Ezila 6 - Amazwi Yakwe Leza 2013

Kalata wi lamulo lya mwene Kilusi wazanikwa nupya

¹ Alino lyene umwene Dalyusi wapile ilamulo lya kulonda ivipepala mu mang'anda muno vyasungilwanga umu Babiloni.

² Nga mu musumba uwamwangwa Ekibatana mu muputule wa mpanga ya Medya, amuno iyazana ipepala ilya pombeleziwa apa lutwe. Yalivungulula, nga yazana apalembwa ivintu vii:

³ Umu mwaka wakutandikila penepo uwa kuteeka kwakwe, mwene Kilusi wapingula apamulandu ni Ng'anda yakwe Leza yaku Yelusalemu, ukuti ng'anda iyo ikakuulwe cipya cipya. Mumo amuno yalinzile ukupeelela mwenemo ivya mawila yakoca. Ice itumpuke papeela amamita ukulingana na makumi yaili na cinimbali, nu mukusalala namo vivyo kwene, amamita amakumi yaili na cinimbali.

⁴ Iviumba vilinzile vyakuulwa umu kufyantika imbao apakasi kakwe cila mikukulo itatu, iya mawe yakulu. Impiya zino yalaomvya apakulipila yakakuula, zili nu kufuma uku cipao ca kwisano.

⁵ Alino iviya vyakwe zaabu na siluva vino Nebukadineza watozile umu Ng'anda ikulu yakwe Leza iyampiti yamu Yelusalemu nu kuvisenda ku Babiloni, yace yaviswilizye mwenemo. Nu kwika yace yakaviike umu ncende yaviko iyamu Ng'anda ikulu yakwe Leza mu Yelusalemu.

Dalyusi wapeela ilamulo lya kutwalilila amakuule

⁶ Ali lino lyene Dalyusi apakwasuka atuma amazwi kuli Tatenai, umulasi wa muputule wa mpanga uku mbalama ya luzi lwa Yufulate, na kuli Syetali Bozenai na auze yonsi akalamba yaku uwondaka wakwe Yufulate ati, “Funtukini uku Ng'anda yakwe Leza.

⁷ Mutaezya kuvulunganya umulimo waku kuululula Ng'anda ikulu yakwe Leza. Lelo mutiini umulasi waku Yuda wiyo pamwi ni ntunguluzi zyakwe kuti yakuululule Ng'anda yakwe Leza, papa kwene apa ncende ino yakuulilwe inkolelo.

⁸ Ukulunda pali cico, ayakonkomezya kuti yacincizye antu nu kuyazwilizya mu mulimo wa makuule. Ni mpiya zyonsi zino antu yalasumba zilinzile zyafuma mu cipao ca kwisano, umu mpiya zino antu yakasonka ukufuma ku mbalama ya luzi lwa Yufulate apakukana undalizya umulimo.

⁹ Cila wanda muno amanda yacela, mulinzile ukupeela yasimapepo amu Yelusalemu icili consi cino yakulonda. Ivili wakwe tucipambasi, imfwele nanti tusuuku utwakocela Yawe, Leza wa mwiyulu, impolelwa, nanti ingano, umusilya, waini, nanti amafuta ya miolivi.

¹⁰ Cico cilinzile ukucitika apamulandu wakupeela kuli Yawe impolelwa ino ingapokelelwa na aliwe, nu kuti yapapatile mwene na ana yakwe aonsi upolelelo usuma uwa umi.

¹¹ Ukulunda pali cico, nupya nkukonkomezya nu kuti ndi cakuti kwala kwaya umwi uwakana ukuyela isunde lii, yace yasomole ulusondo ukufuma ku ng'anda yakwe kwene, alino yace yausongozye nga yamutunge kweneko nu kumulelemvya apapela. Alino ng'anda yakwe kwene ice isyale icitumba, apamulandu na aliwe kwene.

¹² Yawe umwisikulu uwasolwile ukuti izina lyakwe likasyalilile uku Yelusalemu, angavwintila ukutali wiyo wensi uwaca wasuula isunde lii, nu kupanga ukuti akonone ng'anda ii yakwe Leza nupya. Nene ne Dalyusi nati akawe nalyo! Napeela ni cipope cii. Fwandi inkuti kacalondelwa ningo.”

Kumalila uku kuula Ng'anda ikulu yakwe Leza

¹³ Lyene Tatenai, umulasi wa muputule wa mpanga uku mbalama ya luzi lwa Yufulate, na Syetali Bozenai na aomvi yauze yalondile ningo ivyalanzile umwene Dalyusi.

¹⁴ Acino aikolo amu Ayuda nayo kwene yatwalilile uku kuula ndi muno mwene kwene wavwangile. Yakomeleziwanga na yakasema, Hagai na Zakaliya, uwamu mupanda wakwe Ido. Nga iyasuka yamala ukukuula Ng'anda yakwe Leza ndi muno Leza wa ina Izlaeli wayapelile ilamulo nga nu ku cipope cakwe Kilusi, Dalyusi na Alitakisesi, yamwene aku Pesya.

¹⁵ Umulimo wamalilike apa wanda walenga yatatu umu mwezi wakwe Adali, umwaka walenga mutanda umu uteko wa mwene Dalyusi.

Ng'anda ikulu yapaatwilwa Yawe

¹⁶ Lyene aina Izlaeli, kuli kuti yasimapepo na ina Levi pamwi na yonsi awelulwike ukufuma umu uzya iyacita uzevyo wakupaatwila ing'anda ilya kuli Yawe nu luzango wakwe cimwi.

¹⁷ Apa kupaatwila ng'anda ii yakwe Leza, yafyuzile nu kupeela yacipambasi 100, ni mfwele 200, nu twana twa mfwele 400 utwakoca wa mpolelwa. Nga alino ukwika penepo na yasawe 12 akutuula wa mpolelwa yakupapatila ukwelela kwa maifyo kwa ina Izlaeli yonsi. Cila sawe ukwimilila cila mutundu apa mitundu ikumi na iili iya ina Izlaeli.

¹⁸ Nupya yisile yasimapepo ukulingana na maumba yao, na ina Levi nayo umwayelile amaumba yao, muno yakatumikila Leza umu Yelusalemu, ukulingana ni vyalembwa mu Lupapulo lwakwe Mose.

Cimulo ca Ucilo

¹⁹ Apa wanda walenga ikumi na yani uwa mwezi wakutandika, antu yano yawelulwike ukufuma ku uzya uku Babiloni yiusya nu kuzevya Cimulo ca Ucilo.

²⁰ Yasimapepo yonsi na ina Levi walanga yatiyaisangulula. Fwandi yali aswepe aula akaulema nanti kamwi. Aina Levi pali pakufyula inyama zya Cimulo ca Ucilo izyakutula nu kocela Yawe impolelwa, izya ina yao yasimapepo ni zyao aisikulu.

²¹ Acino aina Izlaeli awezile ukufuma ku uzya yalile Cimulo ca Mukate usi na Citutumusi, pamwi na yonsi aipaatwile ku vicitwa vyonsi vya mifitalila vya inipamba Akulukuwa pakuti yangalonda Yawe, Leza wa ina Izlaeli.

²² Apa manda cinimbali aina Izlaeli iyazevya nu luzango Cimulo ca Mukate usi na citutumusi, pamulandu wakuti Yawe walenzile kuti yazange apakutonsya umwenzo wa mwene waku Asilya kuti ayakomelezye umu mulimo wa kukuula Ng'anda ikulu yakwe Yawe, Leza wa ina Izlaeli.