Ezila 3 - Amazwi Yakwe Leza 2013

Upefi watandika nupya

¹ Lino umwezi wakwe cinimbali wafika, aina Izlaeli alanga yonsi pyu ikala umu misumba yao. Lyene yonsi yiza yakongana pamwi ni lango lyonga uku musumba wa Yelusalemu.

² Nga lino Yesyua umwana wakwe Yozadaki pamwi na yasimapepo yauze na Zelubabeli umwana wakwe Syeatieli nga na aomvi yauze iyatandika uku kuula kavuwa kakwe Leza wa ina Izlaeli apa kocela impolelwa ndi vino calembwa umu mpapulo zyakwe Mose umuntu wakwe Leza wilya.

³ Nanti angala antu yalya awezile yofile ainamasi ayazingulwike, yene yakuuzile kavuwa papa kwene apa ncende yampiti. Lyene yapeela penepo kuli Yawe amawila akoca apuma, akupeela akatondo na lino ilanzi lyawa.

⁴ Nu kuwaka yawakanga sana amanda ya uzevyo ndi vino uwanda wakuzevya Cimulo ca Nsakwe, nu kupeela impendwa ya mpolelwa zyakoca ndi vino calemvilwe ukupeela cila wanda.

⁵ Alino ukulunda pa mpolelwa kwene zyakoca cila wanda, yapeelanga na pa manda yaya atantikwa insita zyonsi, ku ndoleko ya mwezi, alino na mawila apa manda akulu yonsi asontwe nga na yano yapeelanga kuli Yawe uku kuitemelwa kwao.

⁶ Ukutandika apa wanda kwene uwakutandika umwezi uwalenga cinimbali, yatandike ukupeela amawila yakoca kuli Yawe, nanti angala umufula wa Ng'anda ikulu yakwe Leza walanga utacili wimbwe.

Ng'anda ikulu yakwe Leza yakuulululwa

⁷ Lyene iyasangula ulupiya ulwa kulipila yakaconga ya mawe na yakalepula ya mbao, nga yapeela ivyakulya ni vyakumwa pamwi na mafuta ku ina Sidoni na ina Tuli, apakuti nayo yangafumya imiti ya mikelide uku Lebanoni. Alino yailete kuli yemba, ifike uku Yopa ndi muno Kilusi mwene waku Pesya wapelile insambu.

⁸ Nga alino lyene umu mwezi wakwe ciili uwa mwaka wakwe ciili pacisila ca kufuma mu uzya nu kufika pa cifulo apayelile Ng'anda ikulu yakwe Leza umu Yelusalemu, Zelubabeli umwana wakwe Syeatieli, na Yesyua umwana wakwe Yozadaki, iyatandika umulimo. Yene yazwiliziwe na ina yao asyala (kuli kuti yasimapepo na ina Levi nga na antu yonsi awelulwike ukufuma ku Babiloni ukwiza ku Yelusalemu). Pali pakusonta aina Levi a myaka amakumi yaili nanti ukuluta penepo apakuti yangaya akaangalila ya mulimo wi kuule lya ng'anda ikulu yakwe Yawe.

⁹ Yesyua na ana yakwe aonsi nga na ina yakwe na Kadimiyeli na ana yakwe aonsi (kuli kuti amu mupanda wakwe Hodaviya) nga na ana yakwe Henadadi nga na ana na ina yao, yonsi kwene aina Levi, iyuminkana pamwi umu kwangalila yao aombanga umulimo wi kuule lya Ng'anda ikulu yakwe Leza.

¹⁰ Walanga yakakuula yamala uku kuula umufula wa Ng'anda ikulu yakwe Leza, yasimapepo nayo pali pakwiza, ale yatiyazwala insalu zyamutengo zya usimapepo izisuma. Yasenzile ni ntandala yakulizya. Aina Levi (ana aonsi yakwe Asafu) yene ala yali ni viwaya yakulumbanya Yawe, wakwe vino Davidi mwene wa ina Izlaeli wayatantikile.

¹¹ Yimba inyimbo zya kulumbanya nu kutaizya Yawe, yala yakuti, “Yawe umusuma. Uluse lwakwe pa ina Izlaeli ulwa manda pe.” Alino antu yonsi ala yakutolelela nu kupunda apapezile amaka yao yonsi, iyalumbanya Yawe pamulandu wakuti umufula wa Ng'anda yakwe Leza watandike ukukuulwa.

¹² Yasimapepo aikolo na ina Levi pamwi ni ntunguluzi zya mitundu, yano yaweni umufula wa Ng'anda ikulu yakwe Yawe iyampiti, vino yalolekanga yene iyalukusya sile aminsozi. Lelo antu ali ingi yene ala yakupunda ni nsansa.

¹³ Kutali nanti wenga angapusanya pakasi ka congo ca nsansa ni congo ca kulila, pamulandu wakuti antu yapundisyanga sana nga na mazwi yao yuvwikanga ukutali.