Ezila 4 - Amazwi Yakwe Leza 2013

Anisi yalonda ukuvulunganya umulimo

¹ Anisi ya luko lwakwe Yuda na lwakwe Benjamini lino yuvwa ukuti awezile ukufuma ku uzya yakukuulila Yawe, Leza wa ina Izlaeli, Ng'anda ikulu.

² Acino yiza kuli Zelubabeli nu ku akalamba ya lupwa nga iyayanena iyati, “Lekini tumwazwe uku kuula, pamulandu wakuti naswe kwene tukalondesya Leza winu wakwe vino mukamulonda. Tukaapeela ni mpolelwa kunoli ukutandika sile apa nsita yakwe Esalaadoni mwene wa ina Asilya, wiyo uwatulesile kuno.”

³ Lelo Zelubabeli, Yesyua nga na akalamba asyala ya ndupwa zya ina Izlaeli yaasuka yati, “Umulimo uu uwa kukuulila Yawe Ng'anda ikulu, utakupazi awe. Sweswe swenga tuli nu kuikuulila Ng'anda ikulu yakwe Leza ukulingana namuno Kilusi mwene waku Pesya watupelile ilamulo.”

⁴ Lyene antu ayazingulwike iyatandika ivyakuyatovola, ala yakuyoofya, pakuti yate uku kuula.

⁵ Yene yapile amafukakanwa uku yaomvi aku Pesya apakuti yayavulunganye. Icimusango cico catwalilile vivyo kwene mu uteko wakwe Kilusi lyonsi ukwizafika na lino Dalyusi wiza waya mwene waku Pesya.

Ukulesya ukukuululula umusumba wa Yelusalemu

⁶ Na pakutandika sile ukwa uteko wakwe Aasuwelo, yapeela aikazi amu mpanga yakwe Yuda na amu mpanga ya Yelusalemu imilandu.

⁷ Nupya mu manda yakwe Alitakisesi mwene waku Pesya, Bisyilamu, Mitiledati, Tabeele nauze, yalembile Alitakisesi mwene waku Pesya kalata. Kalata wiyo walemvilwe umu Cialamu, wali uwakusitaka. Fwandi wali uwakusenula apa kuwelenga.

⁸ Na Leumu kwene uwali umulasi uwaku Yelusalemu, na kalemba Syimusyai iyalembela mwene Alitakisesi kalata, nu kumunena ivili ku Yelusalemu. Amazwi ya muli kalata yalemvilwe wakwe vii:

⁹ “Ukufuma ku mulasi Leumu na kalemba Syimusyai, iumba lyakwe na yakapingula ya milandu, yakapitao na yacilolo pa antu afuma ku Tilipoli, na ina Pesya, Eleki na Babiloni, na ina Susa aku mpanga ya Elamu,

¹⁰ nga na antu yauze yano umusambazi Asyubanipali wafumizye kumwao nu kwiza ikala umu musumba wa Samaliya nu mu mpanga zyuze izyayela muno mbalama ya luzi lwa Yufulate.”

¹¹ Amazwi ali muli kalata wiyo yali vii: “Uku musambazi Alitakisesi. Amazwi yakufuma ku yaomvi yako, aikala uku mbalama ya luzi lwa Yufulate.

¹² “Musambazi tukulonda tukumanyisye ukuti Ayuda aiza ikala kuno ukufuma umu mpanga zyako zyuze, yatiyiza ikala muno Yelusalemu, nu kutandika nupya uku kuula cipya cipya umusumba utalami uwamuselu. Yatiyatandika nu kwimika iviumba, umufula wene yatiyamala nu kumala.

¹³ Acili cino twati ica nsambu kuti tungamanyisya umusambazi. Pasi pano amala yamala sile uku kuula iviumba, ale yata nu kusonka umusonko. Lyene nanti umulaza wakwi sano ale casila wacepa.

¹⁴ Ale lyene musambazi swemo makamaka tukapusukila kwi sano, tutangatemwa ukulola ica musango uu cacitikila umwene, kwati tutaya penepo. Acino twati katumanyisye umusambazi

¹⁵ pakuti yalondelezye umu mpapulo, yalole muno calembwa pa milimo ya vikolwe vitu. Mumazana ukuti umusumba uu, umusumba wa vicitwa iviipe, uwa utalami. Nupya lyonsi wayanga uwipe ku vicitwa vyakuli yamwene ya viputulwa vya mpanga. Nu musango wakusangukila uteko watandike uku mpiti sana, ku katalili sile. Icalenzile ukuti yawonone, yauongolole.

¹⁶ Tukukumanyisya we musambazi, ukuti, umusumba uu ndi cakuti wakuulwa sile, ni viumba vyasililikila, impanga yene muno mbalama ya luzi lwa Yufulate, wilile, ale isi yakwako!”

Umusambazi waasuka kalata

¹⁷ Kateeka nawe walanga uvwa, wawezizye uwasuko ndi uu: “Kuli Leumu umulasi na kalemba Syimusyai, nu ku auze yonsi, kuli yao aikala umu Samaliya nu kwasyala konsi, uku mbalama ya luzi lwa Yufulate. Mwensi kwene nkuti, mwakata mukwai.

¹⁸ “Kalata wino mwandembile napoka. Yambelengela nu kundondolwela ivyayamo.

¹⁹ Napile ilamulo lyakulondelezya apamulandu kwene uu, nga cazanwa ukuti icumi kwene umusumba uo ukufuma sile nampiti ukasangukila uteko, ni vicitwa iviipe vikacitikila kuko kwene.

²⁰ Kwatalanga kuya na yamwene amaka ateekanga mu Yelusalemu yayo atesile impanga yonsi mpaka nu ku mbalama ya luzi lwa Yufulate. Yasonkesyanga ni misonko ya pa mwili wa muntu, iya miseo ni milaza.

²¹ Caleka lyene pelini ilamulo lyakulesya antu yao umulimo wa kukuula, pakuti yatatwalilila uku kuula pali ndakai suka sile nce impele ilamulo.

²² Lelo mucincile pamulandu uu. Mutaleka uyi utwalilile mu wene wane.”

²³ Walanga sile lino umulasi Leumu na kalemba Syimusyai yawelenga kalata wiyo wa mwene Alitakisesi, iyakalauka iyaya ku Ayuda uku Yelusalemu, nu kuyapatikizya ku maka kuti yate uku kuula.

Ng'anda ikulu yakwe Leza yatandika ku kuulwa

²⁴ Fwandi avili vino yalesizye umulimo waku kuula Ng'anda yakwe Leza umu Yelusalemu suka ciza cafika nu mwaka wakwe ciili umu uteko wakwe Dalyusi mwene