Ezekelo 7 - Amazwi Yakwe Leza 2013

Impela ya ina Izlaeli ili mupipi

¹ Yawe avwanga kunondi ati,

² “We mwana wa muntu vwanga uti, Yawe Simwandalali wanena impanga yakwe Izlaeli ukuti awe lyene casila, lyene ali kusila kwa mpanga yonsi.

³ Impela yafikila. Ndakutumila ukali wane, ndakupingwila kulingana ni miyele yako, nupya ndakulolwesya pa vicitwa vyako vyonsi vitaiipila.

⁴ Ntakumupanya, nupya ntakumutezela foo. Namamufulula pamulandu wa vintu vyawinyi vino mwemo mwacita, ali pakuti musininkizye ukuti nene indi Yawe.”

⁵ Yawe Simwandalali wavwanga wati, “Isyamo lyala lyamulondelela.

⁶ Awe lyene casila, casililikila sile! Mwemo mwala mwapelelwa.

⁷ Isyamo lyala lyamuponela mwe ikala nsi. Kasita kafika, uwanda wapalama, kusi luzango pa myamba, pali sile malanda.

⁸ Nasya nkuletele icipyu cane nu kuvuzya ukali wane pa kukufulula. Namakupingwila kulingana ni miyele yako nu kukulolwela pa vicitwa vyako vitaiipila.

⁹ Ntakukulola luse luse, ntakukutezela foo, pano namalinganya pa miyele yako na pa vicitwa vyako iviipe, ivikaloleka mukasi kako. Lyene alino mulamanya ukuti nene indi Yawe wino akafulula.”

¹⁰ Eya! Asi papo uwanda wafikila wi lovyo! Awe lyene lwatatala. Ee, apapelela icilumba!

¹¹ Ukali lyene wakatuka, Leza amaonona imikalile isuma ya antu aipe, ukwaula intazi nanti ukupamviwa.

¹² Insita yafika. Wanda wapalama. Uculuzi wakukala ivintu nu kuvikazya umasila, pano Leza amakatukila yonsi ukali ukali.

¹³ Amanda yonsi yano umuculuzi alalengela pano nsi, awe nce atalazanilapo nanti cimwi pali vino waponzizye mu nsita ya misukosuko. Antu aipe yene yatalapusuka foo.

Leza alafulula aina Izlaeli pa maifyo yao

¹⁴ Yamalizya intandala nga alino yonsi yaiteyanye. Lelo pasikuya nanti wenga amaya ku kulwa inkondo pano Yawe amakatukila yonsi ukali ukali.

¹⁵ Ukunzi kuli inkondo, mukasi muli mpungo ni cipowe. Wiyo alazanwa mu mpanga alafwa ku lupanga, na wino alazanwa mu musumba icipowe ni mpungo vilamulya.

¹⁶ Yayo alapusuka yalapukila mu myamba, lelo ndayakoma yonsi wa vipeele, cila muntu apa maifyo yakwe.

¹⁷ Amakasa yonsi yalatolompoka, na makokola yonsi yalatipata wa manzi.

¹⁸ Yalazwala masaka, yalazakaza imili yonsi. Pa mausyu yao palaya insonyi na pa mitwe yao yonsi palapelwa inkuuzu.

¹⁹ Zaabu wao ni mpiya zyao yalavisumba mu miseo yamu musumba kwati ivyausali, pano impiya na zaabu vitangalola ukuyatuula pa nsita ino Yawe Leza ali ni cipyu. Vitangalola umusango wakuyatuusizyamo ku nzala. Vingalesya nu kuikusya, pano zaabu ni mpiya ali vintu vino vyayalenganga ukwifya.

²⁰ Pa mpiti yayuvwanga pa viyembelo vyao vya usaka, lelo pali ndakai avino yakutola pakuipangila utuluwi twawinyi. Uli mulandu kwene uno ne Yawe Leza namalenga ukuti ivyuma vyao visenulwe viye ivya usali.

²¹ Yawe Leza wavwanga wati, “Nemo namaleka ainamasi ayano yavisampe, namaleka intalanganyi zyamu mpanga azino zitole ivyuma vyao nu kuvikowezya.

²² Ndayafutatila pakuti antu yakize yakakowezye icuma cane. Ainamasi yalingilamo nu kucikowezya.

²³ “Pangini umunyololo lemanini, pano impanga yatizula ukuzwisya uwazi, mu misumba namo muli impanzela zitupu.

²⁴ Caleka ndaama imitundu iyalutapo ukali, iliza ipoke amang'anda yao, ndamala icilumba ca asambazi ni ncende zyao zicindami zilakowela.

²⁵ Lino icimvulunganya ciliza, yalalonda ulongo, lelo lutalayako.

²⁶ Isyamo lilalondela api syamo ni cimvulunganya pa cimvulunganya. Alino yaluzya cilolwa kuli kasema, lelo simapepo atalakwata ilamulo, inkombe nazyo zitalamanya vyakupanda amano.

²⁷ Umwene alalosya, intunguluzi nayo ilaya nu ulanda ukalamba, na makasa ya antu aikala nsi yalazakaza ku ntete. Ndayalinganya pa miyele yao, ndayapingwila ukulingana ni mipingwile yao. Lyene yalamanya ukuti nene indi Yawe.”