Ezila 5 - Amazwi Yakwe Leza 2013

Ukutandika ukukuula Ng'anda ikulu yakwe Yawe nupya

¹ Apa nsita ilya kusuka kuloleka yakasema yaili, Hagai na Zakaliya umwana wakwe Ido. Iyatandika ukusema umwi zina lyakwe Leza wa ina Izlaeli uku Ayuda aikalanga umu Yuda nu mu Yelusalemu.

² Lyene Zelubabeli umwana wakwe Syeatieli nga na Yesyua umwana wakwe Yozadaki lino yuvwa mazwi yayo iyatandika uku kuula nupya Ng'anda ikulu yakwe Leza umu Yelusalemu. Nga yakasema yakwe Leza nayo ala yali pipi yakuyazwa.

³ Pa nsita ilya Tatenai, umulasi wa muputule wa mpanga uku mbalama ya luzi lwa Yufulate, nga na Syetali Bozenai na aomvi yauze iyaya kunoyali nga iyayuzya yati, “Uzye aweni uwamupeela insambu zya kukuula Ng'anda ii ikulu yakwe Leza nu kumalila vino yali?”

⁴ Yuzya nu kuuzya yati, “Uzye antu akukuula ing'anda ii amazina yao aweni?”

⁵ Lelo kwene nanti cali vivyo Yawe wali ni ntunguluzi zya Ayuda. Icaleka aina Pesya yano yizile uku kuuzya, nayo kwene yatesile imyenzo iyalembela Dalyusi kalata nu kulolela uwasuko.

⁶ Wii ali kalata wino Tatenai, umulasi wa muputule wa mpanga uku mbalama ya luzi lwa Yufulate, alino na Syetali Bozenai ni vilolo vyuze ivyali mu mbalama ya luzi lwa Yufulate, wino yalembile umwene Dalyusi.

⁷ Yalemvile yati, “We mwene Dalyusi tukuti si kalukuwala!

⁸ “Icansambu ukumanyisya mwene ivikucitika mu muputule wa mpanga yaku Yuda. Twaile kweneko twazana ukuti Ng'anda yakwe Leza mukulu ikukuulwa na mawe acipezya mano, ni mbao zyamutengo zikufyantikwa apakasi. Incito ikuombwa ningo sana nupya ikuya apankolelo.

⁹ “Lyene ituzya akalamba yao tuti ‘Uzye aweni watamupeela insambu ya kukuululula Ng'anda ii ikulu yakwe Leza kuti iye vino yali inkolelo?’

¹⁰ Nupya ituyuzya kuti yatupele amazina ya antu akukuululula, apakuti naswe tungakumanyisya kuti uyamanye.

¹¹ “Lelo yene yatwaswike iyati, ‘Sweswe aomvi yakwe Leza wi yulu ni nsi, nupya tukukuula cipya cipya Ng'anda ikulu yakwe Leza ino yakuuzilwe uku mpiti mu myaka yapita, ino mwene mukulu uwamu Izlaeli wakuuzile nu kuimalila.

¹² Lelo apamulandu wakuti ivikolwe vitu vyasosizye Leza wa mwiyulu, wene wayapile mu makasa yakwe Nebukadineza umwina Kalideya, mwene waku Babiloni, wino womozile Ng'anda ii ikulu yakwe Leza nu kusenda antu umu uzya uku Babiloni.

¹³ Nga lelo umu mwaka wakutandikilapo wa kuteeka kwakwe Kilusi umwene waku Babiloni, umwene Kilusi wiyo wapile ilamulo lya kukuula cipya cipya Ng'anda ikulu yakwe Leza.

¹⁴ Nga ni viya vyonsi vyakwe zaabu na siluva vino Nebukadineza wafumizye mwenemo umu Ng'anda ikulu yakwe Leza umu Yelusalemu, nu kuvitwala uku Babiloni muno walanga yaviika. Lyene umwene Kilusi wavipezile umu makasa ya muntu wino wasonsile ngu mulasi wa Ayuda. Izina lyakwe a Syesyibaza.

¹⁵ Wamunenyile ati, Toola ivintu vii uviswilizye mu ng'anda yakwe Yawe uku Yelusalemu. Muleke nupya ukuti Ng'anda yakwe Leza ikuulwe apa ncende ino yakuulilwe inkolelo.

¹⁶ Avino Syesyibaza wizile akuula imifula ya Ng'anda yakwe Leza umu Yelusalemu. Ukufuma pa wanda ulya ukufika ni lelo kwene ng'anda icili ikukuulwa lelo itacili isile.

¹⁷ Ndi cakuti cazanzya umwene kuti amanye cico, yangalondelezya muno yiika apalembwa umulandu uu umwi sano lyaku Babiloni apakuti nu mwene umwisikulu akasininkizye ilamulo lino umwene Kilusi wapile ilya kukuula Ng'anda ii ikulu yakwe Leza umu Yelusalemu. Nu kutwasuka cazipa umwene aliwe atwasuke umwisikulu apamulandu uu.’ ”