Ezekelo 8 - Amazwi Yakwe Leza 2013

CILOLWA CAKWE LEZA CAKWE CIILI KULI EZEKELO ( 8:1–10:22 ) Upefi wa tuluwi umu Yelusalemu

¹ Umu mwaka walenga mutanda, uwanda walenga yasano uwa mwezi walenga mutanda, natenzi ukwane na akalamba ya Ciyuda ala yatenzi pankolelo yakwe nene. Papo kwene indola amaka yakwe Yawe Simwandalali yanjikila.

² Awe mukwai niza nalolekesya, nalola cimwi cino cikoline wa muntu. Ukutandikila kuli cino calolekanga wa musana wakwe ukuya pisika, walolekanga wa moto. Nupya ukufuma umu musana wakwe ukuya papela, wali waluswepo, luno lukuyengesa wa cela icikulumbile ningo.

³ Watambalike icali wikasa, andema nu kunyele zyane. Alino Umupasi iunkatusya umupela apakasi kansi ni yulu umu vilolwa vyakwe Leza, nu kuntwala uku Yelusalemu uku mulyango wa mpongolo ya mukasi, iyalolenkana uku katutu, pano akaluwi ka uzuwa kimikwa, kano kakalenga nu uzuwa uyeko.

⁴ Kuku, alikuno naweni ucindami wakwe Leza wakwe Izlaeli, ndivino nauweni umu nyika.

⁵ Nawe ali pakunena ati, “We mwana wa muntu, silola amanso yako lwaku katutu. Nani avino niza nalolekesya kweneko. Apa mulyango wa mpongolo yaku katutu, iya kavuwa, pali akaluwi kauzuwa.”

⁶ Nga anena ati, “We mwana wa muntu, uzye walola vino yakucita? Uzye walola ivya winyi vyonsi vino ang'anda yakwe Izlaeli yakacita kuno, apa kunzinga umu cifulo cane icicindame? Lyene, umalolako ni vyawinyi vino vilusilepo.”

⁷ Alino antwala pa mulyango wa musolo. Lino nalolekesya, awe mukwai indola icipongo umu lung'umba.

⁸ Anena ati, “We mwana wa muntu, fokonta umu lung'umba.” Lino nafokonta, indola inzila.

⁹ Wanena wati, “Ingila apakuti ulole ivyawinyi vino yakucita mwenemo.”

¹⁰ Nani ali pakwingilamo, nailolela nenga, apa viumba palenzilwepo monsi pyu ukuzinguluka, imisango ni misango iya unkolanya wa vintu ivikasela nu wa nyama zya mifitalila, nga nu tuluwi tonsi utwa ng'anda yakwe Izlaeli.

¹¹ Apa nkolelo yakwevyo, paimi aonsi acikalamba amakumi cinimbali, ang'anda yakwe Izlaeli. Na muli yayo, mwali Yazaniya umwana umonsi wakwe Syafani. Cila wenga wali ni cifutikilo mu minwe yakwe, ala nu mununko usuma wa ubani ukukwela umupela.

¹² Leza ali pakunguzya ati, “We mwana wa muntu, uzye wailolela ivikacita akalamba ya ina Izlaeli, umu kanda, cila muntu umu muputule wakwe umu viluwi vilengwe? Ala yakuti, ‘Yawe atange atulole, Yawe watazyela impanga.’ ”

¹³ Anena ati, “Wasya ulole ivintu navyuze ivisi namicitile, vino yakacita ivilusilepo napali vii.”

¹⁴ Alino antwala apa mulyango wa mpongolo yaku katutu ka ng'anda yakwe Yawe, ukwali yamangu yano yalosyanga Tamuzi.

¹⁵ Nupya Yawe anena ati, “Uzye walola cii, we mwana wa muntu? Ala lyene wasya ulole ni vicitwa vyakuzunguka ukuluta pali vii.”

¹⁶ Alino lyene ansenda nu kuntwala mukasi ka musolo wa Ng'anda yakwe Leza, nga kuku kwene apa wingililo wa Ng'anda ikulu yakwe Leza, pakasi ka lukungu na kavuwa, pali manye antu amakumi yaili na yasano. Yene yafutatile Ng'anda ikulu yakwe Leza ala ni vinso vyao vilozizye ku ufumondaka, nga ala yakupepa ilanzi lwaku ufumondaka.

¹⁷ Yawe anena ati, “We mwana wa muntu, uzye walola vimisango vii? Ala antu yaa Ayuda, yatalata ukucita ivintu vii vyonsi vyawinyi vino walola muno. Ayano yalenga nu kuti kuye impanzela mu mpanga ino yonsi. Alenzile nu kuti icipyu cane cicile penepo. Watuilolela we mwisikulu vino yakunsaalula mu misango yonsi ino yakunsaalwilamo.

¹⁸ Caleka yalalola apapelela icipyu cane. Ntalayapanya foo, nupya citalambaya foo. Yalezya uku mpapata wakwe cimwi, lelo nemo ntalayuvwa foo.”