Ezila 10 - Amazwi Yakwe Leza 2013

Antu yailongwela amaifyo

¹ Lino Ezila acili akupepa nu kuilongwela amaifyo yakwe, ala akulila nu kuisumba pansi inkolelo ya Ng'anda yakwe Leza, iumba likulu lya ina Izlaeli aonsi, na anaci na ana yao yamuunganila. Nayo kwene yalila aminsozi nu ulanda ukulu cuze.

² Lyene Syekaniya umwana umonsi wakwe Yeeiyeli, wenga uwamu mupanda wakwe Elamu anena Ezila ati, “Tusi acumi kuli Leza apakutwala anaci ainamasi amu antu atuzingulwike. Lelo nanti cingaya vivyo, aina Izlaeli yacikweti upaalilo.

³ Lyene tulinzile twacita upangano na Leza uwakuti tumata anaci ya yonsi kumwi na ana yao kuti yapite. Tuli nu kucita vivyo ukulingana nu umpanda mano uno wewe na antu yauze akayela amasunde yakwe Leza mwatunena ukucita.

⁴ Fwandi wemo lyene katuka nu kucitapo cimwi, nga naswe tumaya ku lusansa lwako.”

⁵ Acino Ezila akatuka nga akonkomezya intunguluzi zyakwe yasimapepo, aina Levi kumwi na aina Izlaeli yonsi asyala kuti yacite ukulingana ni langulusi lyakwe Syekaniya. Lyene yonsi kwene yacita umulapo.

⁶ Alino Ezila afuma ku Ng'anda yakwe Leza nga aingila mu muputule wakwe Yeoyada umwana umonsi wakwe Elyasyibu. Lino wene acili kweneko, atalile cakulya nanti ukumwa amanzi awe, pamulandu wakuti watwalilile ukunyunguluka pa kuntayela kwakwe yayo afumile mu uzya.

⁷ Lyene antu yuma imbila mu Yuda monsi nu mu Yelusalemu, ku antu yonsi afumile ku uzya, kuti yakongane ku Yelusalemu.

⁸ Yalanda yati, “Ali wensi wino waposiwa ukufika umu manda yatatu, ale wene alapokololwa ivintu vyonsi vino wakwata, ukulingana nu upinguzi wa ntunguluzi na ikolo, nga aliwe kwene yalamusukula mwi umba lyakwe yayo aweluluka ukufuma ku uzya.”

⁹ Fwandi Ayuda na ina Benjamini, avino yakongine mu Yelusalemu mu manda yatatu. Lilyo cali pa wanda walenga makumi yaili mu mwezi walenga fundimbali. Antu yonsi yatuulile mu musolo wa Ng'anda ikulu yakwe Leza, ala yakuzakaza sile apamulandu kwene uu na pa mvula iyatonyizye wakwe cimwi.

¹⁰ Lyene simapepo Ezila akatuka, nu kunena antu ati, “Musi acumi apakutwala anaci ainamasi. Fwandi mwalunda penepo apa uyi wa ina Izlaeli.

¹¹ Lelo taizini Yawe, Leza wa vikolwe vinu nupya mwacita na vino watemwa. Muifuntusye ku antu amu mpanga ii, mutaane na aci inu ainamasi.”

¹² Alino lyene iuvi lyonsi lyasuuka capamwi nu kupunda iliti, “Umucumi, tulacita vino wavwanga.”

¹³ Lelo iyalundapo nu kuti, “Ala iumba lyatilikulisya, nupya cicili icisiku. Swemo tutange twimilile pano, pasipano umulimo uu usi wa wanda onga nanti manda yaili, apamulandu wakuti twaifya wakwe cimwi mu mwata kwene uu.

¹⁴ Leka intunguluzi zitu zimilile pa malo yi uvi lyonsi. Yonsi pyu mu ikazi amu misumba itu, yano yatwala aci ainamasi yalaiza pa manda asontwe, pamwi na yacilolo na yakapingula amuli cila musumba, mpaka sile lino ukali wakwe Leza witu apamulandu uu ulasisiwa pano tuli.”

