Ezekelo 9 - Amazwi Yakwe Leza 2013

Yelusalemu yamuvunuka

¹ Nupya ne Ezekelo nuvwile kuno Yawe walaizya wati, “Mwe muno mwasonsilwe uku fulula Yelusalemu, aleni izini kuno, mwize ni vyanzo.”

² Awe mukwai papo kwene aonsi mutanda yafuma nu ku mpongolo ya panzi, ino yayela lwaku katutu ku mpongolo ya Ng'anda ikulu yakwe Leza, cila wenga ala ali ni canzo. Pali penepo nu monsi wenga uwazwite insalu zisuma izitelepelele, wene ala akweti ni vyakulembelako. Awe yonsi yiza yimilila lusansa lwaku kavuwa ka kutuulilapo aka mukuwa.

³ Nga alino ucindami wakwe Leza wa ina Izlaeli wafuma apapela pali yakelubi, nu kuya ku mulyango wa Ng'anda ikulu yakwe Leza. Lyene Yawe aama umuntu uwazwite insalu zisuma, wino wakweti ni vyakulembelapo,

⁴ nga amunena ati, “Yanga kapitane mu musumba onsi wa Yelusalemu, uye ukalembe icimanyililo pa mausyu ya antu yonsi aakuteta nu kulila pamulandu wa vintu vyawinyi vii vyonsi ivikucitika mu musumba uu.”

⁵ Nga nupya inuvwa kuno Leza akunena asyala yonsi ati, “Mulondelini, pitangini mu musumba, mukomemo antu. Cisi cakwezya ukusya nanti wenga, kusi kwezya kutezela umuntu foo.

⁶ Mukome yonsi, akote, alumendo, akazyana, yanyina kumwi na ana yao kwene. Lelo yayo yonsi alalembwa icimanyililo pa mausyu yao, awe yene mutezya kuyakumya mwenemo. Tandikilini kuno kwene ku Ng'anda ikulu yakwe Leza.” Fwandi nayo ali pakutandikila pa ntunguluzi izyaimi ku Ng'anda ikulu yakwe Leza.

⁷ Nga nupya Leza anena ati, “Kowezini ing'anda ino yakumpepelamo. Mu misolo yakweyo tulumalikini ivyala vya antu. Pitangini!” Caleka nayo yapita yatandika ukukomola antu mu musumba.

⁸ Nga lino yakukomola antu, nemo ne Ezekelo nsyala nimilile sile nenga. Awe mukwai niza naifwanta icinzamba pansi ufupime, indila inti, “Kalanda we Yawe, uzye icani cino wasokela umusumba wa Yelusalemu, cakuti ukomole aina Izlaeli yonsi yano yasyala mu mpanga ii?”

⁹ Leza nawe anjasuuka ati, “Aina Izlaeli na Ayuda yakwata umulandu, pano yene yaifya wakwe cimwi. Yakomola antu konsi pyu mu mpanga ii, nupya nu mu musumba kwene uu mwazula tupu uyi. Yene yakalukuti, ‘Leza wafumyako amano ku mpanga itu. Yawe asikulola foo.’

¹⁰ Caleka nani ne Leza insikusya nanti wenga, nsikutezela umuntu foo. Nemo namayacita sile ukulingana na vino yene yacita auze.”

¹¹ Nga alino umuntu wiyo uwazwite insalu zisuma zyakuyembelamo, aswilila kuli Yawe ati, “Musambazi, ala lyene nemo namala ukuomba vino mwali mwankonkomezya.”