

²⁷ Ezila avwanga ati, “Alumbanyiwe Yawe, Leza wa vikolwe vitu, wino wika ilango mu mwenzo wa mwene kuti mu musango ukwene wakuitemelwa amuno acindikile Ng'anda ikulu yakwe Yawe yamu Yelusalemu.

²⁸ Wikwene aliwe walanga ukutemwa kwakwe ukusuma kunondi pa manso ya mwene na yampandamano yakwe nga ni ntunguluzi zyakwe zyonsi zyamaka. Yawe Leza wane wandenga ukuposya, nga nakweti amaka akulenga intunguluzi zivule zyamu Izlaeli kuti ziweluluke pamwi nani.”