¹⁵ Kusi nanti wenga uwakanyile kuli cico, suka sile Yonatani umwana umonsi wakwe Asaeli na Yazeya umwana umonsi wakwe Tikiva. Alino na Mesyulamu ukwikapo na Syabetai umwina Levi, ayano yayazumilizye.

¹⁶ Fwandi ali vino antu awelulwike ukufuma ku uzya yacisile ivyapingwilwe. Simapepo Ezila nawe ali pakusolola antu akumwazwilizyako, akalamba ya ndupwa ukulingana na mang'anda ya vikolwe vyao, ayalemba na mazina. Cali apa wanda wakutandikilapo mu mwezi walenga ikumi yatandika nu kulondelezya apa milandu.

¹⁷ Umu myezi itatu iyalondelipo yamala ukuceceta aonsi yonsi pyu yano yatwite aci ainamasi.

Amazina yakwe yayo amilandu atwite aci ainamasi

¹⁸ Yaa ali yano yatwite aci ainamasi. Muli yasimapepo, yano yatwite aci ainamasi aeya: Mu amu mupanda wakwe Yesyua na ina yakwe Yozadaki na ina, a Maaseya, Elieza, Yalibu na Gedaliya.

¹⁹ Yayo yene yazenzwike nu kuta aci yao, yatuula na suuku wa, mpolelwa yakwelela amaifyo yao.

²⁰ Mu amu mupanda wakwe Imeli: A Hanani na Zebadiya.

²¹ Mu amu mupanda wakwe Halimu: A Maaseya, Eliya, Syemaya, Yeeiyeli na Uziya.

²² Mu amu mupanda wakwe Pasyuli: A Elioenai, Maaseya, Isumeli, Netaneli, Yozabadi na Elasa.

²³ Mu ina Levi: A Yozabadi, Syimei, Kelaya (wino yatangi Kelita), Petaya, Yuda na Elieza.

²⁴ Pali yakiimba ya nyimbo: A Elyasyibu. Muli yakalinda ya mpongolo: A Syalumu, Telemu na Uli.

²⁵ Yauze ukufuma mu ina Izlaeli: Ukufuma Mu amu mupanda wakwe Palosyi: A Lamya, Iziya, Malikiya, Miyamini, Eleaza, Malikiya na Benaya.

²⁶ Mu amu mupanda wakwe Elamu: A Mataniya, Zakaliya, Yeeiyeli, Abidi, Yelemoti na Eliya.

²⁷ Mu amu mupanda wakwe Zatu: A Elioenai, Elyasyibu, Mataniya, Yelemoti, Zabadi na Aziza.

²⁸ Mu amu mupanda wakwe Bebai: A Yeonani, Hananiya, Zabai na Atilai.

²⁹ Mu amu mupanda wakwe Bani: A Mesyulamu, Maluki, Adaya, Yasyubu, Syeali na Yelemoti.

³⁰ Mu amu mupanda wakwe Paati Moabu: A Adina, Kelali, Benaya, Maaseya, Mataniya, Bezalele, Binui na Manase.

³¹ Mu amu mupanda wakwe Halimu: A Elieza, Isyiya, Malikiya, Syemaya, Syimeoni,

³² Benjamini, Maluki na Syemaliya.

³³ Mu amu mupanda wakwe Hasyumu: A Matenai, Matata, Zabadi, Elifeleti, Yelemai, Manase na Syimei.

³⁴ Mu amu mupanda wakwe Bani: A Maadai, Amulamu, Ueli,

³⁵ Benaya, Bedeiya na Kelui,

³⁶ Vaniya, Melemoti, Elyasyibu,

³⁷ Mataniya, Matenai, na Yaasu.

³⁸ Mu amu mupanda wakwe Binui: A Syimei,

³⁹ Syelemiya, Natani, na Adaya,

⁴⁰ Makinadebai, Syasyai, Syalai,

⁴¹ Azaleli, Syelemiya, Syemaliya,

⁴² Syalumu, Amaliya na Yosefu.

⁴³ Mu amu mupanda wakwe Nebo: A Yeiyeli, Matitiya, Zabadi, Zebina, Yadai, Yowelo na Benaya.

⁴⁴ Yaa yonsi yatwite aci ainamasi. Lyene yata aci yao nga yayazinga kumwi na ana yao yano yayavyalile.